Read Punu Ezekiel 13 Bible Online

Ezekiel 13 - Punu bible

Ezekiel 13

¹Fumu amansingula rie:

²Muana mutu, loga babiyitsi baIsrael abebiyi na matasa majogu beni, gukabatsingula rie: Guluanu mambu maFumu!

³Menu aguvu Fumu Nsambi nyivosi rie: Ka muna maguga ma biduka bibabiyitsi bolaba abeduki matasa mogu ne bagejabi diambu!

⁴Aa Israel nana bitsalala bivu o mbura ajimasiala mududu anana bibiyitsi bagu bavu.

⁵Basamaweliga udibiga maluta, basamatsiengisa mandagu maIsrael yivaga udugaga divita yilumbu ayi Fumu amalasa kabu andi.

⁶Biriariamu biogu bimaba bikulini na mbigulu tsiogu tsimafura. Bevosi rie: Fumu amavosa, diuleba menu Fumu nyisamabasindiga. Bepivi udugusu mbigulu tsiogu.

⁷Tumba nyibawivuli rie: Biriariamu abi duilabi bigaa bikulini? Na mbigulu tsienu tsigaa yika mfurulu? Jenu duivosi rie: Fumu amavosa, ne pa nyisamavosa.

⁸La dibandu menu aguvu Fumu Nsambi nyivosili rie: Dunofunisa mambu makulini na biriariamu bienu abivu yika mfurulu, menu aguvu Fumu Nsambi nyivosi rie: Nyina kueru nenu.

⁹Nyulasa mangolu mami ombu babiyitsi abelabi biriariamu bikulini na abebiyi mamfurulu. Bagomueba mu dibuli dibatu bami na bagosonugu mu muganda ubaIsrael. Mbana dujaba yiri menu nyivu Fumu Nsambi na anana nyivosili.

¹⁰Mambu memama molabana mu mbari bepembusi batu bami nsila ava bevosili rie: Ka muna duvotsu du! Ne pa vagaa duvotsu. Batu bami berungisi yibaga na babiyitsi beni bevayi dunduyi.

¹¹Tsingula jogu abevayi dunduyi yiri yibaga yiurakuga; mfula jineni jiunoga; mfula tsimamanyi tsiubonduga na mungudi uneni ugumba.

¹²Labatianu yibaga urakuga yirakuyi! Bagoduwivula rie: Dunduyi adu dumava-ga dugaa na tsongu?

¹³La dibandu menu Fumu Nsambi nyivosili rie: Na kabu ami nyugumbisa mungudi; na fuiri ami nyunoyisa mfula jineni na mfula tsimamanyi tsiubonduga ubunganga.

¹⁴Nyupansa yibaga ayi jenu dumavaga dunduyi; nyuyibeta va tsi na bibuga biyionyi biusiala jalala. Yibaga yiurakuga na jenu duyefu guna. Mbana dujaba yiri menu nyivu Fumu.

¹⁵Anana nyudugusulu kabu ami mu yibaga yieni nesi ombu jogu abamayivaga dunduyi. Mbana bodutsingula rie: Yibaga yisatsi! Jogu abamavaga dunduyi basatsi wandi,

¹⁶dedi mosi na babiyitsi baIsrael abamabiyila Jerusalem na abamagulabila biriariamu biduvotsu, diuleba vagaa duvotsu! Menu aguvu Fumu Nsambi oyiditubuli.

¹⁷Ndeʼ Ezekiel, siemba bagetu baIsrael abebiyi na matasa majogu beni; gukabaloga.

¹⁸Gukabatsingula adi menu Fumu Nsambi nyivosi rie: Ka muna maguga ma ombu bagetu abesumbisi misuinga nesi misuari uyenadunsanga batu! Duirondi urombisa batu bami dufu nokegobula jenu beni.

¹⁹Mu diambu dimua yietsu yiorsa na mua bibuku bimapa, duindesi va gusu batu bami na duibokisi batu abagaa na diambu uboku na dugebokisi jogu abavu bawelimina uboku; anana duidunsili batu bami abegulu mamfurulu.

²⁰La dibandu menu Fumu Nsambi nyivosili rie: Guluanu nyivini misuinga mienu ami duidunsili batu na mirambu mienu; nyudupatula batu beni aba dumayenadunsanga yiri bodurina.

²¹Nyudupatula misuari mienu wandi na nyuwaka batu bami kalala ombu genu. Bagomuewakululu mu mirambu mienu, mbana dujaba yiri menu nyivu Fumu.

²²Jenu duitsirisi mutu usungama murima na mfurulu tsienu diuleba meʼ beni nyisamamunyongisa na duiwarisi batu babi mu mabi mogu yiri bagokalula diela nodila monyu.

²³Kabogu dugomuelaba biriariamu bikulini na dugomuebiga mbigulu. Nyuwaka batu bami kalala ombu genu. Mbana dujaba yiri menu nyivu Fumu.