Read Punu Ezekiel 39 Bible Online

Ezekiel 39 - Punu bible

Ezekiel 39

¹Fumu amansingula rie: Ndeʼ muana mutu biyila Gog! Gukavosa rie: Menu aguvu Fumu Nsambi nyivosi rie: Gog, nyina kueru nagu, ndeʼ oyirumi bisi Mechek na Toubal!

²Nyugubega; gurambuyila o banda na nyugusindiga o mikongu miIsrael.

³Nyubogula pita agu ajivu va dikaka diagu dimagetu na nyubo-ndusa mbansa tsiagu atsivu va dikaka diagu dimabaala.

⁴Ndeʼ na bagora bagu botsu na batu abavu nagu duberuga va julu mikongu miIsrael. Nyudulisila batsoli nesi bibulu bimusiru.

⁵Guberuga va tsi mu mbari nyimadivosa; menu aguvu Fumu Nsambi.

⁶Nyubangisa muji o bulongu buMagog nesi ombu jogu abetsani sui o banyingi; mbana bojaba yiri menu nyivu Fumu.

⁷Nyujabisa diina diami diNsambi ombu batu bami baIsrael na ngomuesinga yiri diina diami diulensu; mbana bisi malongu bojaba yiri menu nyivu Fumu Nsambi Israel.

⁸Guluanu mambu memama, uruga meruyi; molabana namapapa; la yilumbu ayi nyimatubula. Menu aguvu Fumu Nsambi oyidivosi.

⁹Mbana baIsrael bopala na bonyensa bitogulu nesi ngubu tsigeyi na tsineni nesi bapita na mbansa nesi banguangu na makongu; bobinyensa te na yisambuali yibilima.

¹⁰Bagobonga mikansu o manungi na bagoriaba o musiru; bobangisa muji na bitogulu. Bovula jogu abamabavula na bokinda jogu abamabakinda. Menu aguvu Fumu Nsambi oyidivosi.

¹¹Muna yilumbu yieni nyuvaga Gog mbura ajiutsigulungu bamfumbi o Israel; yivu yibususu yibalinsi ayivu o yiari ayi wisi epalili yimubu; ngila eni jiugaga diviogulu dibalinsi. Avana botsiyila Gog na bagora bandi bapuela bapuela, yibususu yieni yiunengulungu yibususu yiyinombu yiGog.

¹²BaIsrael bobatsiga yiri bulongu bugoba na muinsi; adina bovagaanga te na yisambuali yitsungi.

¹³B isi bulongu botsu bobatsiga, ayina yiuba yilumbu yiogu yindungulu, yilumbu ayi nyulasila bundumba buami. Menu aguvu Fumu Nsambi oyidivosi.

¹⁴Va disukusulu diyisambuali yitsungi bosola babaala aboyenatsiengilanga bulongu utsiganga bamfumbi abasamabuagu yiri bulongu bugoba na muinsi.

¹⁵Boyenatsiengilanga bulongu; pa umosi va gari ogu olaba bivisi bimutu ovaga yilimba vana mbura eni te na batsiyitsi bobitsiga o yibususu yiyinombu yiGog.

¹⁶Voba musiengi agunengulungu Hamona. Mbana bulongu buliomusu.

¹⁷Fumu Nsambi amamuensingula rie: Ndeʼ Ezekiel, nengila batsoli na bibulu biotsu bimusiru nobitsingula rie: Gukamanu; ruganu yigukamanu yiari na yiari; ruganu o pagu aji nyidubokili; pagu jineni va julu tsimikongu miIsrael! Biuji banyama na biunu malungu.

¹⁸Biuji misonyi mibangogaga na biunu malungu mabaana babakaga babutamba na balumi babindombu na baana babindombu na balumi babinsabi na balumi babangombi bavonga baBachan.

¹⁹Biuji matsi mabibulu te na biugukuru na biunu malungu te na biulanga; o mulambu upagu aji nyubibokila.

²⁰Va tavula ami biugukuru misonyi mibakabala na mibabeyitsi babakabala na mibangogaga na mibatoyisti botsu bamavita. Menu aguvu Fumu Nsambi oyidvosi.

²¹Nyulasa bundumba buami o malongu; bisi malongu motsu bolaba bunsonsi abu nyutabula na mikilu ami nyubakilisa.

²²Mbana baIsrael bojaba yiri menu nyivu Fumu Nsambi ogu ubanda namunyi te na mutubu.

²³Bisi malongu bojaba yiri baIsrael bamabegu bakoli mu diambu dimabi mogu ama bamapayila; nyimabasuega yinsi yiami nesi ubawakisa ombu bavinitsi bogu yiri boboku o divita.

²⁴Nyimabavayila dedi na muinsi ogu nesi nsimbulu tsiogu na nyimabasuega yinsi yiami.

²⁵La dibandu menu aguvu Fumu Nsambi nyimavosila rie: Mbana nyulasa bategula baJacob na baIsrael botsu yingeba na nyubavega digumba. Nyurombisa diina diami diNsambi uyitsu.

²⁶Mbana bolibana yisonyi yiogu na nsimbulu tsiotsu atsi bamansimbulu ava ba-matsanina sui o bulongu na vasamaba mutu ubabakiga mirima.

²⁷Ava nyubagabusila o dilongu diogu ubagusula ombu bavinitsi mbana bovaga amoroyisa diina diami va gusu bisi malongu.

²⁸Mbana bojaba yiri menu nyivu Fumu Nsambi ogu agumababega bakoli o malongu na oyibagabusi o bulongu buogu; ngomuesila ne umosi.

²⁹Fumu aguvu Fumu amavosa rie: Ngomuebasuega yinsi yiami mu mbari nyubasa baIsrael Yinyunyi yiami.