Read Punu Daniel 1 Bible Online

Daniel 1 - Punu bible

Daniel 1

¹Mu yilima yimurieru yidurumu duJoaquim kaga jiJuda, Nabucodonosor kaga jiBabylone amayetoyisa Jerusalem na amagukanda.

²Fumu amawakisa Joaquim kaga jiJuda ombu gandi va mosi na bisalulu bimosi biNdagu Nsambi. Nabucodonosor amayenabega bakoli o Babylone na amasunsa abimakindu o yilundulu o Ndagu Nsambi andi.

³Kaga amaruma Achpenaz agumaba yivunda yimivangu miandi usola bafudu bamosi baIsrael bayifumba yikaga nesi bamukuta ubaneni.

⁴Bafudu abagaa na yifu, abavu tindi baboti, abavu na tindi diela na dujabu, abamawiji tindi uwiji na abavu bawelimina usala o ndagu kaga. Bolonsu mirendu na mbembu jibisi Babylone.

⁵Yilumbu na yilumbu kaga amabasingisa biguji bitavula andi na malamu ama amanuanganga; amaronda ubabungula te na bilima birieru; va disukusulu dibilima bieni mbe bokota o yisalu yikaga.

⁶Va gari ogu vamaba Daniel na Hanania na Michael na Azaria, abamaba baJuda.

⁷Yivunda yimivangu amabaluga miina: Daniel amalugu Beltassar; Hanania amalugu Chad-rac; Michael amalugu Mechak na Azaria amalugu Abed-Nego.

⁸Daniel amatabula diambu yiri agokebivisa na biguji bikaga nesi malamu ama kaga amanuanganga. Amalembiyila yivunda yimivangu yiri ayamutsotsa ukebivisa.

⁹Nsambi amarombisa yivunda yimivangu usinga dulembu duDaniel nomulasa maboti mamunongu na munongu.

¹⁰Yivunda yimivangu amatsingula Daniel rie: Nyidumi fumu ami, kaga agumakunsa abi jenu dujanganga nonuanganga. Diwelimina yiri ogulaba gumagasa uviolila bambatsi bagu? Gutombisa utabulu muru na kaga.

¹¹Mbana Daniel amawaka mukelisi agu yivunda yimivangu amaruma ukelisa Daniel na Hanania na Michael na Azaria rie:

¹²Le wetsig a te na yigumi yibilumbu, bakatuveganga yika magaji na mamba.

¹³Mbana gukagengila binsi bietu na bibafudu abeji biguji bikaga, gukavayila basalitsi bagu adi gulaba diwelimina.

¹⁴Amabasingisa ama bamamuwivula, amabawetsiga te na yigumi yibilumbu.

¹⁵Yigumi yibilumbu binovioga basamagasa na bamavonga ne uviolila bambatsi bogu abamajanganga biguji bikaga.

¹⁶La dibandu mukelisi asamamuebaveyila biguji na malamu abi mbe bamadila, amabaveganga yika magaji.

¹⁷Nsambi amavega bafudu beni bana diela na dujabu dumirendu miotsu, diwendi rie: tindi diela. Va julu vana Daniel amavindiganga biriariamu biotsu na amawalulanga mandosi motsu.

¹⁸Bilima abi kaga amakunsa umuelabana nogu binodugu yivunda yimivangu amababega ombu Nabucodonosor.

¹⁹Kaga amamoga nogu; va gari bafudu beni botsu basamaba ne umosi agumaba nana Daniel na Hanania na Michael na Azaria. Kabogu jogu bamasolu usala bisalu bikaga.

²⁰Kaga anobawivula puela mambu amalaba yiri bamaba na diela dineni na dujabu adumaviolila tindi uviolila dubavanditsi nesi abewiji bambuelili abamaba mu bufumu buandi buotsu.

²¹Anana Daniel amatsaninanga te na yilima yitega yidurumu dukaga Cyrus.