Read Punu Ezekiel 34 Bible Online

Ezekiel 34 - Punu bible

Ezekiel 34

¹Fumu amansingula rie:

²Ndeʼ muana mutu, biyila babungulitsi babindombu baIsrael! Bansingulili malubu mami. Menu aguvu Fumu Nsambi nyivosi rie: Ka muna maguga ma babungulitsi babindombu baIsrael bolaba! Duikekelisa yika jenu beni! Babungulitsi babindombu bagekelisili mugamba?

³Dumalibana mugamba diuleba dumanu dile na dumavaga bikutu na mionyi na dumabiboka nesi bivonga tumba dusamakelisa bindombu.

⁴Dusamawarisa abimadeda na dusamabelusa abimabelanga nesi ubuga mapura maabimanemusu; dusamagukiga abimapansiga nesi uromba abimatsiemuga; tumba dumabiruma na dikasi na kanda.

⁵Bimapansiga mu mbari bigaa na mubungulitsi ubindombu; bimapansiga, bibulu biotsu biubijanganga.

⁶Bindombu biami bimapansiga o mikongu miotsu nesi o bikundubuga; mugamba ami umapapansiga o bulongu buotsu; ne mutu mosi agegukipi na mutu mosi agegurombi.

⁷La dibandu babungulitsi babindombu bibaIsrael gulanu mambu maFumu!

⁸Menu aguvu Fumu Nsambi nyitubuli rie: Bindombu biami ukindu bikindu na bibulu biotsu bimusiru bibijangingi mu mbari digambu dimubungulitsi; basamakipa bindombu biami, bamakekelisa.

⁹Babungulitsi babindombu guluanu:

¹⁰Menu aguvu Fumu Nsambi nyidulubusi rie: Nyina kueru na babungulitsi babindombu. Nyubapatula bindombu biami; ngomuebasingisa ubungula bindombu biami; bigomueba tsongu ogu; nyuwaka bindombu biami kalala ombu gogu yiri bigomueba biguji biogu.

¹¹Menu aguvu Fumu Nsambi nyivosi rie: Ubanda namunyi meʼ beni nyukelisa bindombu biami tindi ubikelisa.

¹²Nana mubungulitsi ubindombu egengilili mugamba andi agumapansiga anana nyukelisila tindi ukelisa bindombu biami, nyubigukiga o mbura tsiotsu atsi bimapansiga muna yilumbu yimungudi uneni.

¹³Nyubigusula o malongu na nyubigukiga mu mbura tsipuela te na nyubigabusa o bulongu buogu; nyubilisila o julu tsimikongu miIsrael mu migula mimijamba nesi o mbura atsitsanunungu.

¹⁴Nyubilisila va mbura ajivu bisinga binyelili na biutsananga o mikongu misakama miIsrael; avana o julu tsimikongu miIsrael biusiliminanga va mbura ajivu bisinga binyelili.

¹⁵Menu nyulisila bindombu biami; menu nyutsanisa bindombu biami. Menu aguvu Fumu Nsambi nyidivosi.

¹⁶Nyuromba ayimatsiemuga; nyugabusa ayimapanda; nyubuga ayimanemusu na nyuwarisa ayibeli. Tumba nyubunga abivu bivonga na abivu na mangolu. Nyuba mubungulitsi ubindombu aguvu uwelimina na mugamba ami.

¹⁷Mbe ka mugamba ami menu aguvu Fumu Nsambi nyivosi rie: Jenu bindombu biami nyudutabulila bunsonsi va gari mulumi yindombu na mulumi yinsabi.

¹⁸Jenu babungulitsi babindombu, diwelimina yiri dujanganga bisinga binyelili notsiarila abisiali? Diwelimina yiri dunu mamba maboti nofuinsana amesiali?

¹⁹Mbana bindombu biami biujanganga abi dumatsiarila nonu ama dumafuinsana!

²⁰La dibandu menu aguvu Fumu Nsambi nyivosili rie: Nyutabulila yindombu yivonga na yindombu ayivu na digasu bunsonsi.

²¹Dumasindila na miuru nesi na masambaka na dumadimba bindombu biotsu bideda na masiyi menu te na dumabibinga.

²²Nyuwamusa bindombu biami yiri bigokindu na nyutabulila yindombu na yindombu yisusu bunsonsi.

²³Nyubivega mubungulitsi umosi agubibungulanga; jandi la musalitsi ami David; jandi obibungulanga na oba mubungulitsi ubionyi.

²⁴Menu Fumu nyuba Nsambi ogu; musalitsi ami David oba muana kaga ogu. Menu Fumu oyidivosi.

²⁵Nyuvangana pangini jiduvotsu nogu na nyutsiemusa bibulu bimusiru mu bulongu; biutsananga sui o kumu na biusiliminanga nesi o musiru.

²⁶Nyubasingisa utsana o yiari yimukongu ami. Nyunoyisa mfula va temu jiwelimina na jiuba mfula ajiubawamusa.

²⁷Miri miubura milunda na butamba bubendi-sa bivaru. Boba sui mu bulongu buogu ava nyusurulila mikudu miyilala yiogu na nyubawaka kalala ombu jogu abamabakelisa bakoli. Mbana bojaba yiri menu nyivu Fumu.

²⁸Bigomuekindu na bisi malongu na bibulu bimusiru bigomuebivopula; biubanganga sui na vagoba mutu ubilasanga goma.

²⁹Nyubavayila nungi ajiuba na diduma; bagomuefuanganga na nsala na bagomuelasungu yisonyi na bisi malongu.

³⁰Batu botsu bojaba yiri menu Fumu Nsambi nyivu nogu na baIsrael bavu batu bami. Menu aguvu Fumu Nsambi oyiditubuli.

³¹Nyiina, duvu bindombu biami; duvu batu aba nyikelisi mu mbari nyivu Nsambi enu. Menu aguvu Fumu Nsambi nyidivosi.