Read Punu Ezekiel 47 Bible Online

Ezekiel 47 - Punu bible

Ezekiel 47

¹Mbana amakabusa o yiari yidikotulu diNdagu Nsambi. Mbana nyimalaba mamba amamapalilanga o tsi yilemondi yiNdagu Nsambi o yiari ayi wisi epalili mu mbari Ndagu Nsambi jimagengila o yiari ayi wisi epalili; mamba mamavindamanga o yiari yimabaala maNdagu Nsambi, diwendi rie: o tandu jiyinyensulu yipagu.

²Amapiosila o nsila jidikotulu dibanda na amansieengisa o gusu kana te no dikotulu adisungasana o wisi epalili. Mamba mamavindamanga o yiari yimabaala.

³Ava mutu amakuekila o yiari ayi wisi epalili amaba na mukudu va dikaka na amawetsiga kama yiranu tsimetera. Mbana amansabusa mamba na mamba mamaba te no bapansi.

⁴Amamuewetsiga kama yiranu tsimetera na amamuensabusa mamba na mamba mamaba te no makotukk Amamuewetsiga kama yiranu tsimetera na amamuensabusa na mamba mamaba te no dilungu.

⁵Amamuewetsiga kama yiranu tsimetera; umaba mujamba agu nyisamarungula usabuga mu mbari ndonga jimaba jineni, usabuga vengu uriala; umaba mujamba uneni agu basamarungula usabuga.

⁶Amakwivula rie: Ezekiel gumalaba buranga? Mbana amakabusa o mugula mujamba.

⁷Anokabusa, nyimalaba miri mipuela mipuela disimu na disimu.

⁸Amansingula rie: Mamba memama movindama o yiari ayi wisi epalili te no kumu na moyesupuga o mubu; manosupuga o mubu mamba mamubu mokaluga maposi.

⁹Biotsu abivu abilingi biubanganga monyu o mbura tsiotsu atsi mamba movindamanga na banyama bamamba bofunanga; mbura tsiotsu atsi mamba meni motola, mamba makaluga maposi te na biotsu biubanganga monyu.

¹⁰Balobitsi boba mu migula mimujamba eni; ubandila o En-Guedi te no En-Eglaim, boyenaliganga bambusa; voba banyama bamamba bamunongu na munongu, dedi mosi na banyama bamubu aguneni; bofuna tindi ufuna.

¹¹Tumba manga ma-uonyi motsu magokaluga mamba maposi, moba mawelimina udila musayi.

¹²Mu masimu motsu mabeji mamujamba mobenda minongu miotsu mimiri amiburi milunda. Magaji mamiri mieni magogumuganga na milunda migoba na temu, miuwelanga tsungi tsiotsu mu mbari mamba mopalilanga o Mbura Nsambi. Milunda miuligungu; magaji mamionyi mobanganga bilongu.

¹³Fumu aguvu Fumu Nsambi evosi rie: Nyudulasa mandilu mabulongu abu yigumi na bifumba bibeji bogabana disiala. Yifumba yiJoseph odila makabu mabeji.

¹⁴Jenu botsu dudila makabu dedi; nyimavangana na nyimajiwarisa na pesi ubuvega ombu bataji benu. Kabogu dugabana bulongu buebubu.

¹⁵Mandilu mabulongu amama: o yiari yibanda ubandila o mubu uneni uduka nsila jiHetlon na Lebo-Hamat te no Sedad,

¹⁶mbana o misiengi miemimi: Berota na Sibraim va gari mandilu mayiari yiDamas na Hamat nesi yiHasser-Tikon o yiari yimandilu maHauran.

¹⁷Anana mandilu mobila ubandila o mubu te no yiari Hassar-Enan o yiari ayi wisi epalili. O banda molabusana na bufumu buDamas na buHamat. Amana moba o yiari yibanda.

¹⁸O yiari ayi wisi epalili moba va gari Hauran na Damas, movioyila va yibususu yiJourdain o yiari yiGalaad na yibulongu buIsrael; na movindama te no Tamar va mugula uMubu uDufu. Anana mobila o yiari ayi wisi epalili.

¹⁹O yiari yitandu ubandila o Tamar te no mamba maMeriba o Cades te no mujamba aguvu o yiari yimubu aguneni. Anana mobila o yiari yitandu.

²⁰O yiari ayi wisi ewendisini moba o mubu uneni ubandila vana mandilu te no sungasana na Lebo-Hamat. Anana mobila o yiari ayi wisi ewendisini.

²¹Dukagabana bulongu nana bifumba biIsrael bivu.

²²Dukabuaga mbanda ugabana disiala va gari jenu na jenu na benyi aboba nenu aboburanga baana; dukabagengila nderi batsiga va gari baIsrael; badili disiala va mosi nenu ava dubuayila mbanda.

²³Dukavega muenyi disiala diandi va mosi na yifumba ayi etsanini. Menu aguvu Fumu Nsambi oyidirumi.