Read Punu Ezekiel 16 Bible Online

Ezekiel 16 - Punu bible

Ezekiel 16

²Muana mutu, jabisa Jerusalem nsoruru tsiandi.

³Gukavosa rie: Menu Fumu Nsambi nyivosi mu diambu diJerusalem rie: Dibandu diagu na duburu duagu tsiri o yiari yiCanaan? Taji agu amaba muisi Amor, nguji agu amaba muisi Hitt.

⁴Muna yilumbu ayi gumaburulu digumba diagu disamatabulu na gusamabuitsu mamba; gusamagotsu musayi na gusamapietu va matsanda.

⁵Ne mutu mosi asamagulasa yingeba ugukelisa tumba gumabuagu penyi o musiru muna yilumbu yiduburu duagu mu mbari bamagulaba nsoruru.

⁶Nyimavioga bebeli nagu na nyimagulabulila ugolana guigolini malungu na nyimagutsingula rie: Banganga monyu va gari malungu magu! Nyimamuegutsingula rie: Banganga monyu va gari malungu magu!

⁷Nyugufunisa tindi ufunisa nderi pinda. Ndeʼ gumabanguga te na gumakaluga tindi kembu; gumarungiga mabenyi; guka numba jiwelimina. Tumba gumabanganga yika penyi.

⁸Nyimamuevioga na nyimagugengila; nyimalaba yiri guka numba. Nyimagukubiga mulemba uyilinga yiami na nyimadibiga penyi agu, nyimagana kaka uba aguagu na nyimavangana pangini nagu yiri guba aguami.

⁹Nyimagubuitsa na nyimagutsindula malungu; nyimagugotsa matsi.

¹⁰Nyimaguvega biduaru bimaruku na bapondu bamukata na beleeti jilina; nyimaguduisa matsanda matindi maboti.

¹¹Nyimaguduisa kembu na milunga mimiogu na musanga mu kingu agu.

¹²Nyimaguduisa moru mu mbasu na bipunga mu matuji magu na dugaba dukembu va muru agu.

¹³Nyimaguduisa lora na lora jivema na matsanda magu mamaba matindi maboti na mamaruku. Biguji biagu bimaba fufu na buji na matsi. Gumabanganga na tindi kembu dedi te na gumasolu uba mugetu ukaga.

¹⁴Menu Fumu Nsambi nyivosi rie: Diduma dikembu agu dimanyava o malongu motsu; jimaba tindi kembu mu mbari nyimagugabila jionyi.

¹⁵Tumba ndeʼ gumakipa yika kembu agu na gumakevuyisa na mundungu agu; gumavaganga bumbembu buagu na uotsu ka mutu.

¹⁶Gumabonga biduaru biagu na gumakevayila mbura tsiduyitsu atsi gumavakiga matsanda mamunongu na munongu na gumakevuyisa muna — vasakalabana diambu dimunongu eni na digomuelabana via.

¹⁷Gumabonga kembu tsiagu tsilora na lora jivema atsi nyimaguvega na gumatsivaga bakosi bababaala aba gumakevuyisa.

¹⁸Gumabonga biduaru biagu bimaruku gumabikubiga na gumavagulila bakosi beni matsi mami na bima biami bimbunga jiboti.

¹⁹Mapa ama nyimaguvega na dikaka difufu na matsi na buji abi nyimagubungulila gumabivagulila bakosi beni nderi bima bimbunga jiboti. Menu Fumu Nsambi nyivosi rie: Adina dimalabana.

²⁰Gumabonga baana bagu bababaala na babagetu aba gumamburila; gumababunga ava gumabavagulila bakosi. Je buvuyisa buagu bumaba diambu digeyi?

²¹Gumabokisa baana bami bababaala ava gumabaveyila ombu bakosi nobanyensa o muji.

