Read Punu Ezekiel 41 Bible Online

Ezekiel 41 - Punu bible

Ezekiel 41

¹Amambega o yibuku yineni yiNdagu Nsambi. Amawetsiga bibaga; yibaga yibaga yimaba metera yirieru,

²yiavu yidikotulu yimaba metera yiranu. Usakama uyibuku yineni yiNdagu Nsambi umaba magumabeji mametera na uroga uyionyi umaba yigumi yimetera.

³Mbana amakota o yibuku ayigari. Amawetsiga dikotulu; mugobu umaba metera mosi na usakama udionyi umaba metera yirieru na bibaga biyiari na yiari bimaba metera yirieru.

⁴Amawetsiga yibuku yieni ayivu o gari; yimaba usakama uyigumi yimetera na uroga uyigumi yimetera. Mbana amansingula rie: Ajiji la Mbura Ajivu Tindi Yingitsi.

⁵Amawetsiga mugobu uyibaga yiNdagu; umaba metera yirieru na uroga ubibuku bindagu abimatsiengila Ndagu Nsambi umaba yibuku yibuku metera beji.

⁶Bibuku abimatsiengila Ndagu Nsambi bimaba mu kilingu yirieru, kilingu kilingu jimaba na yigumi yibibuku; bibuku bieni bimapalila mu bibaga abimatsiengusu Ndagu Nsambi, diwendi rie: bisamanamasana na yibaga yiNdagu Nsambi.

⁷Bibuku bimajegusungu ava bimamatusulu na vamaba yikadi yidugongula ayimamatulungu te na kilingu ajimurieru. Kilingu ajijulu jimaba tindi ujega; uwenda o kilingu ajimurieru bamavioyilanga o kilingu ajimubeji.

⁸Nyimalaba bibuku abimatsiengila Ndagu Nsambi bimarungu va bibuga bimetera yirieru.

⁹Yibaga ayigari yibibuku abimatsiengila Ndagu yimaba na mugobu umetera beji na yibuku. Puasasa va gari bibuku bindagu abimatsiengila ndagu

¹⁰na bibuku abimaba muna Ndagu jimaba na yiavu yiyigumi yimetera utsiengila Ndagu.

¹¹Dikotulu dibibuku bimandagu abigari dimaba na puasasa ajimaba metera beji na yibuku utsiengila Ndagu. Vamaba biabutsu bibeji: yimosi o banda na yisusu o tandu.

¹²Ndagu ajimaba va gusu mbura ajisamaba na yisalu o yiari ayi wisi ewendisini jimaba na uroga umagumarieru na metera yiranu; yibaga ayimaba na mugobu umetera beji na yibuku yimatsiengila Ndagu, usakama uyionyi umaba magumana na metera yiranu.

¹³Amawetsiga Ndagu Nsambi: jimaba na usakama umagumaranu mametera. Mbura ajisamasalusu jimaba usakama umagumaranu mametera wandi.

¹⁴Uroga uNdagu Nsambi na mbura ajimaba o yiari ayi wisi epalili ajisamaba na yisalu umaba magumaranu mametera.

¹⁵Amawetsiga usakama undagu ajimaba o nsima Ndagu Nsambi, nesi o nsima nesi o bikadi: yietsu yiotsu yimaba magumaranu mametera. Piasu na yibuku yineni na yibuku ayi gari

¹⁶va mosi na bafenetera na yikadi ayimamatulungu te na kilingu ajimurieru, biotsu bina bimagomunu tsimbi, ubandila va tsi te no bafenetera. Bafenetera bamanamugu bangiriyasa.

¹⁷Nesi te no julu dikotulu o gari Ndagu nesi va gusu kana nesi mu yivaga yiotsu utsiengila Ndagu nesi o gari nesi o gusu kana, biotsu bimasonu

¹⁸na bibagunu bibiansa na bimambari abimabaku. Vamaba yibagunu yimosi yimbari va gari bibagunu bibeji bibiansa; kadi yibagunu yibiansa yimaba na binsi bibeji:

¹⁹yinsi yimutu yimagengila o yiari yimbari; yinsi yiyimbungu yimagengila o yiari yimbari jisusu; anana bimabila utsiengila Ndagu.

²⁰Ubandila va tsi te no julu dikotulu vamaba bibagunu bibiansa na bimambari nesi mu yivaga yiNdagu Nsambi.

²¹Makutu madikotulu diNdagu Nsambi mamaba na yiavu na uroga dedi. Va gusu kana Mbura Nsambi vamaba yima ayibagunu na

²²yisunsulu yibima bimbunga jiboti yitsimbi; yirela yiyionyi yimaba metera na yibuku na yiavu yimaba yibuku yimetera. Bitungu biyionyi na makutu na bibaga bimaba bitsimbi. Mutu amansingula rie: Ajiji la tavula ajimasunsu va gusu Fumu.

²³Ndagu Nsambi na Mbura Nsambi bimaba na makotulu mabeji.

²⁴Makotulu meni mamaba na biabutsu bibeʼ bibeji abimadibulungu nodibugungu.

²⁵Bibagunu bibiansa na bimambari bimabaku mu biabutsu biyibuku ayineni nana bimabakulu mu bibaga. Dulombili dugusu kana dumadibugu na tsimbi.

²⁶Vamaba bafenetera abamanamugu ngiriyasa na bibagunu bimambari bimabaku yiari na yiari bibonyi te no yiari yipiasu nesi va muansa agumadibiga dulombili.