Read Punu Ezekiel 30 Bible Online

Ezekiel 30 - Punu bible

Ezekiel 30

¹Tumu amansingula rie:

²Ndeʼ muana mutu, biga novosa rie: Menu aguvu Fumu Nsambi nyivosi rie: Lilanu! Ka muna yilumbu yi yiruyi!

³Mu mbari yilumbu yika bebeli, yilumbu yiFumu yika bebeli, yilumbu ayi Fumu olasa kabu andi, yiuba yilumbu yipisama. Yiuba yilumbu ayi malongu motabululu bunsonsi.

⁴Divita diulabana o Egypte, dunsiensi duba o Ethiopie. Bisi Egypte bopatulu busina buogu, bamfumbi bogu bosiala layini na bulongu buogu bubungu.

⁵Babaala baEthiopie na baPout na baLoud na baArabie jiotsu na baLibye na bisi malongu amamabambana boboku o divita va mosi nogu.

⁶Menu Fumu nyivosi rie: Ngensa, abewarisi Egypte boberuga na dunangu dumangolu mandi dubungana; ubandila o Migdol te no Assouan boboku o divita. Menu aguvu Fumu Nsambi oyidivosi.

⁷Bulongu bubungu tindi ubungu na misiengi mibuonyi miuba mu dutalu dumisiengi amimasiala mududu.

⁸Nyunyensa Egypte na bawarisitsi bandi botsu botsungugu; mbana bojaba yiri menu nyivu Fumu.

⁹Muna yilumbu yieni bilumbi biami biuwenda mu makumbi mamamba uyepupisa Ethiopie aguvu sui; goma jiubagaanga dedi mosi nana jimagaangila Egypte. Dingensa yilumbu yieni uruga yiruyi!

¹⁰Menu aguvu Fumu Nsambi nyivosi rie: Nyutsiemusa bapuela bapuela baEgypte ava nyusalisila Nabucodonosor kaga jiBabylone.

¹¹Jandi na batu bandi abavu na tindi dikasi va gari batu botindu uyebunga bulongu; bosalisa majenga o Egypte te na bulongu buba yika bamfumbi na bamfumbi.

¹²Nyukamusa Nil; nyuwakisa bulongu ombu batu babi; nyusalisa benyi ubunga bulongu na biotsu abivu muna. Menu Fumu oyidivosi.

¹³Menu aguvu Fumu Nsambi nyivosi rie: Nyubunga bakosi notsiemusa bansambi bangana baMemphis; vagomueba kaga o bulongu buEgypte na nyureyimisa bulongu buotsu.

¹⁴Nyubunga Patros; nyunyensa Soan na nyudugusu bunsonsi buami o No.

¹⁵Nyulasa kabu ami o Sin aguvu mangolu maEgypte na nyubokisa bisi No bapuela.

¹⁶Nyunyensa Egypte nobubasa na malungu; Sin ubasu na goma; No utobu diluta na musiengi ubasa nyidu.

¹⁷Bafudu baOn na baPi-Beset boboku o divita na bisi misiengi mieni bobegu bakoli.

¹⁸O Tapanes nyangu jiukaluga pisama ava nyubogulila yilala yimuisi Egypte, na dunangu dumangolu mandi dusuka; dimungi diugukubiga na abandi bobegu bakoli.

¹⁹Nyutabulila Egypte bunsonsi buami mbana bojaba yiri menu nyivu Fumu.

²⁰Mu yilima yiyigumi na yimosi mu yilumbu yimusambuali yitsungi jitega yibukoli buetu Fumu amansingula rie:

²¹Ezekiel, nyimatabula gogu uPharaon kaga jiEgypte. Mutu asamamubuga umubelusa; mutu asamamutunga banda yiri omuewara nogaanga dijenga.

²²La dibandu menu aguvu Fumu Nsambi nyivosili rie: Nyina kueru na Pharaon kaga jiEgypte na nyumutabula miogu miotsu, diwendi rie: tsiri yika agumaketabuyila tumba aguvu polu wandi; dijenga diandi diubonduga.

²³Nyupansa bisi Egypte o malongu mangana.

²⁴Nyuwarisa miogu mikaga jiBabylone nyumuwakisa dijenga diami; nyutabula miogu miPharaon; obimanga va gusu muvuyitsi andi.

²⁵Nyuwarisa miogu mikaga jiBabylone na miogu miPharaon miuba volongu. Nyuwakisila dijenga diami ombu kaga jiBabylone na odisalisa o dilongu diEgypte. Mbana botsu bojaba yiri menu nyivu Fumu.

²⁶Nyupansa bisi Egypte o malongu mangana mbana bojaba yiri menu nyivu Fumu.