Read Punu Ezekiel 44 Bible Online

Ezekiel 44 - Punu bible

Ezekiel 44

¹Amakabusa o yiari yidikotulu digari diMbura Nsambi adimaba o yiari ayi wisi epalili. Tumba dimaba didibama.

²Fumu amansingula rie: Dikotulu diedidi diuba didibama; digomuedibuga; ne mutu mosi agomuekotila vana; mu mbari menu Fumu Nsambi Israel nyimakotila vana. Kabogu diubanganga didibama.

³Yika muana kaga okotila mu mbari avu muana kaga; orungula utsananga muna ujanganga biguji va gusu Fumu; okotilanga va diviogulu didionyi; avana opalilanga wandi.

⁴Amambega o dikotulu dibanda va gusu Ndagu Nsambi. Nyinogengila, nyimalaba bundumba buFumu bumabasa Ndagu Nsambi. Kabogu nyimagudama va tsi.

⁵Fumu amansingula rie: Ezekiel, ba limba nolaba kengili! Gulu ama nyugutsingula mu diambu dimaruma motsu maNdagu Nsambi na migaga mijionyi; sinsa viri miukotanga nopalanga.

⁶Gukatsingula mimbini mibaIsrael rie: Menu aguvu Fumu Nsambi nyivosi rie: Jenu baIsrael nyimatopulu nsoruru tsienu!

⁷Dumakotisa benyi o Mbura ami jiNsambi, jogu abasarebu, anana dumalensila Ndagu ami. Ne pa duipagulili biguji ria matsi na malungu, nsoruru tsienu tsimadurombisa ubunsa pangini ami.

⁸Dusamasala yisalu yiami yiMbura Nsambi tumba dumayivega ombu benyi uyinsalila va yivinga yienu.

⁹Menu aguvu Fumu Nsambi nyivosi rie: Ne muenyi umosi agusarebu agokota o Mbura ami jiNsambi; ne pa etsani va gari baIsrael.

¹⁰Mbe ka bisi Levi bamambusa na bamakakana nami va mosi na baIsrael uyenayitsanga bakosi; jogu beni bonangula mbela jimabi mogu.

¹¹Bonsalila o Mbura ami jiNsambi; bokelisanga makotulu maNdagu Nsambi; bobokililanga batu bibulu bipagu tsiunyensa na bipagu tsisusu na bobanganga va gusu baIsrael ubasalila.

¹²Tumba banosalila bakosi beni bamarombisa baIsrael uvaga mabi mu dionyi; menu aguvu Fumu Nsambi nyivosi rie: Jogu beni na jogu beni bonangula mbela jimabi mogu.

¹³Bagobambana nami usala yisalu yiami yibuvagulitsi bupagu; bagobambana na Mbura ami jiNsambi nesi o Mbura ami Ajivu Tindi Yingitsi; bowarila yisonyi yimukilu ogu na yinsoruru atsi bamavaga.

¹⁴Kabogu yisalu yiogu yiuba ukelisa Ndagu Nsambi na bosalanga bisalu biotsu muna nesi bisusu abiusalungu muna.

¹⁵Tumba bavagulitsi bapagu abavu bisi Levi na bategula baSadoc bamansalila yisalu yiMbura ami jiNsambi ava baIsrael bamakakinina nami kabogu yika jogu bonsalila nopagulila matsi na malungu. Menu aguvu Fumu Nsambi oyidivosi.

¹⁶Yika jogu bokota o Mbura ami jiNsambi nobambana na tavula ami unsalila. Bokelisanga tindi ukelisa maruma ama nyimaruma mu dionyi.

¹⁷Ava bodibulila makotulu na dulombili dugari boduaranga biduaru abimavagu na tsanda tsilina; bagoduara ne yima yiotsu ayimavagu na mionyi ava bosalilanga bisalu o makotulu madulombili dugari nesi o gari Ndagu Nsambi.

¹⁸Boduara biviovi bitsanda jilina; bagoduara matsanda amobarombisa urugama.

¹⁹Ava bopalila uwenda o dulombili dukana agu batu bavu, bolevula biduaru biyisalu nobisunsa mu bibuku biMbura Nsambi noduara bisusu yiri batu bagobibemba; bivu biyingitsi.

²⁰Bayafuga maviolu na bayaviosulila uneyisa nanga tsiogu; tumba barebulilingi nanga tsiogu.

²¹Ne muvagulitsi upagu umosi ayanu malamu ne akakota o dulombili dugari.

²²Ayawela mukuili nesi mugetu agumabusu tumba aweli tsiemi jiIsrael; orungula uwelana na mukuili umuvagulitsi upagu.

²³Balonsi batu bami ukelula ayivu yilioma na ayivu nsoruru; babalonsi duviakusunu va gari ayivu muinsi na ayivu yilioma.

²⁴Boba bansonsi na botabula mambu dedi na migaga miami. Bokelisanga migaga miami wandi na maruma mami mabafeta na bokipanga bilumbu biami biuvuma.

²⁵Muvagulitsi upagu ayawenda ombu mfumbi mu mbari akenamu muinsi; yika pa jivu mfumbi jitaji andi ne jinguji andi nesi jimuana andi udibaala nesi jimuana andi umugetu nesi jimuana nguji andi udibaala nesi umugetu agu mbe usakawelu.

²⁶Dinolabana, oliomusu mbana bomutalila yisambuali yibilumbu ne akamuebanda yisalu.

²⁷Yilumbu ayi okotila o Mbura Nsambi nesi o dulombili tsindula dibumi. Menu aguvu Fumu Nsambi oyidirumi.

²⁸Bavagulitsi bapagu bana buvagulitsi bupagu abuvu disiala diogu; bagovegu dikabu o Israel; menu nyuba dikabu diogu.

²⁹Bojanganga abiuvagulungu nesi bipagu tsiduliomusu nesi bipagu jiutsindula dibumi. Biotsu abimawakusu na mugeli biuba biogu.

³⁰Biumanga biotsu bimilunda na miensili miotsu abi dupagulila biusambulu, bionyi biuba bibavagulitsi bapagu. Bovega bavagulitsi bapagu mapa matega yiri menu aguvu Fumu Nsambi nyubagabila miula.

³¹Bavagulitsi bapagu bayaji ne tsoli ne yibulu ayimafu yipingu vo ayimavopulu.