Read Punu Ezekiel 48 Bible Online

Ezekiel 48 - Punu bible

Ezekiel 48

¹Miina mabifumba amama: Ubandila O o kodu banda mu nsila jiotsu jiHetlon te no Lebo-Hamat te no Hassar-Enan o yiari yibufumu buDamas na buHamat ubandila o yiari ayi wisi epalili te no mubu o yiari ayi wisi ewendisini: adina dikabu diDan na yifumba yiandi.

²Mu mandilu maDan ubandila o yiari ayi wisi epalili te no yiari ayi ewendisini: adina dikabu diAsser na yifumba yiandi.

³Mu mandilu maAsser ubandila o yiari ayi wisi epalili te no yiari ayi wisi ewendisini: adina dikabu diNeftali na yifumba yiandi.

⁴Mu mandilu maNeftali ubandila o yiari ayi wisi epalili te no yiari ayi wisi ewendisini: adina dikabu diManasse na yifumba yiandi.

⁵Mu mandilu maManasse ubandila o yiari ayi wisi epalili te no yiari ayi wisi ewendisini: adina dikabu diEfraim na yifumba yiandi.

⁶Mu mandilu maEfraim ubandila o yiari ayi wisi epalili te no yiari ayi wisi ewendisini: adina dikabu diRuben na yifumba yiandi.

⁷Mu mandilu maRuben ubandila o yiari ayi wisi epalili te no yiari ayi wisi ewendisini: adina dikabu diJuda na yifumba yiandi.

⁸Mu mandilu maJuda ubandila o yiari ayi wisi epalili te no yiari ayi wisi ewendisini: adina dikabu adiugusulu, diuba uroga na usakama uyigumi na kilumetera beji na yibuku; yifumba yifumba dikabu dimosi. Mbura Nsambi jiurungu va gari.

⁹Dikabu adi dugusulila Fumu diuba na usakama uyigumi na kilumetera beji na yibuku na uroga uyigumi yikilumetera.

¹⁰Dikabu dieni diFumu diuba dibavagulitsi bapagu: yigumi na kilumetera beji na yibuku ubandila o yiari ayi wisi epalili te no yiari ayi wisi ewendisini na kilumetera yiranu o yiari yibanda na kilumetera yiranu o yiari yitandu. O gari dionyi Mbura Nsambi jiurungulu.

¹¹Diuba ditindi bavagulitsi bapagu; bategula baSadoc. Jogu bamasala yisalu yiFumu o Mbura Nsambi; basamatsimbu ava baIsrael na bisi Levi bamatsimbulu.

¹²La dibandu diuba dikabu diogu adiuba tindi yingitsi; diugusulu va mbura aji dimagusululu va mugula mandilu mabisi Levi.

¹³Dikabu dibisi Levi diubambana na dibavagulitsi bapagu, diuba usakama uyigumi na kilumetera beji na yibuku na uroga ukilumetera yiranu.

¹⁴Bagorungula usumbisa bulongu buebubu nesi ubusopana nesi ubugabila mutu mu mbari bumawakusu ombu Fumu.

¹⁵Dikabu adiusiala diuba uroga ukilumetera beji na yibuku na usakama uyigumi na kilumetera beji na yibuku. Diuba mbura urungila mandagu na ndombili tsimonyi. Musiengi uba va gari;

¹⁶bietsu biuba dedi yiari na yiari: kadi yiari kilumetera beji na mua yibuku.

¹⁷Musiengi uba na dulombili duroga dukama mosi na magumabeji na metera maranu.

¹⁸Mbura ajiusialulu jiuba dedi na mbura ajimawakusu, kilumetera yiranu o yiari yibanda na kilumetera yiranu o yiari yitandu. Mbura eni jiupalisa biguji biwelimina ulisila abesali o musiengi.

¹⁹Yifumba yika la yifumba yiIsrael ayiusalanga bisalu bimusiengi yiujivaranga.

²⁰Dikabu diotsu adimagusulu diuba yigumi na kilumetera beji yiari na yiari.

²¹Adiusiala diuba dimuana kaga o biari biotsu bibeji biMbura Nsambi no musiengi, usakama na uroga biuba dedi: yigumi na kilumetera beji na yibuku te no yiari ayi wisi ewendisini te no yiari ayi wisi epalili ubandila vana te no mubu.

²²Dikabu dibisi Levi na dikabu dimusiengi moba o gari dikabu dimuana kaga. Dikabu va gari dikabu diJuda o banda na diBenjamin o tandu.

²³Miina mabifumba bisusu amama: Dikabu diBenjamih ubandila o yiari ayi wisi epalili te no mubu o yiari ayi wisi ewendisini: adina dikabu diBenjamin na yifumba yiandi.

²⁴Mu mandilu maBenjamin ubandila o yiari ayi wisi epalili te no yiari ayi wisi ewendisini: adina dikabu diSimeon na yifumba yiandi.

²⁵Mu mandilu maSimeon ubandila o yiari ayi wisi epalili te no yiari ayi wisi ewendisini: adina dikabu diIssakar na yifumba yiandi.

²⁶Mu mandilu maIssakar ubandila o yiari ayi wisi epalili te no yiari ayi wisi ewendisini: adina dikabu diZabulon na yifumba yiandi.

²⁷Mu mandilu maZabulon ubandila o yiari ayi wisi epalili te no yiari ayi wisi ewendisini: adina dikabu diGad na yifumba yiandi.

²⁸Mu mandilu maGad o yiari yitandu, o tandu mandilu mobandila o Tamar te no mamba maMeriba o Cades te no mujamba o yiari yimubu uneni.

²⁹Abuna buvu bulongu nana bugabinina ava dubuayila bifumba biIsrael mbanda. Menu aguvu Fumu Nsambi oyidirumi.

³⁰Makotulu mamusiengi amama: o yiari yibanda kilumetera beji na mua yibuku,

³¹makotulu mamusiengi mamalugu miina mabifumba biIsrael, o banda makotulu marieru: dimosi diRuben na dimosi diJuda na dimosi diLevi.

³²O yiari ayi wisi epalili kilumetera beji na mua yibuku, makotulu marieru: dimosi diJoseph na dimosi diBenjamin na dimosi diDan.

³³O yiari yitandu kilumetera beji na mua yibuku, makotulu marieru: dimosi diSimeon na dimosi diIssakar na dimosi diZabulon.

³⁴O yiari ayi wisi ewendisini kilumetera beji na mua yibuku, makotulu marieru: dimosi diGad na dimosi diAsser na dimosi diNeftali.

³⁵Usakama uotsu utsiengila musiengi: yifu yikilumetera. Ubanda na yilumbu yieni musiengi unengulungu rie: Fumu avu vava.