Read Punu Ezekiel 40 Bible Online

Ezekiel 40 - Punu bible

Ezekiel 40

¹Magumabeji na yilima yimuranu bibukoli buetu va dibandu diyilima mu yilumbu yimugumi na bisiamunu yitsungi aji Jerusalem umapansu mu yilima yigumi na bina muna yilumbu yieni Fumu amaba nami na amambega o bulongu buIsrael.

²Nsambi amambega mu yiriariamu o bulongu buIsrael na amansunsa va julu mukongu usakama agu umalabana o tandu nderi musiengi.

³Amabega guna; avana vamaba dibaala adimalula nderi kunga; amaba na mukudu ulina na nguangu va dikaka diandi uwetsiyila na amaba diteli va dikotulu dimosi dindagu.

⁴Dibaala dieni amansingula rie: Ezekiel gengila na misu magu na gulu na matuji magu! Tsiyisa motsu ama nyugulasa na matasa magu mu mbari gumabegu vava yiri nyugulasa monyi. Mbana gujabisa baIsrael motsu ama gumalaba.

⁵Adi nyimalaba adidi: yivaga ayimatsiengila Ndagu Nsambi jiotsu. Dibaala amaba na nguangu jimetera yirieru. Amawetsiga usakama na mugobu uyivaga. Bietsu biotsu bibeji bimaba metera yirieru.

⁶Amayenawenda o yiari yiyiabutsu ayivu o yiari ayi wisi epalili; amamata mu yikadi uwetsiga yilemondi yiyiabutsu ayimaba metera yirieru.

⁷Kadi yibuku yindagu usakama uyionyi umaba metera yirieru na uroga uyionyi metera yirieru. Va gari bibuku bimandagu vamaba puasasa jimetera beji na bibuku. Piasu jimetera yirieru jimaba va gusu yibuku yindagu ayimaba va dikotulu diNdagu Nsambi.

⁸Amawetsiga piasu ajimaba va gusu dikotulu o gari; jimaba metera jina.

⁹Amawetsiga bivaga; bimaba mugobu umetera mosi; piasu jimabambana na Ndagu Nsambi.

¹⁰Bibuku, bindagu abimaba o yiari ayi wisi epalili bimaba birieru yiari yimosi na birieru o yiari yisusu; bivaga bikadi yiari bimaba yietsu yimosi.

¹¹Amawetsiga yiavu yiyiabutsu ayimaba metera yiranu na usakama umaba metera yisiamunu na yibuku.

¹²Va gusu bibuku bindagu vamaba puasasa jiyibuku yimetera o yiari yimosi nesi o yiari yisusu; kadi yibuku yindagu yimaba metera yirieru o yiari yimosi na metera yirieru o yiari yisusu.

¹³Amawetsiga yiabutsu ubandila o muansa uyibuku yimosi te no muansa uyibuku yisusu; uroga uNdagu umaba yigumi na metera beji na yibuku.

¹⁴Amawetsiga uroga uyibuku yiNdagu, umaba yigumi yimetera. Dulombili dumatsiengila Ndagu eni.

¹⁵Puasasa va gari yiabutsu yitega na piasu jiyiabutsu ayigari jimaba magumabeji na metera yiranu.

¹⁶Bafenetera babibuku bimandagu bamaba na bangiriyasa na bamavakugu bibaga bigusu kana; o piasu ubanda va bafenetera wandi yiari na yiari. Bibaga bigari bimasonu bibagunu bimambari.

¹⁷Amambega o dulombili dugusu kana duNdagu Nsambi. Dulombili dueni dudalasa dumatsiengusu magumarieru mabibuku bindagu.

¹⁸Dulombili dudalasa dumaba o yiari yibiabutsu; nyivu jiduonyi jimaba dedi na dulombili adutsi.

¹⁹Amawetsiga yiavu ubandila o yiabutsu ayimaba yitsi te no dulombili adugari va gusu kana; dumaba magumaranu mametera. Mbana amawetsiga o yiari ayi wisi epalili no yiari yibanda.

²⁰Amawetsiga usakama na uroga uyiabutsu yiyiari yibanda yidulombili adugari.

²¹Bibuku bindagu bimaba bisiamunu: birieru o yiari yimosi na birieru o yiari yisusu. Bivaga na piasu bimaba yietsu yimosi na yiabutsu yitega. Usakama uyiabutsu umaba magumabeji na metera yiranu na yiavu yimaba digumi na metera beji na yibuku.

²²Vamaba bafenetera na bapiasu na mambari dedi mosi nana o yiari ayi wisi epalili; vamaba yikadi ayimaba na yisambuali yitaka ukotila o Ndagu.

²³Vamaba yiabutsu o dulombili adugari ayimasungasana na yiabutsu ayimaba o yiari yibanda ayimasungasana na yiabutsu ayimaba o yiari ayi wisi epalili. Amawetsiga puasasa va gari biabutsu bibeji; vamaba magumabeji na metera yiranu.

²⁴Amambega o yiari yitandu agu nyimalabila yiabutsu yigona. Amawetsiga bivaga na bapiasu abimaba bietsu bimosi.

