Read Punu Ezekiel 5 Bible Online

Ezekiel 5 - Punu bible

Ezekiel 5

¹Nsambi amatuma rie: Ndeʼ muana mutu bonga dijenga adivu mengu, disalisi nderi disambi dimufuyitsi biedu; gukafuga muru agu na yiedu yiagu. Gukabonga mudodu upitsa nanga tsiagu mbana gukatsigaba makabu marieru.

²Gukanyensa dikabu dimosi o musiengi ava bilumbu biukandu biusukila. Gukabonga dikabu adimubeji, gukadipansa na dijenga o musiengi uotsu. Gukakuka dikabu adimurieru; punga jiutsivembula, nyudiduka na dijenga.

³Gukabonga mua tsimosi atsimagunama mu difubu diyikutu yiagu notsisuega mu posi agu.

⁴Gukabonga tsimosi, gukatsibuaga o muji; tsikanyenga. Avana vopalila muji agunyensa baIsrael botsu.

⁵Menu aguvu Fumu Nsambi nyivosi rie: Gengilanu Jerusalem agu nyimasunsa va gari malongu amegutsiengili yiari na yiari.

⁶Bisi Jerusalem bamasumuna migaga miami na mamma mami na bavu na mbela jiotsu uviolila malongu amebatsiengili yiari na yiari; bamalensa migaga miami na basamakipa maruma mami.

⁷La dibandu menu aguvu Fumu Nsambi nyivosili rie: Jenu dumaba mimbini uviolila bisi malongu amedutsiengili yiari na yiari mu mbari dusamakipa mamma mami na dusamadedila migaga miami na dumakipa migaga mimalongu amedutsiengili yiari na yiari;

⁸mu dionyi menu aguvu Fumu Nsambi nyivosili rie: Nyina kueru nenu, nyududugusulu kaka tsiami va misu mabisi malongu.

⁹Mu diambu dinsoruru tsienu tsiotsu nyuduvayila adi nyisakavaga na kala na ngomuedivaga, via.

¹⁰Diwendi rie: Va gari enu, bataji bojanganga baana bogu; baana bojanganga bataji bogu; nyududugusulu kaka tsiami na nyupansa bansialutsu benu yiari na yiari.

¹¹Menu aguvu Fumu Nsambi nyimaleva rie: Nyijabi! Mu mbari dumabivisa Mbura ami jiNsambi na bakosi benu botsu na nsomm tsienu tsiotsu, me wami nyukegusula na ngomuedulasa yingeba; ngomueduwamusa, via.

¹²Dikabu dimosi mu marieru dibatu benu boboku na yivunga na bogudusu na dungosu dunsala; dikabu adimubeji diuboku na dijenga na nyupansa dikabu adimurieru o biari biotsu na nyubaboka na dijenga.

¹³Anana nyusukisila kabu ami na nyuduwitilila fuiri ami; nyudugusu pila tsiami mbana dujaba yiri menu Fumu nyimavosa na kabu ami ava nyimaduwitilila fuiri ami.

¹⁴Nyukalusa Jerusalem mbura ajigaa na mamba na nyugulasa yisonyi. Bisi malongu amedutsiengili yiari na yiari nesi baviosi bansila bodilaba.

¹⁵Jerusalem ulasu yisonyi yineni, urekungu na ulabu nderi yisanunu yibisi malongu amegutsiengili ava nyugudugusulu kaka tsiami na kabu na fuiri na mikilu mineni. Menu Fumu oyiditubuli.

¹⁶Ava nyudutindila dungosu duneni dunsala adubokisa batu; duonyi dudubunga; nyurangisa dungosu dunsala notsiemusa biguji biotsu.

¹⁷Nyutinda dungosu dunsala na bibulu abiubokisa baana benu; yivunga na dufu biulabananga va gari enu. Nyudutindila divita; menu Fumu oyiditubuli.