Read Punu Ezekiel 37 Bible Online

Ezekiel 37 - Punu bible

Ezekiel 37

¹Mangolu maFumu mamakaanga na Yinyunyi yiandi amambega; amayensunsa o yibususu ayimabasa na bivisi.

²Amapiosa yiari na yiari va mugula bionyi; nyimalaba bimaba bipuela bipuela o gari yibususu na bimaba bigunguga kala.

³Fumu amakwivula rie: Ezekiel, bivisi biebibi biurungula umuedila monyu? Nyimawaka rie: Fumu Nsambi yika ndeʼ aguvu Fumu guijabi.

⁴Fumu amabuela rie: Biyila bivisi biebibi nobitsingula rie: Bivisi bigunguga, guluanu.

⁵Fumu aguvu Fumu evosi na bivisi biebibi rie: Guluanu nyudugabila muvumu na dudila monyu.

⁶Nyuduvega miansi nesi udubendisa mi-sonyi nodukubiga mukata; nyuduvega muvumu na dudila monyu. Mbana dujaba yiri menu nyivu Fumu.

⁷Nyimabiga nana nyimarumunu. Ava nyimabiyilanga nduku jimagulunu, diwendi rie: bimapupanga na bivisi bimabembasananga.

⁸Nyimagengila na nyimalaba yiri bimadila miansi na misonyi na mukata umabikubiga; tumba bisamaba na muvumu.

⁹Fumu amatuma rie: Muana mutu mbiyila na tsingula punga rie: Fumu aguvu Fumu jandi rie: Punga ruyila o biari biotsu bibina; gumba bamfumbi bebaba yiri bodila monyu!

¹⁰Nyimabiga nana amatumina. Na punga jimabakotila na bamavuma na bamaretsama; bamaba dibadi dineni tindi dineni.

¹¹Fumu amansingula rie: Ezekiel, bivisi biebibi bivu baIsrael. BaIsrael uvosa bevosi rie: Bivisi bietu bimagunguga; ditasa dietu dimaburigana; tumatsiemuga.

¹²Kabogu babiyili rie: Menu aguvu Fumu Nsambi nyivosi rie: Batu bami nyudibula mangila menu mbana nyudugabusa o bulongu buIsrael abuvu buenu.

¹³Aa batu bami mbana dujaba yiri menu nyivu Fumu ava nyudibulila mangila menu; nesi ava nyudupalisila muna!

¹⁴Fumu amavosa rie: Nyudugabila Yinyunyi yiami na dubanganga monyu; nyudugabusa o bulongu buenu mbana dujaba yiri menu Fumu nyimavosa na nyudugusu pangini ami.

¹⁵Fumu amansingula rie:

¹⁶Ezekiel, bonga dupangu na gukasona muna rie: Duba-Juda na baIsrael babufumu buebubu. Gukabonga dupangu dususu na gukasona muna rie: DuJoseph (duEfraim) na baIsrael babufumu buebubu.

¹⁷Bambasana tsiotsu tsibeji va mosi yiri tsiulabana nderi dumosi va dikaka diagu.

¹⁸Ava bambatsi bagu bogu wivulila rie: Gugotuvindiyila divindugulu didiambu diedidi?

¹⁹Gukabawaka rie: Menu aguvu Fumu Nsambi nyivosi rie: Nyubonga dupangu duJoseph na dubaIsrael babufumu buebubu ubafubana na duJuda; nyutsifubana yiri tsiuba dupangu dumosi va dikaka diami.

²⁰Ndeʼ Ezekiel gu-gaanga pangu atsi gumasona, tsiuba va dikaka diagu va misu mogu.

²¹Gukabatsingula rie: Menu aguvu Fumu Nsambi nyivosi rie: Nyubonga baIsrael o malongu ama bamawenda; nyubagukiga o biari biotsu mbana nyubagabusa o bulongu buogu.

²²Nyuduvaga dilongu dimosi va butamba o mikongu miIsrael; jenu botsu duba na kaga jimosi; dugomueba malongu mabeji nesi buftimu bubeji.

²³Dugomuekebivisa na bakosi nesi nsoruru nesi nsimbulu; nyudugusula o mbura tsiotsu atsi dumatsaninanga atsi dumavayilanga masumu mbana nyuduliomisa; jenu duba batu bami na menu nyuba Nsambi enu.

²⁴Musalitsi ami David oba kaga enu na jenu duba na mubungulitsi umosi. Dukipanga maruma mami na dukelisanga migaga miami nesi umikipanga.

²⁵Dutsaninanga o bulongu abu nyimavega musalitsi ami Jacob abu bataji benu bamatsaninanga; dutsananga muna jenu na baana benu na bategula benu.

²⁶Nyuvangana pangini jiduvotsu nenu mutubu; nyudutsanisa na nyudufunisa na nyusunsa Ndagu Nsambi va gari enu te na mutubu.

²⁷Yitsanunu yiami yiubanganga nenu; nyuba Nsambi enu na jenu duba batu bami.

²⁸Bisi malongu bojaba yiri menu nyivu Fumu agumasola Israel usala yisalu yiami ava Ndagu ami jiubila mutubu va gari enu.