Read Punu Ezekiel 28 Bible Online

Ezekiel 28 - Punu bible

Ezekiel 28

¹Fumu amansingula rie:

²Muana mutu, tsingula kaga jiTyr rie: Menu agu vu Fumu Nsambi nyivosi rie: Guna dunangu na gumavosa rie: Nyiji Nsambi, nyivu nyitsana va yitsiga yiNsambi ayimatsiengulu mubu! Ndeʼ guvu mutu, gugaa Nsambi. Guikelabi nderi duganu duagu duvu duNsambi.

³Gulu, ndeʼ guiketasila uviolila Daniel diela, ne diambu dimosi digogusuegu;

⁴na diela diagu na dujabu duagu gumakedilila busina, gumagukiga lora na lora jivema mu bilundulu biagu.

⁵Na diela diagu dineni na muteti agu gumafunisa busina buagu; busina buagu bumagurombisa dunangu.

⁶La dibandu Menu aguvu Fumu Nsambi nyivosi rie: Gumakelaba dedi na Nsambi.

⁷La dibandu nyusindiyila benyi uyigutoyisa; benyi abavu na tindi dikasi. Boyenabunga abi gumasala na diela diagu; bofutila kembu agu mateji.

⁸Bogutsudiga o yiduna na gufu dodi mosi nana jogu abefuangingi o mubu.

⁹Va misu mayikongu yiagu gumuetasa rie: Menu nyivu nsambi? Ngeba ndejua gugoba nsambi va misi mababokitsi bagu.

¹⁰Gufu dedi mosi nana abasarebu; batu bangana boguboka. Menu aguvu Fumu Nsambi oyidivosi.

¹¹Fumu amansingula rie:

¹²Ezekiel, wimbilila kaga jiTyr duimbu dumanyonyi! Gukamutsingula rie: Menu aguvu Fumu Nsambi nyivosi rie: Ndeʼ gumaba uwelimina mu motsu; gumaba na diela dineni na gumaba na tindi kembu.

¹³Gumatsana o Eden nungi Nsambi; ndeʼ gumaba ubasa de na minongu miotsu mimamanyi madufunu duneni: sarduana na topasa na diama na dusiengi na onikisa na jaspa na safira na eskabukala na emaroda nesi lora; bisalu bibandungu bagu na mambika magu bimaba nagu ava gumasundulu.

¹⁴Gumaba nderi yiansa ayisueyi o tsi mapapi amamasambu; nyimaguviosa na ndeʼ gumaba va julu mukongu uNsambi; gumalinganga va gari mamanyi amamakadamanga.

¹⁵Gumaba usungama mu bifu biagu biotsu ubanda na yilumbu ayi gumasundu te na mabi mamagugaanga.

¹⁶Na buneni bumuteti agu gumabasa na dikasi na gumavaga masumu kabogu nyigubuayi o banda mukongu uNsambi. Nyuguvaga yika mua mutu. Yiansa ayigukelisi yiugubinga va gari mamanyi amekadimi.

¹⁷Gumabasa na dunangu mu diambu dikembu agu; gumabivisa diela na ukedunsa uagu. La dibandu nyigubuayi va tsi: na nyudivaga va gusu bakaga basusu yiri bogulaba.

¹⁸Mu diambu dimabi magu mapuela mapuela nesi dindiongulu tsiagu tsimuteti gumasumuna mbura tsiduyitsu. La dibandu nyipalisili muji usielasana musiengi, nyigukalusi dibufu va misu mabotsu abegugengili.

¹⁹Jogu botsu abegujabi bamakambulu na gumadesungu; gugomueyitsu, via!

²⁰Fumu amansingula rie:

²¹Ezekiel, gengila o yiari yiSidon, gukaguloga!

²²Guakavosa rie: Menu aguvu Fumu Nsambi nyivosi rie: Bisi Sidon nyina kuem nenu! Nyulasa bundumba buami va gari enu; mbana bojaba yiri menu nyivu Fumu ava nyubatabulila bunsonsi buami na ava ny ulasila bunsambi buami va gari enu.

²³Nyutinda yivunga va gari enu; nyuwitila malungu mu mansila menu; bamfumbi boba layini muna, jogu abamayenabokungu na dijenga. Mbana bojaba yiri menu nyivu Fumu.

²⁴Fumu jandi rie: Ombu baIsrael bagomue-ba yifundi utsoka nesi matsiendi unemisa; va gari jogu botsu abebatsiengili nesi abebalensi. Mbana bojaba yiri menu Nsambi nyivu Fumu.

²⁵Menu aguvu Fumu Nsambi nyivosi rie: Umagukiga baIsrael va gari malongu ama jogu bamapansiyila; nyulasa bunsambi buami ombu bisi malongu mbana botsananga o bulongu buogu abu nyimavega ombu musalitsi ami Jacob.

²⁶Botsananga muna sui; borungisanga mandagu na bovarisanga manungi. Botsananga muna sui ava nyutabulila jogu abebatsiengili bunsonsi nesi abebalensi. Mbana bojaba yiri menu nyivu Fumu.