Read Punu Ezekiel 8 Bible Online

Ezekiel 8 - Punu bible

Ezekiel 8

¹Mu yilima yimusiamunu na mu yilumbu yimuranu yitsungi jimusiamunu bibukoli buetu, nyimaba nyitsana o ndagu ami na bivunda biJuda. Avana mangolu maFumu Nsambi mamasundila ukaanga.

²Nyimagengila na nyimalaba yima ayimaba na yibagunu yimutu: ubandila va dilungu diandi te no matambi amaba nderi muji na ubandila va dilungu te no muru amalulanga nderi kunga ajiluli.

³Amasamba yibagunu yidikaka na amakaanga nanga. Yinyunyi amambatisa va yiliyili na amambega muna biriariamu biNsambi te no Jerusalem va dikotulu adigari adivu o yiari ayibanda; aguna umaba kosi ajirombis diwavi diFumu.

⁴Sundila bundumba buNsambi Israel bumaba vana; dedi mosi nana nyimabulabila mu yiriariamu o yibususu.

⁵Nsambi amansingula rie: Ezekiel buaga misu o yiari yibanda! Nyimabuaga misu o yiari yibanda na nyimalaba kosi eni ajimarombisa Nsambi diwavi; jimaba o banda o yiari yidikotulu diyinyensulu yipagu.

⁶Mbana amakwivula rie: Ezekiel guilabi nsoruru tsineni atsi baIsrael bevayi atsiutombisa ukakana na Mbura ami jiNsambi? Lekelati o gusu gulaba tindi nsoruru!

⁷Mbana amambega o dikotulu didulombili dukana duNdagu Nsambi. Nyimagengila na nyimalaba diluta adimatobu mu yivaga.

⁸Nsambi amansingula rie: Ezekiel toba yivaga. Nyimatoba yivaga na nyimavaga diviogulu.

⁹Mbana amabuela rie: Kota nolaba nsoruru tsineni atsi bevayi vava.

¹⁰Kabogu nyimakota na nyimalaba bigolini bibibagunu bibilandila na bibibulu binsoruru na bibakosi botsu babaIsrael, bimasonu va yivaga yiari na yiari.

¹¹Nyimalaba magumidusambuali mababaala abamaba bivunda biIsrael, va gari ogu vamaba Yazania muana dibaala uChafan. Bamakutama va gusu bibagunu bibakosi beni, mutu mutu na yisunsulu yimuji va dikaka ayimapalisanga nsumbili jimbungajiboti.

¹²Mbana Nsambi amakwivula rie: Ezekiel guilabi ama bivunda biIsrael bevayi o tsi pisama? Mutu mutu ana mbura jikosi andi. Jogu bevosi rie: Fumu agetulabi, amabusa dilongu diedidi.

¹³Amabuela rie: Lekelati o gusu gulaba tindi nsoruru atsibovaganga.

¹⁴Amambega o dikotulu o yiari yibanda yiNdagu Nsambi. Avana vamaba bagetu batsana abamalilanga Tammouz.

¹⁵Amakwivula rie: Ezekiel guilabi? Lekelati o gusu gulaba tindi nsoruru atsiviolila tsina.

¹⁶Mbana amambega o dulombili adugari Ndagu Nsambi. Va dikotulu diNdagu Nsambi va gari piasu na yinyensulu yipagu vamaba magumabeji na babaala baranu abamaliyila Mbura Nsambi nsima na bamagengila o yiari ayi wisi epalili, bamayekutama uyitsa wisi.

¹⁷Amakwivula rie: Ezekiel guilabi? Je divu diambu digeyi ombu baJuda uvaga nsoruru atsi bevayi vava? Bebasi bulongu na dikasi na unyoyisa benyoyisi. Labati uruga beruyi na bitsafinyi mu mambasu mogu.

¹⁸Me wami nyubalasa fuiri; ngomuebalasa yingeba; ngomuebawamusa, via. Ne pa bokamuyila migamu mineni ngobagulu.