Read Punu Ezekiel 24 Bible Online

Ezekiel 24 - Punu bible

Ezekiel 24

¹Mu yilima yimufu mu yilumbu yimugumi yitsungi jimugumi jibukoli buetu, Fumu amansingula rie:

²Muana mutu sona yilumbu yieyiyi mu mbari yivu yilumbu ayi Kaga jiBabylone ewendi o Jerusalem.

³Buayila mukuta eni umimbini nongu novosa rie: Fumu amatuma ugutsingula rie: Religa mbiji nowitila mamba muna.

⁴Podula mapula muna mapula motsu amaboti na binama binsima na bigusu; jibasi na bivisi abiboti.

⁵Sola yindombu yiboti mu mugamba dukasana mikansu o tsi mbiji yilambi tindi ulamba te na bivisi biuvi tindi uvi.

⁶La dibandu menu aguvu Fumu nyivosili rie: Ka muna maguga ma o musiengi umalungu. Mbiji jivu maali na maali, maali meni magegusuyi muna, via! Fula mapula dimosi dimosi, guyasola.

⁷Malungu ama gumawitila mavu muna; mamawitulu va julu dimanyi, butamba busamamakamusa, mutu asamamakubiga difufundu.

⁸Nyusila malungu va julu dimanyi magodibugu, via udugusu kabu ami nesi pila ami.

⁹La dibandu menu aguvu Fumu nyivosili rie: Ka muna malungu ma mavu o musiengi umalungu! Meʼ wami nyuvaga diguki dineni dimikansu.

¹⁰Gukiga mikansu, bangisa muji, lamba nyama, kuka musayi puga muembu te na bivisi biunyenga.

¹¹Mbana sunsa mbiji jipavula va julu magala mamuji yirijiugumuga na kunga jiulula na muinsi usulumuga na maali mosiegalana.

¹²Kulini nyimasalila! Maali amamabasa muna magogusuga, maali mogusuga yika na muji.

¹³Jerusalem gumakebivisa na buvuyisa buagu. Nyimaronda uguliomisa tumba gusamagaru kabogu muinsi agu ugomueliomusu te na kabu ami jiusaguga.

¹⁴Menu aguvu Fumu nyivosi rie: Adi nyimavosa diulabana na nyudidugusu; ngogabuga mansinsima; ngolasa yingebana ngovinsa kingu. Bogutabulila bunsonsi buwelimina na bifu biagu nesi na bisalu biagu. Menu Fumu Nsambi nyidivosi.

¹⁵Fumu amansingula rie:

¹⁶Ezekiel, nyusundila ubokisa agu guirondi. Guyatata na guyalila via, guyapalisa ne matsanga.

¹⁷Tsukama o musuega, guyanyonganga abamafu. Duara yiviovi yiagu nesi bapondu bagu nana na kala. Guyafuga mimfiemfi miagu na guyaji biguji bibukuili.

¹⁸Kedi nyimavosa na batu, mugatsi ami amafu. Ava kedi jisusu nyimavaga adi Fumu amatuma.

¹⁹Batu bamakwivula rie: Dibandu yi gugelili?

²⁰Nyimabawaka rie: Fumu amansingula rie:

²¹Tsingula baIsrael rie: Menu aguvu Fumu Nsambi nyivosi rie: Nyusingisa Mbura ami ulensu, Mbura ajimadurombisa ukematisa, aji dumaronda tindi uronda. Baana benu baba-baala na babagetu aba dumasila o Jerusalem boboku na dijenga.

²²Kabogu duvaga nana Ezekiel amavayila. Duyafuga mimfiemfi mienu na duyaji biguji bibukuili.

²³Dukaduara biviovi bienu na bapondu benu, duyatata ria duyalila. Tumba dugasa tindi ugasa mu diambu dimabi menu na mutu mutu otsukama mu diambu dimabi mamutu nandi.

²⁴Dukavaga dedi nana Ezekiel amavayila ava mambu meni molabinina. Mbana dujaba yiri menu nyivu Fumu Nsambi.

²⁵Mbana Fumu amansingula rie: Ndeʼ Ezekiel nyubagusulila Mbura ami ajimabaveyi mangolu nesi nsangu nesi bundumba nesi dunangu nesi ditasa. Nyubapatula baana bogu bababaala na babagetu.

²⁶Muna yilumbu yieni murinitsi oruga ombu gagu uyigutsingula misamu.

²⁷Muna yilumbu yieni gugomueba dibaba; guvosa na murinitsi. Ndeʼ guba yilimba ombu batu bami mbana bojaba yiri menu nyivu Fumu.