Read Punu Ezekiel 36 Bible Online

Ezekiel 36 - Punu bible

Ezekiel 36

¹Mbekandeʼ Ezekiel, biyilamikongu miIsrael! Gukavosa rie: Mikongu miIsrael guluanu mbembu Fumu!

²Menu aguvu Fumu Nsambi nyivosi rie: Muvinitsi amavosa mu diambu dienu rie: Joʼve! Mikongu mienu misakama miuba amietu!

³Ezekiel, biga noposila ombu baIsrael rie: Adi nyirondi ubatsingula adidi rie: Nyimalaba yiri o biari biotsu beyevikana o mikongu miIsrael; mivu o tsi durumu dumalongu mangana, abemirombisi udesungu.

⁴La dibandu mikongu miIsrael guluanu mambu maFumu aguvu Fumu! Menu aguvu Fumu Nsambi nyivosi rie: Mikongu na bikundubuga nesi mijamba na bibususu nesi bivongu na misiengi amimasiala mududu; biotsu bimakaluga kwaku tsibisi malongu amavu yiari na yiari.

⁵Menu aguvu Fumu Nsambi nyivosi rie: Nyiina, kabu ami jimabasa, nyusiemba bisi malongu masusu, sinsa viri Edom. Na nsangu na dilensa malongu meni mamayenamabunganga nomakindanga.

⁶La dibandu ndeʼ Ezekiel biyila bulongu buIsrael. Tsingula mikongu na bikundubuga na mijamba na bibususu rie: Menu aguvu Fumu Nsambi nyivosi rie: Dumasiengu na dumawarila yisonyi na bisi malongu mangana.

⁷La dibandu menu aguvu Fumu Nsambi nyivosili rie: Nyumagabusila pila! Bisi malongu meni bolasu yisonyi wandi!

⁸Jenu mikongu miIsrael dubendisa min amiubura milunda ulisila baIsrael mu mbari namapapa ugabuga begabuyi.

⁹Guluanu, nyudulasa ubueji; nyudugengila dufutsu na duvaru.

¹⁰Nyudufunisila batu o Israel jiotsu; misiengi miuba na batu na bomuerungulila amamapansu.

¹¹Nyudufunisila babaala na bibulu; nyudufunisa tindi ufunisa te na duba na bategula. Nyirondi yiri dumuetsanunungu nana va kala na nyuduvayila maboti uviolila va kala; mbana dujaba yiri menu nyivu Fumu.

¹²Jenu batu bami nyudulinsa mu bulongu buotsu. Buba abuenu; bugomuebokisa baana benu.

¹³Menu aguvu Fumu Nsambi nyivosi rie: Bevosi rie: Gumatsiemusa batu, gumabunga baana bagu.

¹⁴Gugomuetsiemusa batu na gugomuebunga baana bagu. Menu aguvu Fumu Nsambi oyidivosi.

¹⁵Ngomuegugulusu bisiengu bibisi malongu na gugomuewarila yisonyi yibatu; bulongu bulongu bugomuebungu. Menu aguvu Fumu Nsambi oyidivosi.

¹⁶Fumu amansingula rie:

¹⁷Gulu Ezekiel, ava baIsrael bamatsaninanga o bulongu buogu bamabubivisa na bifu biogu nesi bisalu biogu; nyimabalaba nderi belabi mugetu aguvu na tsungi andi.

¹⁸Kabogu nyimabalasa kabu mu diambu dimalungu ama bamawitila mu bulongu na mu diambu dibakosi bogu.

¹⁹Nyimabapansa o malongu na bamapansiga o malongu mapuela mapuela; nyimabakilisa dedi na bifu biogu nesi bisalu biogu.

²⁰Bamatola o malongu ama bamawenda na bamasa-bula diina diami diNsambi te na batu bamabavosila rie: Abana batu baFumu abamapalisa o bulongu buandi.

²¹Nyimaba na murima o julu mu mbari diina diami diNsambi dimalensu na bisi malongu mu diambu dimabi mabaIsrael.

²²La dibandu tsingula baIsrael rie: Menu aguvu Fumu Nsambi nyivosi rie: BaIsrael adi nyuvaga, ngodivaga mu diambu dienu tumba nyudivaga mu diambu didiina diami diNsambi adi jenu dumasabula o malongu ama dumawenda.

²³Diuleba dumandensa va misu mogu nyubalasa duyitsu dudiina diami adimasabulu o malongu ama dumawendanga. Mbana bisi malongu meni bojaba rie: Menu nyivu; menu aguvu Fumu Nsambi oyidivosi.

²⁴Nyudugusula va gari batu na nyudugukiga o malongu motsu mbana nyudugabusa o bulongu buenu.

²⁵Nyuduwitila mamba malioma na duliomusu; nyuduliomisa muinsi enu uotsu nesi ubakosi benu botsu.

²⁶Nyuduvega murima ugona nesi matasa magona; nyudugusulila murima ugala na nyuduvega murima udeda.

²⁷Nyudugabila Yinyunyi yiami na odurombisa udedila mamma mami nesi ukelisa nokipa migaga miami.

²⁸Kabogu jenu dutsananga o bulongu abu nyimavega bataji benu; duba batu bami na menu nyuba Nsambi enu.

²⁹Nyudutsindulila muinsi uotsu. Nyuneyisa ble notsifunisa yiri dugolaba dungosu dunsala.

³⁰Nyufunisa milunda na digumba dimanungi yiri dugomuelaba yisonyi yidungosu dunsala o malongu.

³¹Mbana durangimina bifu bienu bibi nesi bisalu bienu abisamba biboti; jenu beni dukevina mu diambu dimabi menu nesi nsoruru tsienu.

³²Menu aguvu Fumu Nsambi nyivosi rie: Dijabianu yiri tsiri mu diambu dienu nyivayili nana! Labanu yisonyi na banu tsokudu jenu baIsrael mu diambu dibifu bienu.

³³Menu aguvu Fumu Nsambi nyivosi rie: Yilumbu ayi nyuduliomisila mabi menu motsu, nyubasa misiengi na batu na bivongu biurelugu.

³⁴Butamba budukanga buvarungu; baviosi bansila bagomuelaba butamba budukanga.

³⁵Mbana bovosanga rie: Butamba buebubu budukanga bumakaluga nderi nungi Eden. Misiengi mieni amimapansu nesi usilu mududu nesi urakulu mimawarusu na mivu na batu.

³⁶Malongu amoba yiari na yiari mojaba yiri menu Fumu nyimaiungulila amimapansu nesi uvara abumaba dukanga. Menu Fumu oyidivosi na nyudugusu pangini ami.

³⁷Menu aguvu Fumu Nsambi nyivosi rie: Nyumuegabusa murima nsima mu diambu dibaIsrael; adinyubavayilaadidi: Nyufunisa babaala nderi mugamba.

³⁸Misiengi amimapansu miubasa de na binombu bibatu nderi migamba miyingitsi amimabegu o Jerusalem uvagulapagu tsibafeta baneni. Mbana bojaba yiri menu nyivu Fumu.