²⁵Yiabutsu yieni na bapiasu bayionyi bamaba na bafenetera yiari na yiari dedi mosi na bibuku biyiari yisusu. Usakama uyionyi umaba magumabeji na metera yiranu na uroga yigumi na metera beji na yibuku.

²⁶Vamaba yikadi ayimaba na yisambuali yitaka ukotila o Ndagu. Bibaga bigari bisonu bibagunu bimambari yiari na yiari.

²⁷Dulombili adugari dumaba na yiabutsu o yiari yitandu. Amawetsiga puasasa va gari biabutsu bitandu: jimaba magumaranu mametera.

²⁸Amambega o dulombili adugari, ukotila va yiabutsu yitandu. Amawetsiga yiabutsu yitandu; yimaba yietsu yimosi.

²⁹Bibuku bindagu na bibaga na bapiasu bajionyi bimaba yietsu yimosi. Vamaba bafenetera yiari na yiari. Usakama uyiabutsu umaba magumabeji na metera yiranu na uroga yigumi na metera beji na yibuku.

³⁰Usakama upiasu umaba yigumi na metera beji na yibuku na uroga metera beji na yibuku.

³¹Bibuku bindagu bimasungasana na dulombili dugusu kana. Bibaga bigari bimasonu bibagunu bimambari. Vamaba yikadi ayimaba na yinana yitaka.

³²Amambega o dulombili adugari ukotila va yiabutsu ayimaba o yiari ayi wisi epalili. Amawetsiga yiabutsu ayimaba yietsu yimosi na bisusu.

³³Bibuku bijionyi na bibaga na bapiasu bimaba yietsu yimosi. Vamaba bafenetera yiari na yiari biyiabutsu na bapiasu; usakama uyionyi: magumabeji na metera yiranu na uroga yigumi na metera beji na yibuku.

³⁴Bibuku bindagu bimasungasana na dulombili dugusu kana. Vamaba yikadi ayimaba na yinana yitaka.

³⁵Amambega o yiabutsu yibanda. Amayiwetsiga; yietsu yimaba dedi na bisusu.

³⁶Dedi mosi na bibuku biyionyi na bibaga na bapiasu bayionyi; yimaba na bafenetera yiari na yiari. Usakama uyiabutsu yimaba magumabeji na metera yiranu na uroga yigumi na metera beji na yibuku.

³⁷Bibuku bindagu bimasungasana na dulombili dugusu kana. Bibaga bigari bimasonu bibagunu bimambari. Vamaba yikadi ayimaba na yinana yitaka.

³⁸Vamaba yibuku yindagu ayimadibululu o yiari yiyiabutsu yibanda avana batu bamasusilanga nyama tsipagu tsiunyensa.

³⁹Va piasu jiyiabutsu vamaba batavula babeji kadi yiari; va julu batavula beni bamabokilanga bibulu bipagu tsiunyensa nesi tsiduliomusu nesi tsiutsindula dibumi.

⁴⁰O yiari yimosi yigusu kana ayi bamamatilanga va dikotulu diyiabutsu yibanda vamaba batavula babeji; o yiari yisusu bebeli na piasu jiyiabutsu vamaba batavula babeji.

⁴¹Va mugula yiabutsu vamaba batavula bana o yiari yimosi na batavula bana o yiari yisusu; dutalu dubatavula dumaba yinana; va julu bonyi bibulu bimabokulungu.

⁴²Vamaba batavula bana bamamanyi mapaku. Usakama ukadi tavula umaba magumidusambuali na santimetera yiranu na muranga umaba magumaranu masantimetera. Va julu batavula beni bamasunsilanga bisalulu abi bamabokilanga bibulu bipagu tsiunyensa nesi bipagu tsisusu.

⁴³Bivakugulu bimaba yinana yisantimetera bimanamugu yiari na yiari bitavula; nyama tsipagu tsiunyensa tsimasunsungu va julu batavula.

⁴⁴O yiari yiyiabutsu ari uayigmaba bibuku bindagu bibawimbitsi o dulombili adugari: yimosi yimaba va mugula yiabutsu yibanda na yimasungasana o tandu; yisusu yimaba va mugula yiabutsu o yiari yitandu na yimasungasana o banda.

⁴⁵Amansingula rie: Yibuku yieyiyi yindagu ayisungasana o tandu yivu yibavagufitsi bapagu abekelisi Ndagu;

⁴⁶yibuku yindagu ayisungasana o banda yivu yibavagulitsi bapagu abekelisi yinyensulu yipagu. Jogu bavu bategula baSadoc aguvu mu yifumba yiLevi; borungula ukota Mbura Nsambi usalilaFumu.

⁴⁷Amawetsiga dulombili adugari: dumaba usakama umagumaranu mametera na uroga umagumaranu mametera, yiari na yiari bimaba dedi. Yinyensulu yipagu yimaba va gusu Ndagu Nsambi.

⁴⁸Amambega o piasu jiNdagu Nsambi. Amawetsigamakutu mapiasu, mamaba uroga umetera beji na yibuku na puasasa jimaba yisambuali yimetera.

⁴⁹Piasu jimaba na usakama uyigumi yimetera na uroga ujionyi umaba metera yisamunu. Bamamatanga na yikadi yiyigumi yitaka. Dikutu dimabambana na dikutu nandi yiari na yiari.