Read Punu Ezekiel 14 Bible Online

Ezekiel 14 - Punu bible

Ezekiel 14

¹Yilumbu yimosi bivunda bimosi biIsrael bamaruga uyimoga nami.

²Mbana Fumu amansingula rie:

³Ezekiel, batu bebana beyitsingi bakosi na bekipi abimabarombisa ukevega uvaga mabi. Divu diwelimina yiri botatila?

⁴La dibandu vosa nogu nobatsingula rie: Menu Fumu Nsambi nyivosi rie: Muisi Israel uotsu aguiyitsi bakosi na aguikipi abimamurombisa ukevega uvaga mabi mbana va julu vana pa oyevosa na mubiyitsi menu Fumu nyumuwagula mawelimina na bakosi bandi bapuela bapuela.

⁵Kabusulu ami jiupa-nsa baIsrael botsu abamakakana nami mu dia mbu didurondu duogu dubakosi.

⁶La dibandu tsingula baIsrael rie: Fumu Nsambi jandi rie: Kalulanu diela; busanu bakosi benu; busanu nsoruru tsienu tsiotsu.

⁷Muisi Israel uotsu nesi muenyi uotsu aguitsani o Israel agumakakana nami aguiyitsingi bakosi na aguikipi abimamurombisa ukevega uvaga mabi mbana va julu vana, pa oyivosa na mubiyitsi yiri omuvosila ombu garni, menu Fumu nyumuwagula meʼ beni.

⁸Nyumuliyila nsima na nyumuvaga nderi yilimba na opejungu na nyumugusula va gari batu bami mbana bojaba yiri menu nyivu Fumu.

⁹Pa mubiyitsi obiga ndunsulu, menu Fumu agumamusingisa tsionyi, nyumulasa mangolu mami na nyumugusula va gari batu bami baIsrael.

¹⁰Mubiyitsi umunongu eni na jandi oyimuwivuli, mbela jivu dedi ombu botsu babeji.

¹¹Mbana baIsrael bagomuekakana tindi vala nami na bagomuevaga nsoruru na nsimbulu tsiogu tsiotsu. Nyuba Nsambi ogu. Menu Fumu Nsambi oyiditubuli.

¹²Fumu amansingula rie:

¹³Ezekiel, pa dilongu digaa disigama na divayi masumu nyudilasa mangolu mami notsiemusa biguji abiwarisi, diwendi rie: nyuditindila dungosu dunsala utsiemusa batu na bibulu muna.

¹⁴Ne pa batu bebaba barieru: Noe na Daniel na Job bamatsananga muna dilongu dieni menu Fumu nyivosi rie: Yika jogu buandi bodila monyu mu diambu didusungugu duogu.

¹⁵Diurungula uba nyulinsa bibulu bibukanyi mu dilongu abiuyenajanganga batu na diukaluga mududu te na mutu agovioga urina bibilu bieni.

¹⁶Diuleba babaala bebaba barieru boba muna dilongu dieni yika jogu buandi bogobulu menu Fumu Nsambi nyimagana kaka rie: Ne muana dibaala ne muana mugetu bagowaku kalala na dilongu diusiala mududu.

¹⁷Vo diurungula uba nyusingisa divita o dilongu dieni na nyuvosa rie: Dibokingi batu na bibulu,

¹⁸diuleba babaala bebaba barieru bamatsananga muna dilongu dieni yika jogu buandi bogobulu; menu Fumu Nsambi nyimagana kaka rie: Bagorungula ugobula ne baana bogu.

¹⁹Vo diurungula uba nyutinda yivunga o dilongu dieni na nyudiwitilila kabu ami noyenabokanga batu na bibulu.

²⁰Diuleba Noe na Daniel na Job bamatsananga muna dilongu dieni yika jogu bodila monyu mu diambu didusungugu duogu.

²¹Nyiina, Fumu Nsambi amavosa rie: Nyimatinda mikilu miami mina mineni o Jerusalem: divita na dungosu dunsala na bibulu bibukanyi na yivunga uyenabokisanga batu na bibulu.

²²Ne nana voba bansialutsu abagofu abobura baana bababaala na baana babagetu. Dunobalaba na dunolaba mutsanu ogu na bifu biogu mbana dubembugu mua pesu mu diambu dimaguga ama nyimasingisa Jerusalem ulabanga.

²³Fumu amavosa rie: Bodubembiga ava dulabila mutsanu ogu; mbana dujaba tsiri kulini nyimavayila motsu ama nyimaduvaga.