Read Punu Ezekiel 42 Bible Online

Ezekiel 42 - Punu bible

Ezekiel 42

¹Mbana amapalisa o yiari yipiasu ayigusu kana o yiari yibanda na amambega o bibuku bindagu abimaba bisungasana na mbura ajisamba na yisalu ajimaba jisungasana na ndagu ajivu o nsima Ndagu Nsambi.

²Ndagu ajimaba o yiari yibanda jimaba usakama umagumaranu mametera; uroga umaba magumabeji na metera yiranu.

³Yiari yimosi yimaba yisungasana na mbura ayisamaba na yisalu ayimaba na yiavu yiyigumi yimetera utsiengila Ndagu Nsambi; na yiari yisusu yimaba yisungasana na dulombili dudalasa dugusu kana, avana vamaba yikadi yikilingu tsiotsu tsirieru.

⁴Va gusu bibuku bindagu vamaba diviogulu dineni dimetera yiranu na nsila jigeyi jiyibuku yimetera. Makotulu mamasungasana o banda.

⁵Bibuku bindagu abijulu bimaba bigeyi uviolila abitsi na abigari mu mbari bikadi bimabibandasana.

⁶Vamaba kilingu yirieru tumba vasamaba makutu nana mamabda mu piasu. Ubandila o tsi bibuku abi julu bimaba bibandana uviolila abitsi na bigari.

⁷Yibaga yigusu kana ayimaba yisungasana na bibuku bindagu o yiari yidulombili dugusu kana yimaba usakama umagumabeji na metera yiranu;

⁸mu mbari usakama ubibuku bindagu abimaba o yiari yidulombili umaba magumabeji na metera yiranu. Tumba va gusu Ndagu Nsambi vamaba magumaranu mametera.

⁹O tsi bibuku bieni umaba dikotulu diyiari ayi wisi epalili adi jogu abamaruyilanga o yiari upiasu jigusu kana bamakotilanga.

¹⁰Vamaba bibuku bisusu mu uroga uyibaga yidulombili. O yiari yitandu vamaba bibuku bisusu abimasungasana na mbura ajisamaba na yisalu na ndagu ajimaba o nsima Ndagu Nsambi.

¹¹Va gusu bibuku bieni vamaba diviogulu dedi mosi nana dimabila va gusu bibuku bindagu abimaba o yiari yibanda. Usakama na uroga bimaba dedi; makotulu na mapalulu bimaba dedi.

¹²Dimaba dedi mosi mu makotulu mabibuku bindagu mayiari yitandu. Vamaba dikotulu dimosi didiviogulu, didiviogulu adimaba disungasana na yibaga ayigari Mbura Nsambi; batu bamakotilanga o yiari ayi wisi epalili.

¹³Amansingula rie: Bibuku bindagu o yiari yibanda na yitandu abivu va gusu mbura ajigaa na yisalu bivu biyingitsi. Bavagulitsi bapagu abebambini na Fumu bojanganga muna bibuku bieni. Bivu biyingitsi na amuna bosunsilanga bima biyingitsi nesi miensili na bibulu abiuvagulu pagu tsiunyensa tsiduliomusu nesi tsiutsindula dibumi.

¹⁴Va julu vana bavagulitsi bapagu abekotili o Mbura Nsambi bagopala va piasu jigusu kana. Bosunsanga biduaru biyisalu muna mu mbari biduaru bieni bivu bilioma; ava bobambininanga na batu boduaranga bisusu.

¹⁵Anomana uwetsiga o gari Ndagu Nsambi amatuma upalila va dipalulu diyiari ayi wisi epalili mbana amawetsiga mbura jiotsu.

¹⁶Amawetsiga yiari ayi wisi epalili na nguangu ajimasalusu uwetsiga; mbura jiotsu jimaba usakama ukama beji na magumaranu mametera.

¹⁷Amawetsiga yiari yibanda na nguangu ajimasalusu uwetsiga; mbura jiotsu jimaba usakama ukama beji na magumaranu mametera.

¹⁸Amawetsiga yiari yitandu na nguangu ajimasalusu uwetsiga; mbura jiotsu jimaba usakama ukama beji na magumaranu mametera.

¹⁹Amageluga o yiari ayi wisi ewendisini na amajiwetsiga; mbura jiotsu jimaba usakama ukama beji na magumaranu mametera.

²⁰Amawetsiga biari biotsu bibina biyivaga ayimatsiengila mbura jiotsu; usakama umaba kama beji na magumaranu mametera; uroga umaba kama beji na mamgumaranu mametera. Yivaga yieni yimakakasana ayimaba yiNsambi na yibatu.