²²Va gari nsoruru tsiagu tsiotsu na buvuyisa buagu gusamarangimina temu jibunumba buagu ava gumabila penyi na mbe gusakatsindulu malungu.

²³Menu Fumu Nsambi nyivosi rie: Ka muna maguga ma ombu gagu! Gumavaga mabi mapuela mapuela.

²⁴Gumakerungisila mandagu mabumbembu na mbura tsiduyitsu yiari na yiari.

²⁵Va disogumunu dikadi nsila gumarungisa mbura tsiagu tsiduyitsu; gumabivisa kembu agu; gumafubana yitsiga na uotsu ka mutu; gumafunisa bumbembu buagu.

²⁶Gumavaga bumbembu na babaala bamangolu baEgypte na gumafunisa buvuyisa buagu unyoyisa.

²⁷Kabogu nyimagulasa mangolu mami na nyimageyisa dikabu adi nyimagusolila na nyimaguwakisa ombu bavinitsi bagu abavu baana babagetu babaPhilistin abamalaba yisonyi yibifu biagu bibi.

²⁸Gumavaga bumbembu na bisi Assyrie mu mbari gusamavotsa nsala tsiagu; gumavaga bumbembu nogu ne nana nsala tsiagu tsisamasuka.

²⁹Gumafunisa buvuyisa buagu na bisi Canaan te na bisi Babylone; ne na botsu bana nsala tsiagu tsisamasuka.

³⁰Menu Fumu Nsambi nyivosi rie: Ka muna buduka bu! Gumakebivisa ne uviolila bimbembu biotsu!

³¹Gumarungisa mandagu magu mabumbembu na va disogumunu dikadi nsila gumarungisa mbura tsiagu tsiduyitsu yiari na yiari. Gusamawelimina ne na yimbembu oyirombi mbongu.

³²Ndeʼ guvu mugetu ne nana guidilingi benyi tsiri mulumi agu.

³³Bimbembu biotsu befutu; tumba ndeʼ gumafuta maronda magu motsu, gumabadila ava gumabaveyila bima biagu ubaduta ombu gagu.

³⁴Gusamaba nana bimbembu bisusu mu mbari ndeʼ beni gumabawambilanga; ndeʼ beni gumabafuta, basamagufuta; adina dimaguviakasana na bisusu.

³⁵Ndeʼ Jerusalem aguvu yimbembu, gulu mambu maFumu.

³⁶Gulu adi menu Fumu Nsambi nyigutsinguli rie: Gumalasa penyi agu na buvuyisa buagu ombu maronda magu nombu bakosi bagu bansoruru na gumawitila malungu mabaana bagu aba gumavagulila bakosi pagu;

³⁷kabogu nyugukiga maronda ama gumaronda nesi ama gumavina; nyumagukiga yiari na yiari nomalasa penyi agu jiotsu.

³⁸Nyugukilisa nana bekilis ili bimbembu bibagetu nesi abewitili malungu. Nyugugabusila pila na nyugulasa kabu ami.

³⁹Nyuguwakisa ombu maronda magu. Borakula mandagu magu mabumbembu nesi upansa mbura tsiagu tsiduyitsu; boguvula biduaru biagu na bobunga kembu tsiagu na bogusila tindi penyi.

⁴⁰Bogubeyila yinombu ayiugutindila mamanyi na bogutoba na dijenga.

⁴¹Bonyensa mandagu magu nesi ugutabulila bunsonsi va misu mabagetu bapuela bapuela. Anana nyusukisila bumbembu buagu na gugomuefuta ne dironda dimosi.

⁴²Nyimagudugusulu kabu ami ngomueguwavanga; nyuba sui, ngomuenyoganga.

⁴³Menu Fumu Nsambi nyivosi rie: Gusamatangimina va bunumba buagu na gumatumuna na mambu meni motsu la dibandu nyugunangusila mbela jibifu biagu bibi. Gusamafubana bifu biagu bibi na nsoruru tsibakosibagu?

