Read Punu Ezekiel 32 Bible Online

Ezekiel 32 - Punu bible

Ezekiel 32

¹Yilima yiyigumi na bibeji mu yilumbu yitega yitsungi jiyigumi na beji mu bukoli buetu Fumu amansingula rie:

²Ndeʼ muana mutu, tuba duimbu dumanyonyi mu diambu diPharaon kaga jiEgypte: Ndeʼ gumaleba nderi muana yimbungu va gari malongu. Gumaba nderi yimbiolu o gari mubu, gumakebuaganga o mijamba miagu gumafuinsana mambu na makulu magu, gumavaganga mingiba.

³Gulu adi Fumu Nsambi evosi rie: Nyugurambila mbusa ami va gari yinombu yibatu na gugaangu.

⁴Nyugusila va disimu, nyugubuaga o musini; batsoli botsu bogubetama na bibulu biotsu biugugukuru.

⁵Nyusila bivisi biagu va julu tsimikongu na nyubasa bibususu na mbunga agu.

⁶Nyutsatsa bulongu abu guitsanini na malungu magu te na mikongu na mbengi tsiubasa.

⁷Ava nyugubokisila nyukibiga julu na nyupindisa bambuelili; nyudibiga wisi na mamungi na tsungi jigomuebatsa muetsa.

⁸Mu diambu diagu nyutsimisila bijalala biotsu bijulu na nyubasa bulongu buagu pisama na pisama. Menu aguvu Fumu Nsambi oyidiwarisi.

⁹Batu bapuela bobakama mirima ava nyubatubulila dubungu duagu; nyudutubulila nesi bisi malongu ama ndeʼ gusamajabanga.

¹⁰Nyukambisa batu bapuela mu diambu diagu; bakaga bogu bobasa na dunsiensi mu diambu diagu ava nyuviunsila dijenga diami va misu mogu; boregamanga temu tsiotsu; mutu mutu mu diambu dimuvumu andi muna yilumbu yidubungu duagu.

¹¹Gulu adi Fumu Nsambi evosi rie: Dibadi dikaga jiBabylone diugugaanga.

¹²Nyuberusa batu bagu bapuela bapuela na dijenga dibangogaga, abavu na tindi dikasi. Bobunga dunangu duEgypte nobokisa batu botsu.

¹³Nyubokisa biruitsi biagu biotsu va mugula uNil. Batu nesi bibulu bagomuefuinsana mamba.

¹⁴Mbana nyusiamuna mijamba miagu na nyukelumusa mamba mamionyi nderi matsi. Menu aguvu Fumu Nsambi oyidiwarisi.

¹⁵Ava nyusilila bulongu buEgypte mududu nyubukinda biotsu abivu muna; nyubokisa botsu abetsani muna. Mbana bojaba yiri menu nyivu Fumu.

¹⁶Aduna duvu duimbu dumanyonyi na boduwimbilanga; banumba bamalongu bowimbilanga duimbu duedudu dumalongu; boduwimbilila Egypte na batu bandi botsu. Menu aguvu Fumu Nsambi oyidivosi.

¹⁷Yilima yiyigumi na bibeji mu yilumbu yiyigumi na biranu bibukoli buetu Fumu amansingula rie:

¹⁸Ezekiel, nyonga mu diambu dibapuela bapuela baEgypte. Basundusi va mosi o mbengi na malongu masusu aguna abafu betsanini.

¹⁹Bawivuli rie: Va mutu aguvu na kembu uviolila nde? Sunduganu yesilamanu va mosi na abasarebu abamaboku o divita.

²⁰Bisi Egypte boboku o divita. Majenga amawakusu: moberusa batu bapuela bapuela!

²¹O mbura jiabafu bango mangolu na bivunda biEgypte bogamuga rie: Abasarebu abamaboku o divita bamasunduga uyisilama netu.

²²Avana kaga jiAssyrie avu na bagora bandi; mangila memutsiengili yiari na yiari diwendi rie: Mabagora abamaboku o divita.

²³Mangila mogu mavu tindi madonga o mbura jiabafu na metsiengili ngila jikaga. Botsu bamaboku o divita abamajabisa bisi malongu dunsiensi.

²⁴Avana kaga Elam avu na bagora bandi, ngila andi jimatsiengulu na mangila mabagora bandi; botsu bamaboku o divita. Abasarebu beni abamajabisa bisi malongu dunsiensi basunduga o tsi butamba. Bavu tsokudu na yisonyi va mosi na jogu abavu o mbengi.

²⁵Bamamukunsila tangi va gari bagora bandi abamaboku nandi o divita. Ngila andi jimatsiengulu mangila yiari na yiari. Abasarebu beni bamanyavisanga dunsiensi na bamabegu na yisonyi va mosi na jogu abamaweʼ o mbengi; botsu bamaba mu dutalu dumosi.

²⁶Avana kaga jiMechek na jiToubal na bagora bogu bavu, mangila mogu metsiengulu na mangila mabagora bogu yiari na yiari, abasarebu beni botsu bamaboku na divita, jogu abamanyavisanga dunsiensi o malongu.

²⁷Abasarebu abamaboku basamatsigu va mosi na bangogaga bakala; bamavindama o mbura jiabafu na bitogulu biogu bidivita na bamavaga majenga mogu pika tsimiuru miogu.

²⁸Jenu wenu bisi Egypte dufu dedi mosi na abasarebu; dubonduga va mosi na jogu abamaboku o divita.

²⁹Avana Edom avu na bakaga bandi na baana bandi botsu babakaga, diuleba bamaba bango mangolu abamatalu va mosi na jogu abamaboku o divita; bamatsigu va mosi na abasarebu nesi na jogu abevindimi o mbengi.

³⁰Avana barumitsi botsu babanda bavu na bisi Sidon botsu abamavindama o mbura jiabafu. Bamaba na tindi mangolu; bamanyavisanga dunsiensi tumba va mosi na abasarebu beni bamatsigu na basusu na bamavindama na yisonyi o mbengi.

³¹Ava Pharaon olabila bagora bandi guna obembugu mua pesu mu mbari jogu botsu bamaboku va mosi. Menu aguvu Fumu Nsambi nyidivosi.

³²Nyimasingisa Pharaon unyavisa dunsiensi o malongu tumba jaʼ beni na bagora bandi botsigu va mosi na abasarebu; botsu boboku o divita. Menu aguvu Fumu Nsambi oyidivosi.