Read Punu Ezekiel 25 Bible Online

Ezekiel 25 - Punu bible

Ezekiel 25

¹Fumu amansingula rie:

²Ezekiel, gegila o yiari yibaAmmon nobaloga!

³Gukabatsingula rie: Guluanu ama menu Fumu Nsambi nyivosi rie: Mu mbari gumavosa rie: Vagaa diambu mu temu Mbura ami jimalensu nesi ava bulongu buIsrael bumabungulu nesi ava baJuda bamabegulu bakoli,

⁴la dibandu nyuduwakisila ombu bisi yiari ayi wisi epalili; bodutsiengisa milaku mogu, avana botsaninanga; bojanganga milunda mienu na bonuanganga dile dienu.

⁵Nyuvaga Rabba mbura ukelisila basamo na nyuvaga bulongu bubaAmmon mbura ukelisila bindombu. Mbana dujaba yiri menu nyivuFumu.

⁶Menu aguvu Fumu Nsambi nyivosi rie: Dumasiga tsambi na dumadumuga na nsangu mu diambu dipurulu tsibaIsrael. Anana dumalasila dilensa dienu nesi divina dienu ombu batu bami.

⁷Guluanu, nyudulasa mangolu mami na nyuduwakisa ombu bisi malongu; nyudubokisa va misu mabatu, nyudugusula mu dutalu dumalongu na nyudubunga. Mbana dujaba yiri menu nyivu Fumu.

⁸Menu aguvu Fumu Nsambi nyivosi rie: Bisi Moab bamavosa rie: Labatianu baJuda bavu nana bisi malongu motsu!

⁹Mu dionyi nyudibula mandilu maMoab o yiari yimisiengi. Amimabambana na mandilu, nesi amivu tindi miboti: Bet-Yechimot na Baal-Meon na Quiriataim.

¹⁰Nyusingisa bisi yiari ayi wisi epalili upatula Moab nana bamapatulila Ammon; o gusu bagomuerangimina Moab.

¹¹Nyutabulila bisi Moab bunsonsi buami mbana bojaba yiri menu nyivu Fumu.

¹²Menu aguvu Fumu Nsambi nyivosi rie: Bisi Edom bamakevega ugabusila baJuda pila; bana mbela mu dionyi.

¹³Menu aguvu Fumu Nsambi nyulasa Edom mangolu mami, nyubokisa babaala na bibulu; nyubuvaga mbura atsigaa na mamba ubandila o Teman te no Dedan; jogu botsu boboku na divita.

¹⁴Nyusingisa baIsrael ugabusila baEdom pila ami. Bobalasa kabu ami na fuiri ami. Menu aguvu Fumu Nsambi oyidivosi.

¹⁵Menu aguvu Fumu Nsambi nyivosi rie: BaPhilistin bamakevega ugabusila pila na bamajivaga na tindi divina.

¹⁶Menu aguvu Fumu Nsambi nyivosi rie: Nyulasa baPhilistin mangolu mami na nyubokisa bisi Kaftor na nyubunga bansialutsu abavu o disimu dimubu.

¹⁷Nyubagabusila tindi pila ava nyubakilisila mbana bojaba yiri menu nyivu Fumu.