Read Punu Ezekiel 31 Bible Online

Ezekiel 31 - Punu bible

Ezekiel 31

¹Mu yilima yiyigumi na yimosi mu yilumbu yitega yitsungi jimurieru yibukoli buetu Fumu amansingula rie:

²Ezekiel, wivula Pharaon kaga jiEgypte na batu bandi bapuela bapuela rie: Na nyi guibagunu ndeʼ aguvu na tindi mangolu?

³Guibagunu na musedera uLiban; agu bitayi bivu biboti, abivu na mafunda, musedera aguvu usakama, tsaganyi tsi-uonyi tsimaduku mamungi.

⁴Mfula jimatsibendisa. Mijamba mimatsineyisa, mamba mamagukama va ngansi, mbana baana bamijamba bamavindama uyenatsatsanga miri miotsu.

⁵Kabogu yibibili yi-uonyi yimaviolila miri miotsu usakama na bitayi bimafunanga na bimawalanga:

⁶batsoli botsu bamarunganga muva muna bitayi bi-uonyi, bibulu biotsu bimaburilanga va pugulu tsi-uonyi, bisi malongu bapuela bamatsananga o tsi yivosi yi-uonyi.

⁷Umaba muiri ukembu nesi mu yirela nesi mu bitayi; mu mbari ngansi tsimalava te no mamba mapuela.

⁸Onungi Nsambi usamaba musedera ususu dedi na uonyi, ne musipara usamaba dedi na bitayi bi-uonyi, ne mupalata usamaba na magaji dedi na magaji ma-uonyi; ne muiri umosi usamaba ha kembu jiwelimina na uonyi.

⁹Nyimagubuejisa na bitayi bipuela te na miri miotsu miEden mimaguwava.

¹⁰Guluanu adi menu aguvu Fumu Nsambi nyivosi rie: Musedera umanega; umaduku te no mamungi; umaba tindi na dunangu.

¹¹La dibandu nyimaguwakisila ombu ngogaga jimalongu aguguvayila dedi na dikasi diandi; nyimagubinga mu diambu dimabi mandi.

¹²Batu bangana abavu na tindi dikasi bamagudimba nabamagubuaga. Bitayi bi-uonyi bima-bonduga o mikongu nobibususu. Bisi malongu motsu bamagusuega o tsi yivosi yi-uonyi na bamarina.

¹³Batsoli bamayetsananga va tsiensu tsi-uonyi na bibulu biotsu bimusiru bama-yevaga yisuemunu yiogu va pugulu tsi-uonyi.

¹⁴Adina dimalabana yiri miri miotsu amivu va migula mimijamba migomuekedukusu mamungi na migomueba na dunangu duyirela mu mbari miotsu yika ufu mifu dedi na batu, botsu botsiemuga o tsi butamba noyetsana na jogu abamavindama o mbengi.

¹⁵Guluanu adi menu aguvu Fumu Nsambi nyivosi rie: Yilumbu ayi musedera umasunduyila o mbura jiabafu nyimarombisa batu ulilanga na nyimakamusa mijamba; nesi mijamba mineni mimakamuga; nyimanyongisa Liban mu diambu di-uonyi nesi miri miotsu mimagumuga.

¹⁶Nduku jimudunsu u-uonyi jiureyimisa bisi malongu. Ava nyimagubuayila o mbura jiabafu va mosi na miotsu amimavindama o mbengi; miri miotsu miEden mimavotsu puila na mimadilila mamba o tsi butamba nesi miviolila miLiban; miotsu mimatsatsu.

¹⁷Mionyi wandi mimavindama va mosi na uonyi o mbura jiabafu ombu jogu abamaboku na divita; mionyi mimaba nderi gogu u-uonyi na mimatsananga o tsi yivosi yi-uonyi va gari malongu.

¹⁸Va gari miri miotsu miEden ndeʼ guvu dedi na muiri yi? Ndeʼ gubuagu va mosi na miri miEden o tsi butamba, gusilugu va gari jogu abasamarebu abamaboku na dijenga. Adina Pharaon na batu bandi botsu bolaba. Menu aguvu Fumu Nsambi oyidivosi.