Read Punu Ezekiel 20 Bible Online

Ezekiel 20 - Punu bible

Ezekiel 20

¹Wilima yimusambuali mu yilumbu yimusiamunu yitsungi jimuranu bibukoli buetu bivunda bimosi biIsrael bimatasuna uyewivula duganu duFumu.

²Mbana Fumu amansingula rie:

³Ezekiel, vosa na bivunda biIsrael nobawivula rie: Menu aguvu Fumu Nsambi nyivosi rie: Je dutsiruga uyijaba duganu duami? Menu aguvu Fumu Nsambi nyimagana rie: Ngogaru uwivulu nenu!

⁴Muana mutu guirondi ubatabulila bunsonsi? Guyatsikadana ubutabula. Bajabisi nsoruru tsibataji bogu!

⁵Gukabatsingula rie: Menu aguvu Fumu Nsambi nyivosi rie: Yilumbu ayi nyimasolila Israel, nyimavangana pangini nogu na nyimakelasa ombu gogu o bulongu buEgypte; nyimavangana nogu ava nyimavosila rie: Menu la Fumu Nsambi enu.

⁶Muna yilumbu yieni nyimavangana nogu ubagusula o bulongu buEgypte ubabega o bulongu abu nyimabarombila, bulongu abuvu na digumba adiviolili dimalongu motsu.

⁷Nyimabaruma rie: Mutu mutu abusi bansambi bangana abedudili nsoruru. Duyakebivisa na bakosi baEgypte! Menu la Fumu Nsambi enu.

⁸Jogu bamakaluga mimbini miami na ba-samaronda ukulu. Ne mutu mosi asamabusa bansambi bangana abamamudililanga nsoruru na basamabusa bakosi baEgypte. Nyimadila ditasa ubawitilila kabu ami nesi ujilasa o bulongu buEgypte.

⁹Nyisamadivaga nana mu diambu didiina diami diNsambi yiri digosabulu na bisi malongu o biari abi bamatsaninanga, va misu mogu nyimakejabisa ombu abami ava nyimabapalisila o bulongu buEgypte.

¹⁰Ne nana nyimabapalisa o bulongu buEgypte na nyimabawendisa o kumu.

¹¹Nyimabalonsa migaga miami nesi ubajabisa mamma mami abi mutu vengu okipanga udila monyu.

¹²Nyimabavega yilumbu yiuvuma; yionyi yimaba nderi yilimba va gari jetu nogu yiri bojaba rie: Menu nyivu Fumu agumabasola uba abami.

¹³BaIsrael bamaba mimbini miami o kumu, basamakipa migaga miami na bamabusa mamma mami abi mutu vengu odukanga udila monyu; bamaviosulila usumuna yilumbu yiami yiuvuma. Nyimamuetasa ubawitilila kabu ami o kumu nobabunga.

¹⁴Nyisamadivaga yiri diina diami digosabulu na bisi malongu o biari abi bamatsaninanga; va misu mogu nyimakejabisa ombu abami ava nyimabapalisila o bulongu buEgypte.

¹⁵Nyimavangana pangini nogu o kumu yiri ngobawendisa o bulongu abu nyimabasolila, bulongu abuvu na digumba adiviolili dimalongu motsu.

¹⁶Adina dimalabana mu mbari bamabusa mamma mami na basamakipa migaga miami na bamasumuna yilumbu yiami yiuvuma na basamabusa bakosi.

¹⁷Tumba nyimabalasa yingeba na nyisamababunga nesi ubabokisa o kumu.

¹⁸Nyimatsingula baana bogu o kumu rie: Duyakipa migaga mibataji benu na duyakelisa bifu biogu na duyakebivisa na bakosi bogu!

¹⁹Menu nyivu Fumu Nsambi enu. Kipanganu migaga miami na kelisanu maruma mami.

²⁰Vaganu yilumbu yiuvuma yingitsi; yibi yilimba va gari jetu nenu ayiujabisa yiri menu nyivu Fumu Nsambi enu agumadusola uba abami.

²¹Jogu wogu bamakaluga mimbini miami. Basamakipa migaga miami, na basamakelisa nesi udugusu maruma mami abi mutu vengu okipanga udila monyu na bamasumuna yilumbu yiami yiuvuma. Nyimamuetasa ubawitilila kabu ami nesi tindi fuiri ami.

²²Tumba nyimakekelisa, nyisamadivaga mu diambu didiina diami yiri digosabulu na bisi malongu o yiari ayi nyimapalisila abami.

