Read Punu Ezekiel 33 Bible Online

Ezekiel 33 - Punu bible

Ezekiel 33

¹Fumu amansingula rie:

²Ezekiel, rangimisa baIsrael adilabini mu temu nyisingisi divita o dilongu. Bisi dilongu bosola dibaala uba watsi ogu.

³Pa watsi eni olaba dibadi dimuvinitsi uruga diruyi osiga mumbanda ulubusa batu nandi.

⁴Pa jandi oyigulu diufi dimumbanda agegaru ulubusu na pa muvinitsi omusutusu malungu mandi moba va julu mum ujaʼ beni.

⁵Amagulu diufi dimumbanda na asamagaru ulubusu, malungu mandi moba va julu mum ujaʼ beni; pa ogam ulubusu okegobula.

⁶Pa watsi eni olaba dibadi umga eruyi na agosiga mumbanda na pa batu nandi bagaalubusu na pa muvinitsi oboka mutu; dufu duandi duvu diambu diwatsi malungu mandi moba va julu mum uwatsi.

⁷Ndeʼ Ezekiel, nyimagusola watsi ubaIsrael, vengu gugulu mambu mami nolubusa baIsrael.

⁸Ava nyutsingulila mutu mubi rie: Gufu! Pa gugomulubusa vo pa gugovosa nandi yiri mutu eni mubi okalula diela na bifu biandi bibi, pa gugomu waka kalala malungu mandi moba va julu mum agu.

⁹Tumba pa gumalubusa mutu mubi, ne pa agokalula diela na bifu biandi bibi, ofu mu mabi mandi tumba ndeʼ gukewaka kalala.

¹⁰Ndeʼ Ezekiel, tsingula baIsrael rie: Jenu duivosi rie: Nsimbulu tsietu na masumu metu bivu va julu miuru mietu, yika ubiva tuibivi; tsie tudilila monyu?

¹¹Batsinguli rie: Menu aguvu Fumu nyivosi rie: Ngerondi yiri mutu mubi ofu, nyirondi yiri akaluli diela nodila monyu. BaIsrael, dundanu, dundanu bifu bienu bibi. Dibandu yi dufuila?

¹²Ndeʼ Ezekiel, tsingula bambatsi rie: Dusungugu dumutu usungama dugomu waka kalala ava emuevayila masumu; na nsimbulu tsimutu mubi tsigomuemuboka pa ekaluli diela. Pa mutu usungama omuevaga masumu agowaku kalala mu diambu didusungugu duandi dukala.

¹³Ava nyuvosila na mutu usungama rie: Gubanganga monyu: tumba va julu vana nesi na dusungugu duandi dukala omuevaga mabi, dusungugu duandi duotsu dulibunu na ofu mu diambu didibi adi amavaga.

¹⁴Ava nyuvosila na mutu mubi rie: Gufu: tumba pa okalula diela na bifu biandi bibi nokevega ukipanga dusungugu, agomuefu.

¹⁵Pa ogabusa tuga na pa ogabusa abi amadaga na pa okipa migaga amiveyi monyu napa agomuevaga mabi odila monyu agomuefu, via.

¹⁶Masumu motsu ama amavaga molibunu; odila monyu mu mbari ekipi dusungugu.

¹⁷Bambatsi bagu bevosi rie: Nsila Fumu jigaa jisungama. Tsiri mansila mogu amagaa masungama?

¹⁸Pa mutu usungama otsimbu novaga mabi, ofu mu diambu dimabi meni.

¹⁹Pa mutu mubi okalula diela nodunda bifu biandi bibi nokipanga bifu bisungama odila monyu mu diambu dieni.

²⁰Jenu baIsrael duivosi rie: Nsila Fumu jigaa jisungama. Jabanu yiri nyutabulila mutu mutu bunsonsi dedi na bifu biandi!

²¹Yilima yiyigumi na bibeji mu yilumbu yimuranu yitsungi jimugumi jibukoli buetu, dibaala dimosi adimarina o Jerusalem amaruga ombu garni na amansingula rie: Musiengi umapatulu!

²²Tsisiga ne murinitsi akatola Fumu amadibula munu ami. Ava murinitsi eni amatolila kedi ombu garni nyisamamueba dibaba yika uvosa nyivosi.

²³Fumu amansingula rie:

²⁴Ezekiel, jogu abetsani va gari mandagu amamapansu o bulongu buIsrael bevosi rie: Lesa Abraham agumaba pinsa amabialila bulongu tambusa na jetu atuvu bapuela.

²⁵La dibandu batsinguli adi menu aguvu Fumu Nsambi nyibatsinguli rie: Duijangingi nyama na malungu, duiyitsingi bakosi na duiwitilingi malungu. Duitasi yiri nyudusingisa udila bulongu?

²⁶Duiyitsi bitogulu bienu; duivayingi nsoruru na duivayingi bumbembu. Duitasi yiri nyudusingisa udila bulongu?

²⁷Bansingulili mambu memama: Menu aguvu Fumu Nsambi nyidulubusi rie: Jogu abavu va gari mandagu amamapansu boboku; jogu abavu o musiru bovopulu na bibulu; jogu abesuemi nesi abavu o malima boboku na yivunga.

²⁸Nyubunga bulongu na nyubukalusa mbura ajigaa na mamba; butsiemusa mangolu amamarombisa batu dunangu; batu bagomuevioga o mikongu miIsrael.

²⁹Mbana bojaba yiri menu nyivu Fumu ava nyusilila bulongu mududu nobukalusa mbura ajigaa na mamba mu diambu dinsoruru tsiotsu atsi baIsrael bamavaganga.

³⁰Ndeʼ Ezekiel ne bakoli nagu beyenagudesanga o makusa nesi o gusu kana na betsingusini rie: Ruganu uyigulu yilumbi ayiruyili ombu Fumu!

³¹Batu bami ugukama be-gukimi ugugulu, ugulu begulu mambu magu tumba bagemadedili. Bevayi nana berondili bekipingi yika amogu.

³²Ndeʼ guvu nderi muwimbitsi uboti aguvu na diufi diboti aguijabi tindi uwimbila ombu gogu. Begulu mambu magu tumba bagemakipingi.

³³Ava mambu ama gumababiyila molabinina, namapapa ulabana melabini, mbana bojaba yiri mubiyitsi amaba nogu.