Read Punu Ezekiel 4 Bible Online

Ezekiel 4 - Punu bible

Ezekiel 4

¹Fumu amabuela rie: Ndeʼ muana mutu bonga yirika yimosi noyisunsa va gusu agu; gukasona yibagunu yimusiengi uJerusalem muna.

²Gukakunsabisalulu biutumuna; gukagurambila mirambu na gukagurungila bikadi; gukagutsiengisa milaku na gukasunsa bitogulu bidivita yiari na yiari.

³Gukabonga yibuku yibudilu wandi na gukayisunsa nderi yivaga va gari ndeʼ na musiengi. Gukagengila musiengi: uvu ukandu ndeʼ aguigukandi; ayina yiuba yilimba ayiulubusa baIsrael.

⁴Mbana yesilama o yiari yimagetu; gukayesunsa mabi mabaIsrael guna; gunangulanga mabi mogu bilumbu biotsu abi gusilimmanga o yiari yieni.

⁵Nyuletala durangu dubilima bimabi mabaIsrael na nyugu wetsiyila yilumbu yilumbu na yilima yilima; biuba kama yirieru na magumidufu mabilumbu. Anana gunangulilanga mabi mabaIsrael

⁶Gunomana bilumbu biebina, yesilama o yiari yimabaala; gukanangulanga mabi mabaJuda te na magumana mabilumbu; nyutala durangu dibilumbu aduba dedi na durangu dubilima.

⁷Mbana gukageluga o yiari yiJerusalem agumakandu; siela gogu agu yikutu mbana gukabiga.

⁸Mbe ka menu nyugutungisa mikudu yiri gugorungula ugeluga yiari na yiari te na gudugusu durangu dubilumbu.

⁹Bonga ble na orsa na feva na mapuitingi na miya na putera; gukavaga fufu na gukavayila mapa mawelimina na bilumbu abi guba usilama dundeti; gumajanganga te na kama yirieru na magumidufu mabilumbu.

¹⁰Biguji abi gujanganga biuba mua yibuku yikilu mu yilumbu; abina biuba biwelimina yilumbu na yilumbu.

¹¹Gunuanganga mamba, mbuta mosi yilumbu na yilumbu.

¹²Gujanganga mapa ma-orsa ama gugoka. Gukaromba mambi mabatu amamagumuga; gukamasalisa ubangisa muji gukagokisa mapa va misu mabatu na muji umonyi.

¹³Mbana Fumu amabuela rie: Anana ba Israel bojanganga mapa mogu na muinsi o malongu ama nyubabingila.

¹⁴Nyimagamuga rie: Aa Fumu Nsambi leguluati, ubanda va bufudu buami nyisakaji yima yinsoruru nesi yipingu nesi ayimavopulu; dingensa nyisakaji ne yima yiotsu yimuinsi.

¹⁵Amawaka rie: Laba nyuguvega mambi mangombi va yivinga yimambi mabatu; gukagokisa mapa magu o muji umonyi.

¹⁶Amamuensingula rie: Muana mutu, nyuwimina bisi Jerusalem biguji; biguji biupitsu, nesi mamba; botsu boba ulabilila va murirna

¹⁷mu mbari biguji na mamba biubagambu, bogasa tindi ugasa mu diambu dimabi mogu.