Read Punu Ezekiel 22 Bible Online

Ezekiel 22 - Punu bible

Ezekiel 22

¹Fumu amansingula rie:

²Ndeʼ muana mutu gukatabulila Jerusalem, musiengi umalungu bunsonsi. Gujabisi nsoruru tsiandi tsiotsu!

³Gukavosa rie: Menu Fumu Nsambi nyivosi rie: Musiengi aguiwitilingi malungu muna, temu jimukilu jiutola, musiengi aguivayi bakosi ukebivisa!

⁴Mbela jimalungu ama gumawitila jivu va julu muru agu na gumakebivisa na bakosi bagu aba gumavaga. Anana gugufisila bilumbu biagu na gumatola va disukusulu dibilima biagu. La dibandu nyugusingisila ulasu yisonyi va misu mabatu botsu na gudesungu wandi.

⁵Jogu abavu bebeli nesi jogu abavu vala bogudesanga, diduma dimagutsiemuga.

⁶Barumitsi botsu baIsrael abetsani nagu beviosulili musuga ogu noyenawitilanga malungu.

⁷Belensi nesi bataji na banguji bogu na belasi benyi maguga na bekambisi bisiana na bakuili.

⁸Belensi Mbura Nsambi nabesumuni yilumbu yiami yiuvuma.

⁹Ombu gagu uvu bafuengilitsi abeyenawitilanga malungu; beyenajanganga o julu tsimikongu; na beyenavayila bukongu.

¹⁰Ombu gagu befubinini bitsiga na bagatsi babataji bogu na bevayili kulini na bagetu va temu tsiogu tsitsungi.

¹¹Ombu gagu mutu mosi ekevayingi nsoruru na mugatsi umutu nandi; mutu ususu evayi nsoruru na mugatsi muana andi; mutu ususu ebivisi yibusi yiandi aguvu muana mugetu utaji andi.

¹²Menu aguvu Fumu Nsambi nyivosi rie: Ombu gagu batu befutulu uyenawitilanga malungu; ombu gagu uvu abesingi mbika; na dikasi bevuli batu nogu. Bendibini tindi ulibana, adina nyilabi.

¹³Guluanu jenu bisi Jerusalem nyisiyi masuku mu diambu dindiongulu tsienu nesi dimalungu ama dumawitila.

¹⁴Duba sikiri na duba na mangolu mawelimina ava nyudulasila mangolu mami? Menu Fumu nyimavosa, adina nyuvaga.

¹⁵Nyudupansa o malongu na nyudutsiemusa o biari bisusu na nyutsiemusa muinsi enu.

¹⁶Jenu beni dukesundusa va gusu bisi malongu, mbana dujaba yiri menu nyivu Fumu.

¹⁷Mbana Fumu amabuela rie:

¹⁸Ezekiel baIsrael bavu nderi mambi malora; jogu botsu bavu nderi kunga nesi mikoka nesi budilu nesi yiumbu mu yipitsulu; bavu mambi malora jivema.

¹⁹La dibandu menu aguvu Fumu Nsambi nyivosili rie: Jenu botsu duvu nderi mambi malora, kabogu nyudugukiga o Jerusalem.

²⁰Nana begukiyili lora jivema nesi kunga nesi budilu nesi yiumbu na mikoka mu dikuba na besayisi duba ubisulumusa anana nyudugukiyila na kabu ami nesi fuiri ami na nyudupodula muna udusielasana.

²¹Nyudugukiga o Jerusalem na nyuduvotsa punga jimuji ajivu kabu ami ajiudusielasana.

²²Nana lora jivema jisulumusu o dikuba anana jenu dusielusunu muna; mbana dujaba yiri menu Fumu nyimaduwitila fuiri ami.

²³Fumu amabuela rie:

²⁴Ezekiel, tsingula baIsrael rie: Bulongu buogu buvu nderi butamba abugenogulu mfula na mu yilumbu yikabu ami buba nderi dukanga.

²⁵Babiyitsi bamamutungila fundu; nana yimbungu yigumbili uvopula ayi yiuji dedi mosi jogu begaangi babaala na bebialili busina na bima bidufunu duneni; bakuili bofunanga.

²⁶Bavagulitsi bapagu besumuni migaga na belensi mbura tsiami tsiyingitsi. Bagevayi duviakusunu va gari abivu bunsambi na abivu nsoruru nesi va gari abivu muinsi na abivu bilioma. Bagekipi yilumbu yiami yiuvuma na nyimalensu va gari ogu.

²⁷Basefu bavu nderi baminsi abevopuli abi boji; bewitili malungu na beboki batu udila biogu.

²⁸Babiyitsi beni bamabavaga nderi jogu abevayi dunduyi; na biriariamu bikulini na mbigulu tsimlurulu bevosi rie: Fumu aguvu Fumu amavosa! Diuleba tsiri menu agumavosa nogu.

²⁹Bisi dilongu bamakevega ulasanga dikasi noyenadaganga nesi ukambisa abamakambulu nesi bijaga nopatula benyi musuga ogu.

³⁰Nyimaromba dibaala va gari ogu umuerunga yivaga noretsama va gusu ami udibiyila bisi dilongi diviogulu yiri ngobabunga; tumba nyisamalaba mutu.

³¹Menu aguvu Fumu Nsambi nyivosi rie: Nyubawitilila fuiri ami na nyubasielasana na muji ukabu ami, bonangula mbela jimabi mogu.