⁴⁴Fumu amabuela rie: Gulu Jerusalem, botsu abebuayi banongu boguvindiyila nongu ejiji rie: Dugaji duji nguji taba adu muana taba ejiji

⁴⁵Ndeʼ guvu muana mugetu unguji agu agumabusa mulumi andi na baana bandi; ndeʼ guvu yibusi yibibusi biagu abimabusa balumi bogu ne baana bogu. Nguji enu amaba muisi Hitt na taji enu amaba muisi Amor.

⁴⁶Yibusi yiagu yiyivunda ayitsani va magetu magu la Samarie na baana bandi babagetu; yibusi yiagu yingebi ayitsani va mabaala magu la Sodome na baana bandi babagetu.

⁴⁷Gusamaduka yika bifu biogu nesi uvaga nsoruru atsi jogu bamavaga, adina dimaba mua diambu digeyi; ndeʼ gumabiva uviolila jogu.

⁴⁸Menu Fumu Nsambi nyivosi na nyigani kaka rie: Yibusi yiagu Sodome na baana bandi babagetu basamavaga ama jenu na baana bagu dumavaga.

⁴⁹Gulu dibi diyibusi yiagu Sodome. Amaba na dunangu na amaba na digumba na amatsana sui na baana bandi ne nana asamawamusanga abamakambulu nesi bijaga.

⁵⁰Jogu bavu tsamanga na bamavaga nsoruru va misu mami. Nyinolaba nana nyimabatsiemusa nana guijabili.

⁵¹Mbe ka Samarie asamavaga mabi dedi nagu; nsoruru tsiagu tsimaviolila tsiandi na yibusi yiagu yiulabana asungama pa bogengila nsoruru tsiagu.

⁵²Ndeʼ agumaveganga bibusi biagu mbela; labanga yisonyi mu diambu dimasumu magu ama gumakelasa tindi nsoruru uviolila jogu; masumu mogu mebalasi basungama uviolila ndeʼ; nyiina, laba tindi yisonyi mu mbari mabi magu mamalasa yiri bibusi biagu bavu basungama.

⁵³Nyugabusa bakoli bogu, bakoli baSodome na baana bandi babagetu na bakoli baSamarie na baana bandi babagetu. Nyukunsa diambu diagu dikunsila na diogu.

⁵⁴Bibusi biagu biubembugu ava gusundusulu.

⁵⁵Bibusi biagu Sodome na Samarie na baana bogu babagetu bomueba nana bamalebila; ndeʼ na baana bagu babagetu dumueba nana dumalebila.

⁵⁶Ava gumabila na dunangu gusamaranguna ne uranguna diina diyibusi yiagu Sodome.

⁵⁷Ne mbivulu tsiagu tsikapalusu va yijalala gumadesu na baana babagetu baEdom na babaPhilistin abamagusienga nesi ugulensanga.

⁵⁸Menu Fumu Nsambi nyivosi rie: Ndeʼ gumanangula mbelajimabi maguna nsoruru tsiagu.

⁵⁹Menu Fumu Nsambi nyivosi rie: Nyuguvayila nana gumavayila; ndeʼ agumalensa pesi ava gumakubulila pangini.

⁶⁰Tumba nyurangimina pangini ami aji nyimavangana nagu na bundumba buagu na nyuvangana pangini jimutubu nagu.

⁶¹Mbana gurangimina nsanunu agu na gulaba yisonyi ava gudilila bibusi biagu nesi bivunda nesi bangebi; boba nderi baana bagu babagetu tumba tsiri mu diambu dipangini agu.

⁶²Nyuwarisa pangini ami nagu mbana gujaba yiri menu nyivu Fumu.

⁶³Mbana gurangimina amamavioga nomalaba yisonyi; gugomuedibula munu mu mbari guvu tsokudu. Nyugutanda mabi motsu ama gumavaga. Menu Fumu oyidiwarisi.