Read Punu Ezekiel 27 Bible Online

Ezekiel 27 - Punu bible

Ezekiel 27

¹Fumu amansingula rie:

²Ndeʼ muana mutu, wimbilila Tyr duimbu dumunyongu!

³Gukatsingula Tyr rie: Aa ndeʼ aguvu utsana va mugula mubu utiganga muteti na bisi banyingi bapuela bapuela! Menu aguvu Fumu Nsambi nyivosi rie: Tyr ndeʼ gumavosanga rie: Menu nyivu tindi muboti!

⁴Dilongu diagu divu va mugula mubu; Barungitsi bagu bamagubuejisa tindi ubuejisa.

⁵Na tsimbi tsisipara tsiSenir bamagomina dikumbi diagu; bamasalisa musedera uLiban ugureliyila dikutu didikuku;

⁶bamavala kafi tsiagu na musena uBasan na bangu tsiagu tsimavagu na pungi atsimanamugu musedera.

⁷Matsanda malina maEgypte mamamaruku mamasalusu makuku magu. Matsanda madumbulu na yinyuru ayivu va gari ubenga na dumbulu manyingi Chypre mamagudibiga nyangu.

⁸Bisi Sidon na bisi Arvad bamaba baduyitsi bagu. Aa Tyr, batu bagu badiela bamaba babeyitsi bagu.

⁹Bivunda biByblos na tindi basalitsi bandi bamagusalila uyelonda maluta magu. Makumbi motsu mamubu na babeyitsi bogu bamaruga ombu gagu uyesopana madila magu.

¹⁰Bisi Perse na bisi Loud na bisi Pout bamaba bagora bagu. Bamaba batoyitsi bamavita, ombu gagu bamavakiga ngubu tsiogu na bisiemba. Ka muna bundumba bu bamagulasa.

¹¹Babaala baArvad na bangogaga bagu bamaba va julu tsibivaga biagu na babaala baGammad bamakelisanga ndombili tsiagu; bamavakiga ngubu tsiogu mu bivaga biagu biotsu; bamadugusu kembu agu.

¹²Bisi Tarsis bamatiganga muteti nagu mu diambu dibima bipuela bipuela abimaba nagu; nesi bilora jivema nesi bimadilu nesi bimikoka nesi biyiumbu; bamatiganga muteti o makasa magu.

¹³Bisi Grace na bisi Toubal na bisi Mechek bamatiganga muteti nagu; bamaveganga baviga na bisalulu bikunga usopana na madila mogu.

¹⁴Bisi Bet-Togarma bamatiganga muteti o makasa magu na bakabala na babeyitsi babakabala na baburu.

¹⁵Bisi Bedan bamatiganga muteti nagu; muteti unyingi tsipuela umabanganga o makasa magu; bamagufutanga na masiyi na bapungi na bivila.

¹⁶Bisi Edom bamatiganga muteti nagu mu diambu dimagumba magu diemaroda na dimatsanda mayinyuru ayivu va gari dumbulu na ubenga nesi dikorayi nesi dirubi; bamatiganga muteti o makasa magu.

¹⁷BaJuda na baIsrael bamatiganga muteti nagu; bamaveganga ble tsiMinnit na mapa mageyi na buji na matsi na bilongu usopana na mandilu magu.

¹⁸Bisi Damas bamatiganga muteti nagu mu diambu dimagumba magu nesi mu diambu dibima bipuela bipuela abimaba nagu; bamagurombilanga malamu maHelbon na mionyi mivema mibindombu biSahar.

¹⁹Bisi Dan na bisi Yavan ubandila o yiari yiouzal bamayesumbisanga madilu na bima bimbunga jiboti bimunongu na munongu o makasa magu, bamayesopananga nagu.

²⁰Bisi Dedan bamatiganga muteti nagu umamfunga mabakabala.

²¹Bisi Arabie na bakaga baQuedar bamatiganga muteti nagu na bamasumbisanga baana babindombu na balumi babindombu na babinsabi.

²²Batiyitsi bamuteti baSaba na baRagma bamatiganga muteti nagu bamatindanga bima biotsu bimbunga jiboti, nesi mamanyi mamunongu na munongu madufunu duneni namalora; bamatiganga muteti o makasa magu.

²³Bisi Haran na bisi Kanne na bisi Eden na batiyitsi bamuteti baSaba na baAssour na bisi Kilmad bamatiganga muteti nagu;

²⁴bamatiganga muteti nagu bamabe-ganga bima biboti nesi bijungi bidumbulu nesi abimamaruku nesi matsanda maboti amamaba mu bigara amamatungu na mikudu.

²⁵Makumbi maTarsis mamalinganga mu diambu dimuteti agu; busina buotsu bumaba nagu nesi bundumba wandi va mugula mubu.

²⁶Baduyitsi bagu bamagulinsa mu mubu; punga jiyiari ayi wisi epalili jimagutsungula o gari mubu.

²⁷Busina buagu na makasa magu na madila magu na basalitsi bagu na babeyitsi bagu na abelondi maluta magu na abekipi muteti agu na batoyitsi bagu bamavita na batu bapuela bapuela bofu o gari mubu mu yilumbu yidubungu.

²⁸Ava babeyitsi bagu bamakumbi bogamuyila, bisi yiari na yiari boregama.

²⁹Botsu abeduyi bosunduga mu makumbi; basalitsi na babeyitsi botsu boretsama va disimu;

³⁰bogamuga nolilanga, gulu migamu miogu bogolana difufundu te no miuru miogu na bogolana dibufu;

³¹bofuga maviolu mu diambu diagu; boduara basiela na bogulilanga na munyongu uneni, tindi munyongu.

³²Na munyongu boguwimbilila duimbu dumanyonyi rie: Anyi amaba dedi na Tyr? Anyi amaba dedi na musiengi egugu agumapansu o gari mubu?

³³Ava digumba diagu dimasabuyila mubu ndeʼ gumagukurusu batu bapuela na bima biagu bipuela nesi madila magu na gumaroyisa busina bubakaga.

³⁴Tumba gumapansu na mubu gumadiama o tsi mamba, madila magu na biagu biotsu bimadiama va mosi nagu.

³⁵Bisi banyingi bekambulu mu diambu diagu bakaga bogu bamagaangu na goma, mirima miogu yika bakaka.

³⁶Batiyitsi bamuteti usimina begusimini; ndeʼ gumadesungu gugomueyitsu, via!