Read Punu Ezekiel 26 Bible Online

Ezekiel 26 - Punu bible

Ezekiel 26

¹Mu yilima yiyigumi na yimosi mu yilumbu yitega yitsungi jibukoli buetu, Fumu amansingula rie:

²Ezekiel, bisi Tyr belensi Jerusalem rie: Joʼveʼ musiengi umalongu motsu umapansu! Musiengi agu batu botsu bamawendanga! Yiotsu ayi Jerusalem umasiala mududu tuba na batu bapuela bapuela.

³La dibandu menu aguvu Fumu Nsambi nyivosili rie: Tyr, nyina kueru nagu! Nyugutindila batu bapuela bapuela ugutoyisa; bobanganga nderi mibiji mimubu.

⁴Bopansa bivaga biTyr na borakula mandagu masakama mbana nyubola difufundu; nyugusila dimanyi na dimanyi.

⁵Uba nyinga o gari mubu uwanyiyila bambusa. Ukindu na bisi malongu. Menu Fumu oyidiwarisi. Bisi malongu masusu boyipansa musiengi

⁶nogubunga mbana bojaba yiri menu nyivu Fumu mimbu amamabambana.

⁷Menu aguvu Fumu Nsambi nyivosi rie: Mbe ka ndeʼ Tyr nyubega Nabucodonosor kaga jiBabylone aguvu kaga bakaga o yiari yibanda; oruga na bakabala na makalu na babeyitsi babakabala na bagora bapuela bapuela ugutumuna.

⁸Bobokisa bisi mimbu amibambini; divita diudugunu muna bulongu buagu; ogurambila mirambu na orungila bikadi na ngubu tsiandi tsiugukambisa.

⁹Bobula bivaga biagu na bitogulu biogu na borakula mandagu masakama na mumbi.

¹⁰Bakabala bogu bapuela bapuela bogukubiga difufundu; bivaga biukunga na nduku jibabeyitsi babakabala na makulu madugongula na makalu ava bokotila va biabutsu biagu dedi mosi nana bekotili o musiengi agumabetsu.

¹¹Botsiarila mansila magu motsu na birodi bibakabala bogu; bobokisa batu bagu na dijenga; birangumunu biagu abigurombisa dunangu biuberuga.

¹²Bodaga busina buagu; bobula bivaga biagu na borakula mandagu magu mabukaga na bobuaga mamanyi na miri na difufundu o mubu.

¹³Nyugubitsa nyimbu tsiagu na bagomuegulu mufi mabasambi bagu.

¹⁴Nyugusila yika dimanyi na dimanyi na uba yika mbura aji bewanyiyili bambusa; ugomuerungululu. Menu Fumu Nsambi nyimadivosa.

¹⁵Menu aguvu Fumu Nsambi nyitsinguli Tyr rie: Nesi banyingi boregama na nduku jidubungu duagu ava abamanemusu bebimini.

¹⁶Bakaga botsu basunduga mu bitsiga biogu bibufumu; bovula bijungi biogu nesi biduaru biogu biboti; bobasu na goma te na botsana va tsi; bogaangungu na dusiensi na bobakama mirima mu diambu diagu.

¹⁷Bogutatila mitatu na bowimbila duimbu duedudu rie: Ka muna diambu di! Umabungu, ndeʼ agumabasa de na jogu abelingingi mu makumbi mamubu, musiengi ubundumba agumaba na tindi mangolu o mubu! Musiengi umabungu na batu bandi botsu, umalasanga goma ombu jogu abamatsananga yiari na yiari!

¹⁸Namunyi banyingi uregama bereyim i mu diambu didubungu duagu, banyingi bamubu bereyimini mu diambu didisukusulu diagu.

¹⁹Menu aguvu Fumu nyivosi rie: Nyuguvaga musiengi agusiala mududu, musiengi agusaa na batu; nyugubasila bileka bimbengi te na nyidu jiugudiamisa.

²⁰Nyugubuaga va mosi na jogu abamasunduga o mbengi nesi ombu jogu abamareyila; nyugukotisa o tsi butamba o mbura jibupinsa bebeli na jogu abamasunduga o mbengi yiri ugomuetsanunu; na nyugabila bundumba buami ombu basusu.

²¹Menu aguvu Fumu nyivosi rie: Nyugubunga tindi ubunga te na gutsiemuga; boguromba na bagomuegulaba, via. Menu aguvu Fumu Nsambi oyidivosi.