Read Punu Ezekiel 21 Bible Online

Ezekiel 21 - Punu bible

Ezekiel 21

¹Fumu amansingula rie:

²Muana mutu gengila o yiari yitandu nondoyila bisi musiru utandu!

³Gukabatsingula rie: Menu aguvu Fumu Nsambi nyivosi rie: Nyubangisa muji va gari miri usielasana miri mio-tsu amivu na magaji nesi amimagumuga; mulutsu uneni ugotsima, musiru uotsu unyenga ubandila o tandu te no banda.

⁴Na mutu uotsu olaba yiri menu Fumu nyimagubangisa. Ugotsima via!

⁵Nyimavosa rie: Aa Fumu Nsambi beposili rie: Evosingi yika na banongu.

⁶Fumu amamuensingula rie:

⁷Ezekiel gengila o yiari yi Jerusalem, loga mbura tsiduyitsu! Biyila bulongu buIsrael!

⁸Gukatsingula baIsrael rie: Menu Fumu nyivosi rie: Nyina kueru nenu, nyusomuna dijenga diami mu yisupu yiami na nyubokisa batu basungama nesi babi.

⁹Mu mbari nyubokisa botsu na dijenga diami diusomuga mu yisupu yiami uboka mutu uotsu ubandila o tandu te no banda.

¹⁰Mbana mutu uotsu ojaba yiri menu Fumu nyimasomuna dijenga diami mu yisupu. Digomuegabuga muna.

¹¹Mbe ka ndeʼ Ezekiel tsukama na murirna ubuliga na bimanga va misu mogu.

¹²Pa boguwivula rie: Dibandu yi guibimini? Gukawaka rie: Diambu uruga diruyi! Mirima miotsu miuba bakaka, makaka motsu modeda, mirima miotsu miuregama na makotulu mogaangu na yinoru. Fumu aguvu Fumu amavosa rie: Labanu, uruga diruyi, divu vana.

¹³Fumu amamuensingula rie:

¹⁴Muana mutu biga novosa nogu rie: Dijenga! Dijenga! Dimasibu na dimagungu.

¹⁵Dimasibu uyenabokanga, dimaliomusu uvembula kagala! Jetu tulaba nsangu? Muansu umuana amiʼ udibaala uilensi miri miotsu.

¹⁶Dimavegu ugungu yiri diugaangu va dikaka; dijenga dimasomunu batu bami nesi basefu botsu baIsrael; jogu boboku na dijenga va mosi na batu bami. Kabogu duma tulu agu!

¹⁷Ezekiel, gamuga! Dijenga diedidi diugaanga batu bami, diugaanga basefu baIsrael aboboku va mosi nandi.

¹⁸Menu Fumu Nsambi nyivosi rie: Nyiina, diambu diulabana; diambu yi diulabana pa muana eni aguilensi biotsu upansu?

¹⁹Ndeʼ Ezekiel biga nosiga masuku! Dijenga didimbu kumbu beji nesi yirieru! Divu dijenga didubungu, dijenga didubungu duneni, dijenga adiubabingisa.

²⁰Diubasa mirima goma nofunisa bamfumbi, o biabutsu biotsu nyubatsoyisa na dijenga. Dimavembula kagala, dimasibu uyenabokanga.

²¹Lasa mengu magu, wenda o yiari yimabaala! Vioga, nowenda o yiari yimagetu! Lasa mengu o biari biotsu.

²²Menu aguvu Fumu, Nyivosi rie: Mbe ka menu, nyusiga masuku na nyunyoga tindi kabu.

²³Fumu amamuensingula rie:

²⁴Ezekiel sola nsila beji atsi dijenga dikaga jiBabylone diuvioyilanga; tsiotsu tsibeji tsiupalila dilongu dimosi; vaga yilimba, yivayi va disogumunu aditolisi o musiengi.

²⁵Gukasola nsila jimosi yiri dibadi diBabylone diutola o Rabba aguvu musiengi ubaAmmon na jisusu yiri diutola o Juda no Jerusalem musiengi ukandu.

²⁶Kaga jiBabylone avu va dibaga va disogumunu dimansila meni mabeji uyebuaga mbanda. Amaviunsa mbansa, amawivula bakosi na amakelula mbombu tsibibulu.

²⁷Dubansa dumabaala mandi dumagaanga Jerusalem. Va mbura aji borangiyila bitogulu bidivita ubokisa batu nogamuga mugamu udivita; borangiga bitogulu va biabutsu na bomatisa bikadi, boyeramba mirambu.

²⁸Bisi Jerusalem belabi mbanda yika kulini mu mbari bekelusu na pangini. Tumba kaga jiBabylone ebarangimisi mabi mogu na ebalubusi yiri bogaangu bakoli.

²⁹La dibandu menu aguvu Fumu Nsambi nyivosili rie: Duitangimisingi mabi menu temu tsiotsu. Na nsimbulu tsienu na bifu bienu bibi duikevega mbela. La dibandu nyuduwakisila muvinitsi.

³⁰Mbe ka ndeʼ sefu jiIsrael guvu mutu mubi. Temu agu jiutola na mukilu udibi diagu diulabana!

³¹Menu aguvu Fumu Nsambi nyivosi rie: Yilimba yibukaga yiuvulu na dugaba dugusulu. Agukesunsa omatusu; agukematisa osundusu.

³²Nyupansa, nyupansa, nyupansa musiengi upansu tindi upansu; tumba digolabana te na durugu dujandi aguvu na musuga utabula bunsonsi, nyumuvaga uonyi.

³³Fumu amavosa rie: Ndeʼ Ezekiel, biga novosa rie: Fumu aguvu Fumu Nsambi nyivosi rie: Mu diambu dibaAmmon na mu diambu diyisonyi yiogu rie: Dijenga, dijenga dimasomunu, dimagungu uyenabokanga nesi uyenasielasana nesi uyenavembula kagala!

³⁴Ava duikipili yika biriariamu bikulini na mbigulu tsienu tsimfurulu dijenga diuduboka va mosi na batu babi. Temu jimatola na mukilu udibi diogu ulabana.

³⁵Gabusanu majenga menu mu bisupu. Nyudutabulila bunsonsi vana mbura aji dumasundulu o bulongu abu dumaburulu.

³⁶Nyuduwitila kabu ami, nyudulutsila muji ufuiri ami na nyuduwakisa ombu bango bukanyi abejabi ubunga.

³⁷Dusielusunu na muji; malungu menu mowitama mu bulongu. Mbana batu bagomuedurangimina. Mu mbari menu Fumu nyimaditubula.