Read Punu Ezekiel 38 Bible Online

Ezekiel 38 - Punu bible

Ezekiel 38

¹Fumu amansingula rie:

²Ndeʼ muana mutu, gengila Gog oyirumi bisi Mechek na Toubal o bulongu buMagog, mubiyili!

³Menu Fumu Nsambi, nyivosi rie: Nyutoga nagu Gog ndeʼ sefu jineni jibatu baToubal na baMechek o bulongu buMagog.

⁴Nyugukobiga mulunga mu mibaka miagu; nyugupalisa na dibadi diagu diotsu na bakabalana babeyitsi babakabala; botsu bamaduara tindi uduara; bavu dibuli dineni; mutu mutu nesi ngebi nesi yivunda na ngubu andi; botsu beviunsi majenga.

⁵Bisi Perse na bisi Ethiopie na bisi Pout; bagora beni botsu abavu na bangubu na basiemba bofubana nagu.

⁶Bagora babulongu buGomer na baBet-Togarma abavu o banda na mabuli mandi motsu na batu bapuela bapuela abavu nagu.

⁷Kunsamanu jenu na batu bagu bapuela abamagukama o tsi durumu duagu.

⁸Bilumbu bipuela binovioga nyugusindiga upatula bulongu buIsrael. Bisi bulongu abasamaboku abamagukugu o malongu mapuela bogukama o mikongu miIsrael amimasiala mududu kala kala. Anogusulu va gari batu, botsu boba sui va mbura tsiogu.

⁹Gukawenda, gukakueka na mangolu nderi mungudi; guba nderi dimungi adiukibiyi bulongu ndeʼ na mabuli magu motsu na batu bapuela bapuela abavu nagu.

¹⁰Menu aguvu Fumu Nsambi nyivosi rie: Mu yilumbu yieni guba na matasa magona te na gukunsa kanu tsibi.

¹¹Guvosa rie: Nyuyetoga na bulongu abugaa bukandu; nyuyepupisa batu abavu sui va mbura tsiogu, botsu abetsani o mimbu amagaa na bivaga nesi ubindugu na mibindugu.

¹²Nyuyenakindanga nesi uyenabonganga biotsu abimapansu bibatu abamagukugu yiari na yiari abavu na migamba nesi busina abetsani va gari bulongu.

¹³Saba na Dedan abavu batiyitsi bamuteti baTarsis abamabambana nogu, botsu abamaba nderi bimbungu boguwivula rie: Gutsiiuga uyikinda? Gutsigukiga batu bagu bapuela bapuela uyenakindanga noyenabega lora jivema na lora nesi migamba na busina? Ka muna ukinda gu!

¹⁴La dibandu Ezekiel, biga na tsingula Gog rie: Menu aguvu Fumu Nsambi nyivosili rie: Nyiina, yilumbu ayi batu bami baIsrael boba sui ndeʼ gusogama.

¹⁵Mbana gurambuyila o bulongu buagu o banda; jenu na bagora bagu bapuela bapuela, botsu boba o julu tsibakabala diwendi rie: boba dibadi dimangolu.

¹⁶Gukayetumuna batu bami baIsrael, guba nderi dimungi adikubiyi bulongu. Mua bilumbu binovioga nyugusindiga ombu bisi bulongu yiri bonjaba ava ndeʼ Gog guvayila amoroyisa diina diami!

¹⁷Menu aguvu Fumu Nsambi nyugutsinguli rie: Tsiri mu diambu diagu nyimavosila kala na babiyitsi bami baIsrael abamabiga va temu eni mu bilima bipuela rie: Nyusindiga mutu uyetoga na batu bogu.

¹⁸Va temu eni mu yilumbu ayi Gog otoyila na baIsrael muna yilumbu yieni kabu ami jiumata tindi umata. Menu aguvu Fumu Nsambi oyidivosi.

¹⁹Nyiditubuli na kabu ami jineni rie: Muna yilumbu yieni o Israel uba kiinbu jineni.

²⁰Nyama tsimamba na batsoli biuregama va gusu ami nesi bibulu bimusiru nesi bilandila biotsu nesi batu botsu abavu mu butamba; mikongu miugudama na batali bovongumuga na bivaga biotsu biurakuga.

²¹Menu aguvu Fumu Nsambi nyivosi rie: Nyugubeyila purulu tsimunongu na munongu, bagora bagu bobokasana.

²²Nyugukilisa na yivunga na malungu nesi mfula jineni na mfula jimamanyi; nyudunoyisila muji na fula, jenu na bagora bagu.

²³Nyukelasa ombu bisi malongu mbana bojaba yiri menu nyivu Fumu Nsambi.