²³Nyimamuevangana pangini nogu o kumu ubapansa o malongu nesi ubatsiamuna o biari biotsu,

²⁴mu mbari basamakelisa maruma mami na bamabusa migaga miami nesi usumuna yilumbu yiami yiuvuma na bamayitsa bakosi babataji bogu.

²⁵Nyimabavega migaga amisamabalasa ubueji na maruma ama basamarungula ukipa.

²⁶Nyimabatubulila muinsi ava bamavagulila pagu tsiogu: bamavagula tsomi tsiogu pagu mu dionyi nyimaronda ubakilisa nobajabisa yiri menu nyivu Fumu.

²⁷La dibandu Ezekiel gukatsingula baIsrael rie: Menu aguvu Fumu Nsambi nyivosi rie: Bataji benu bamandesanga; basamaba basigama na mambu mami.

²⁸Nyimabawendisa o bulongu abu nyimavangana ubavega na bamaromba mikongu misakama nesi miri amivu na mafunda; amuna bamavagulila pagu tsiogu nesi ukwakisa miensili miogu amimanyoyisa; bamanyensa bima biogu bimbunga jiboti na bamapuga pagu tsiogu tsiunu.

²⁹Nyimabawivula rie: Mbura tsieni tsiduyitsu atsi duiwendingi, divindugulu yi? Diina dimbura tsiduyitsu dimaruyila ombu genu na anana divu te na namunyi.

³⁰La dibandu wivula baIsrael rie: Menu Fumu Nsambi nyiwivuli rie: Dugekebivisa dedi mosi nana bataji benu bamakebivisila na dugevayi bumbembu na nsoruru tsiogu?

³¹Ava duikwakisili miensili na duinyensi baana benu pagu duikebivisa te na namunyi. Menu aguvu Fumu Nsambi nyivosi rie: Ngogaru uwivulu nenu!

³²Ama duitasi magodugusu ava duivosili rie: Tuirondi uba nana bisi malongu nesi nana mikuta mimalongu masusu tuirondi uyitsa miri nesi mamanyi, tumba adina digolabana.

³³Menu Fumu Nsambi nyimagana rie: Nyuduruma na mangolu mami motsu na nyuduwitilila kabu.

³⁴Na mangolu mami motsu nyuduwitila kabu ami na nyudupalisa va gari batu na nyudugukiga o malongu ama dumapansiga.

³⁵Nyudubega o kumu vala na batu basusu na avana nyudutabulila bunsonsi kiakiaki.

³⁶Menu Fumu aguvu Nsambi nyivosi rie: Nana nyimatabulila bataji benu bunsonsi o kumu tsibulongu buEgypte anana nyudutabulila bunsonsi.

³⁷Nyudusungiga na dukonduku na nyudugabusa o migaga mipangini.

³⁸Nyukakasana mimbini va gari enu nesi jogu abage-ndedili; nyubagusula o bulongu abu bavu benyi, ne nana bagogabuga o bulongu buIsrael. Mbana dujaba yiri menu nyivu Fumu.

³⁹Jenu baIsrael, menu aguvu Fumu Nsambi nyivosi rie: Wendanu, mutu mutu uyeyitsa kosi andi! Tumba va julu vana dukulu na dugomuelensa diina diami adivu yingitsi ava duivagulili bakosi benu pagu.

⁴⁰Menu aguvu Fumu Nsambi nyivosi rie: Va julu mukongu ami uyingitsi nesi va julu mukongu usakama uIsrael avana baIsrael botsu na botsu aboba o bulongu buenu bokitsila; avana nyubadilila na nsangu na nyusinga miensili mienu nesi pagu tsiumanga na biotsu abi dupagulila.

⁴¹Nyudusinga nderi duvu pagu jibima bimbunga jiboti ava nyudupalisila va gari batu nodugukiga o malongu ama dumapansiga; mbana nyulasa bunsambi buami va gari enu va misu mabisi malongu.

⁴²Mbana dujaba yiri menu nyivu Fumu ava nyudugabusilila o bulongu buIsrael abu nyimavangana uvega bataji benu.

⁴³Avana durangimina mutsanu enu na bifu bienu biotsu abi dumakebivisila; jenu beni dukelaba nsoruru mu diambu dimabi motsu ama dumavaganga.

⁴⁴Menu aguvu Fumu Nsambi nyivosi rie: Aa jenu baIsrael, nyuvaga nana udujabisa yiri menu nyivu Fumu yiri duyitsa diina diami noliyila bifu bienu bibi nsima!