Read Punu Ezekiel 29 Bible Online

Ezekiel 29 - Punu bible

Ezekiel 29

¹Wilima yimugumi mu yilumbu yiyigumi na bibeji bitsungi jimugumi bibukoli buetu Fumu amansingula rie:

²Ndeʼ muana mutu, gengila o yiari yiPharaon kaga jiEgypte; mubiyili na biyila Egypte jiotsu!

³Batsinguli mambu memama rie: Menu aguvu Fumu Nsambi nyivosi rie: Pharaon, kaga jiEgypte, nyina kueru nagu; ndeʼ aguvu nderi mukuimbi nyoga aguisilimi muna mujamba uNil na guivosi rie: Mujamba aguami, meʼ beni nyimaguvaga!

⁴Nyugukobiga mulunga mu mibaka miagu na nyutunga banyama bamamba mu magagala magu mbana nyugusa-bula muna Nil na banyama botsu bamamba abavu batungu muna magagala magu.

⁵Nyugubuaga o mbura atsigaa na mamba; jenu na banyama bamamba. Guberuga o musiru; gugosimbuga na gugobolu; bibulu na batsoli bogujanganga.

⁶Mbana bisi Egypte botsu bojaba yiri menu nyivu Fumu. BaIsrael bamagugengila; jogu bamagulaba nderi dupangu tumba dupangu dumaba dudeda.

⁷Ava bamadugaangila, dumakenyangula te na dumabavotsa miogu; ava bamadusikila dumakenyangula te na dumabareyimisa maguma.

⁸La dibandu menu aguvu Fumu Nsambi nyivosili rie: Nyugutindila bagora na bobokisa batu bagu botsu na bibulu biagu biotsu.

⁹Bulongu buEgypte bukaluga mududu na mamba mokamuga. Mbana bojaba yiri menu nyivu Fumu. Gumavosa rie: Mujamba aguami na meʼ beni nyimaguvaga.

¹⁰La dibandu nyina kueru nagu, nesi mijamba miagu; nyukamusa mamba motsu o bulongu buEgypte na busiala mududu ubandila o Migdol te no Assouan nesi te no mandilu maEthiopie.

¹¹Ne mutu mosi agovioga muna nesi yibulu; busiala mududu te na magumana mabilima.

¹²Nyusila bulongu buEgypte mududu va gari malongu masusu amamabungu na nyusila misiengi miandi mududu; mududu agusakalabana o misiengi misusu amimabungu, te na magumana mabilima. Nyupansa bisi Egypte o malongu masusu; nyubapansa o malongu mapuela.

¹³Menu aguvu Fumu Nsambi nyivosi rie: Magumana mabilima manosuka nyumuegukiga bisi Egypte o malongu ama bamapansu.

¹⁴Nyugabusa bakoli baEgypte; nyubagabusa o bulongu buPatros o tindi bulongu buogu: boba bufumu budeda.

¹⁵Buba tindi bufumu bugeyi na bugomueruma malongu masusu; nyubageyisa yiri bagomueruma malongu.

¹⁶BaIsrael bagomuevayila bufumu bueni yitu; baIsrael borangiminanga mabi mogu ava bobugengililanga. Mbana bojaba yiri menu nyivu Fumu.

¹⁷Mu yilima yimagumabeji na yisambuali mu yilumbu yitega yitsungi jitega yibukoli buetu Fumu amansingula rie:

¹⁸Ezekiel, Nabucodonosor kaga jiBabylone amaruma bagora bandi usalila Tyr yisalu yineni; miuru miotsu yika mavenda na mavenda, masambaka motsu yika usotuga; ne nana bisi Tyr basamafutila bagora bandi bisalu abi bamabasalila.

¹⁹La dibandu menu aguvu Fumu Nsambi nyivosili rie: Nyiveyi Nabucodonosor kaga jiBabylone bulongu buEgypte; obonga busina abuvu muna, obonga abimakindu bimunongu na munongu, abina biuba futa jibagora bandi.

²⁰Biuba dufunu duyisalu ayi amasalila Tyr, nyimuveyi bulongu buEgypte. Menu aguvu Fumu Nsambi oyidivosi.

²¹Muna yilumbu yieni nyuvega mangolu ombu baIsrael. Mbe ka ndeʼ Ezekiel nyuguvega musuga uvosa nogu mbana bojaba yiri menu nyivu Fumu.