Read Punu Ezekiel 46 Bible Online

Ezekiel 46 - Punu bible

Ezekiel 46

¹Fumu aguvu Fumu Nsambi evosi rie: Dikotulu didulombili adugari adivu o yiari ayi wisi epalili diuba didibama mu bilumbu bisiamunu abisalulu; tumba diuba jalala yilumbu yiuvuma, diuba jalala wandi yilumbu yiyisusungi.

²Muana kaga ovioyila va piasu jidikotulu digusu kana na osikama va mugulu makutu madikotulu. Bavagulitsi bapagu bovagula pagu andi jiunyensa na pagu andi jikabusulu tsimaboti; ogudama va yilemondi yidikotulu mbana opala na dikotulu digodibama te na tsisiga.

³Bisi bulongu bogudama va gusu Fumu va dikotulu dieni mu bilumbu biuvuma nesi bibisusungi.

⁴Pagu jiunyensa aji muana kaga ovagulila Fumu yilumbu yiuvuma jiuba balumi babindombu basiamunu abigaa na bifu na muiumi yindombu agugaa na yifu;

⁵na pagu andi jitsangu jiuba magumarieru makilu tsible va mosi na muiumi yindombu na bisusu abi oronda usobana. Obuesanga mbuta yisiamunu tsimatsi usobana na magumarieru makilu tsible.

⁶Yilumbu yiyisusungi ovagula muiumi ngombi agugaa na yifu na baana basiamunu babindombu na muiumi yindombu umosi abigoba na bifu.

⁷Obuesanga magumarieru makilu tsible va mosi na muiumi ngombi na muiumi yindombu na bisusu abi oronda usobana va mosi na baana babindombu. Obuesanga mbuta yisiamunu tsimatsi usobana na magumarieru makilu tsible.

⁸Ava muana kaga okotila ovioyila va piasu jidikotulu na avana opalila wandi.

⁹Ava bisi bulongu bokelasila va gusu menu aguvu Fumu mu temu bafeta, jandi agukotila va dikotulu dibanda uyegudama, opalila o dikotulu ditandu; agukotila o dikotulu ditandu opalila o dikotulu dibanda.

¹⁰Muana kaga okota va mosi nogu ava bokotila na opala ava bopalila.

¹¹O bafeta bamunongu na munongu pagu jiuba magumarieru makilu tsible va mosi na muiumi ngombi na muiumi yindombu. Mutu mutu ovega abi erondi usobana na baana babindombu. Obuesanga mbuta yisiamunu tsimatsi usobana na magumarieru makilu tsible.

¹²Pa muana kaga ovagulila Fumu pagu jiunyensa jitondini vo ne pagu jitondini jikabusulu tsimaboti bomudibulila dikotulu diyiari ayi wisi epalili mbana ovagula pagu andi jiunyensa na pagu andi jikabusulu tsimaboti dedi mosi nana odivayila yilumbu yiuvuma; mbana opala; yika epali bodibiga.

¹³Yilumbu na yilumbu gukavagulila Fumu pagu jiunyensa; muana yindombu agukavu yilima yimosi agugaa na yifu; gukajivagulanga kedi tsiotsu.

¹⁴Kedi tsiotsu gukabuesanga muna pagu tsieni kilu yiranu tsifufu atsiusobunu na mbuta beji tsimatsi. Ajina jivu pagu jiFumu; maruma mapagu tsieni tsiyilumbu na yilumbu mobanganga mutubu.

¹⁵Muana yindombu na fufu na matsi biuvagulungu pagu tsiFumu kedi na kedi te na mutubu.

¹⁶Fumu aguvu Fumu Nsambi evosi rie: Pa muana kaga ovega muana andi umosi dikabu didisiala adi amabongila mu disiala diandi, dikabu dieni diuba disiala dibaana bandi bababaala botsu.

¹⁷Tumba pa ovega musalitsi andi umosi dikabu adi amabongila mu disiala diandi, dikabu dieni diuba diandi yika te na yilima yidujegusu mbana diugabuga ombu muana kaga. Disiala diandi diubanganga yika baana bandi bababaala.

¹⁸Muana kaga agobonga ne yima yimosi mu disiala dibatu na agobapatula bima biogu; abi ovega disiala ombu baana bandi bababaala obibongila mu bima bijaʼ beni yiri ne mutu mosi va gari batu bami bagopatulu bima biogu.

¹⁹Motsu mana manovioga, mulonsi ami nsila amapiosila o dikotulu adivu o yiari yibibuku bindagu bibavagulitsi bapagu abivu o banda; avana vamaba mbura o ndunga jiyiari ayi wisi ewendisini,

²⁰amansingula rie: Ajiji jivu mbura aji bavagulitsi bapagu bolambilanga nyama tsipagu tsimbela na tsiutsindula dibumi na avana bolambilanga pagu yiri tsigobegu o dulombili dukana; batu baketsibemba mu mbari tsivu yingitsi.

²¹Mbana amamuembega o dulombili dikana na amapiosa va gari bitungu biotsu bibina bidulombili. Yitungu yitungu yimaba na mua dulombili.

²²O bitungu biotsu bibina bidulombili umaba ndombili tsidibama: usakama utsionyi magumabeji mametera na uroga yigumi na metera yiranu; tsiotsu tsijina tsimaba dedi.

²³Yivaga yimatsiengila tsiotsu tsijina; mu mugula yivaga umabangusu miuji ulambilanga.

²⁴Amansingula rie: Atsina tsivu mbura tsiulambila atsi basalitsi baNdagu Nsambi bolambilanga nyama tsipagu tsiunyensa atsi batu bovagulanga.