Read Punu Ezekiel 7 Bible Online

Ezekiel 7 - Punu bible

Ezekiel 7

¹Fumu amansingula rie:

²Ndeʼ muana mutu gulu adi menu Fumu Nsambi nyivosi na baIsrael rie: Laba disukusulu dimatola; dubungu dusita unyava duinyavi o biari biotsu bibina bibulongu.

³Mbana disukusulu dimagurasuna; nyudulasa kabu ami; nyudutabulila bunsonsi dedi na bifu bienu; nyudugabusilapila mu nsoruru tsienu tsiotsu.

⁴Ngomuedulasa yingeba; ngomueduwamusa, via. Nyudugabusila pila mu bifu bienu bibi na nsoruru tsienu; mbana dujaba yiri menu nyivu Fumu.

⁵Menu aguvu Fumu Nsambi nyivosi rie: Ka muna dubungu du, dubungu dumunongu adusakalabana na kala!

⁶Disukusulu uruga duiruyi; dubungu uruga duiruyi! Guluanu uruga duiruyi!

⁷Jenu bisi bulongu temu jidubungu duenu uruga jiruyi! Yilumbu yibunsonsi utola yitoli na ubambana yibambini. O mikongu uisaa migamu minsangu yika midubungu!

⁸Namapapa nyudulasa fuiri ami; nyudutabulila bunsonsi dedi na bifu bienu; nyudugabusila pila mu nsoruru tsienu tsiotsu.

⁹Ngomuedulasa yingeba; ngomueduwamusa, via. Nyudugabusila pila mu bifu bienu bibi na nsoruru tsienu. Mbana dujaba yiri menu nyivu Fumu oyidudimbi.

¹⁰Yilumbu yibunsonsi uruga yiruyi! Temu jidubungu jimatola! Dikasi dimalabana! Dunangu dumalabana!

¹¹Dikasi divu nderi nguangu udimbila. Vagosiala ne mutu mosi va gari enu, nesi binombu bienu, nesi busina buenu nesi bundumbabuenu!

¹²Temu jimatola, yilumbu yibunsonsi ubambana yibambini! Musumbitsi ayasangila, musumbisitsi ayakenyongisa! Mu mbari kabu ami jimawitulu batu botsu.

¹³Musumbisitsi agomueba fumu bima abi amasumbisa ne pa aki monyu. Mbigulu atsimabiga dubungu tsimadugusu. Batu botsu bevayi dimbunga, ne mutu mosi agodila monyu.

¹⁴Mumbanda umasigu; motsu mamakunsama tumba ne mutu mosi agewendi utoga divita mu mbari kabu ami jimawitulu yinombu yiotsu.

¹⁵Va gusu kana dijenga dibokingi o gari ndagu yika yivunga. Jandi aguvu o musiru oboku na divita na jandi aguvu o musiengi ofu na nsala nesi yivunga.

¹⁶Bansialutsu bamosi borina na boyenalinganga o julu tsimikongu nderi mabembi ametatingi; mutu mutu onyonga mu diambu dimabi mandi.

¹⁷Makaka motsu mavu madeda makotulu motsu yika uregama.

¹⁸Bamaduara basiela bamagaangu na goma jineni; botsu bavu tsokudu bamafuga maviolu.

¹⁹Bobuaga lora tsiogu tsivema mu mansila na tindi lora tsiogu tsiukaluga nsoruru; lora tsiogu tsivema na tindi lora tsiogu tsigorungula ubawaka kalala mu yilumbu yikabu jiFumu. Busina buogu bugorungula uvotsa nsala tsiogu diuleba buonyi bumabarombisa uvaga mabi.

²⁰Bima biboti abimaba nogu bivu dunangu duogu. Na bionyi bamavaga bakosi bansoruru La dibandu Fumu amavosila rie: Nyubikalusa bima bimuinsi.

²¹Nyusingisa benyi ubola busina buogu na batu babi ukinda buonyi.

²²Nyubaliyila nsima ava Mbura ami jiubivusulu: badayitsi bokota guna na bojivaga muinsi.

²³Kunsa panga mu mbari bulongu bumabasa na bukongu musiengi umabasa na dikasi.

²⁴Nyunengila tindi batu babi yiri bobapatula mandagu mogu. Nyutsiemusa dunangu dubango mangolu na mbura tsiogu tsiduyitsu tsiubivusu.

²⁵Dubungu uruga duiruyi! Boromba uwaku kalala tumba bagowaku kalala!

²⁶Bolabanga maguga va julu maguga, nduku jiugulunu va july nduku; bowivula mubiyitsi mbigulu, bavagulitsi bapagu bolibana migaga, bivunda bagomueba na malongi.

²⁷Kaga oduara yifuila, muana kaga obakama murima, bisi bulongu boregamanga na goma. Nyubasaka dedi mosi nana bamasalilanga, nyubatabulila bunsonsi buwelimina. Mbana bojaba yiri menu nyivu Fumu.