Read Punu Daniel 8 Bible Online

Daniel 8 - Punu bible

Daniel 8

¹Mu yilima yimurieru yidurumu dukaga Baltazar, menu Daniel nyimamuelaba yiriariamu, tsiri ayi nyimalelaba.

²Ava nyimalabila yiriariamu, nyimalaba yiri nyivu o Suse, musiengi uneni uyiari yiElam; muna yiriariamu yiami nyimaba va mugula mujamba uOulai.

³Nyimabuaga misu na nyimalaba mulumi yindombu agumaba va mugula mujamba, umaba na masiyi mabeji, masiyi meni mamaba masakama tumba dimosi dimaba diviolila disusu usakama, adina dimasita ubenda.

⁴Nyimalaba mulumi yindombu udimba uidimbi na masiyi mandi o yiari ayi wisi ewendisini no banda no tandu; ne yibulu yimosi yisamarungula ugagana na uonyi na vasamaba mutu uwaka aba yindombu yieni yimadimba kalala. Umavaganga adi umarondanga na umaba na tindi mangolu.

⁵Ava nyimagengililanga yisuisu nyimalaba mulumi yinsabi umapalila o yiari ayi wisi ewendisini na umayenapuramuganga yiari na yiari tsiri ubemba butamba. Mulumi eni yinsabi umaba na disiyi dineni va gari misu.

⁶Umatola te nombu mulumi yindombu agumaba na masiyi, agu nyimalaba va mugulu umujamba, umagurasuna na kabu andi jiotsu.

⁷Nyimagulaba ubambana uibambini na mulumi yindombu na umagulogula masiyi. Mulumi yindombu usamadila mangolu ugagana na uonyi; umabubeta va tsi na umagutsiarila na vasamaba mutu uwaka mulumi yindombu kalala.

⁸Mulumi yinsabi umaba na tindi mangolu. Va temu aji mangolu mandi mamamata tindi umata disiyi diandi dineni dimaloguga; masiyi masusu maneni mana mamabenda va yivinga yidionyi, disiyi disiyi dimagengila yiari, diwendi rie: biari bina bipunga.

⁹Disiyi dimosi va gari masiyi meni dimabendisa disiyi disusu digeyi mbana dimaroga tindi uroga na dimagengila o yiari yitandu no yiari ayi wisi epalili no yiari yidilongu adiviolili motsu ubueji.

¹⁰Dimadila mangolu utu-muna dibadi dijulu na dimabondusa dikabu dimosi dibambuelili na dimabatsiarila.

¹¹Dimalensa yivunda yidibadi dijulu na dimamupatula pagu jimutubu na dimapansa Mbura andi jiNsambi.

¹²Dibadi dijulu dimadiwakusu va mosi na pagu jiyilumbu na yilumbu. Disiyi dimabuaga ngensa va tsi na dimalunga tindi ulunga.

¹³Mbana nyimagulu yiansa uvosa evosi. Yiansa yisusu yimamuwivula rie: Te na temu yi mambu mayiriariamu modugusulu? Pagu jiyilumbu na yilumbu temu yi jiumuelabinina? Te na temu yi Mbura Nsambi na mangolu madibadi dijulu biutsiarulungu?

¹⁴Yiansa yitega yimamuwaka rie: Te na tosini mosi na kama na magumaranu manyangu na tosini mosi na magumaranu mamikolu; mbana Mbura Nsambi jiumueba jilioma.

¹⁵Tumba menu Daniel nyimalaba yiriariamu yieyiyi na nyimaronda uyitsiyisa; vamalabana mutu agumaba na yibagunu yidibaala na amaretsama va gusu ami.

¹⁶Nyimagulu diufi didibaala adimagulunu o gari Oulai, amagamuga rie: Gabriel, muvindiyili yiriariamu.

¹⁷Kabogu amakueka bebeli nami; anokueka nyimaregama na nyimagudama va tsi. Amansingula rie: Daniel, ba limba nogulu; yiriariamu yilasi temu ajiusita.

¹⁸Ava atsivosilanga nami nyimaba timbila te na nyimagudama va tsi. Amansagumusa na amateliga vana mbura aji nyimaba.

¹⁹Mbana amansingula rie: Nyirondi ugutsingula adiulabana mu diambu dikabu jiNsambi; temu jidusukusulu jimakunsu kala.

²⁰Mulumi yindombu agu gumalaba na masiyi mabeji mavu bakaga baMede na baPerse.

²¹Mulumi yinsabi uvu bufumu buGrece. Disiyi dineni adimaba va gari misu mandi divu kaga jitega.

²²Masiyi mana amamabenda va yivinga yidisiyi adimalogulu mavu bufumu buina abulabana mu dilongu dieni tumba bugoba na mangolu dedi na buonyi.

²³Va disukusulu didurumu duogu ava bavayitsi bamasumu bodugusulu masumu mogu, volabana kaga ajiuba na dunangu noba musoyitsi udiela.

²⁴Mangolu mandi mofunanga tumba tsiri mangolu majaʼ beni. Orombisa tindi dubungu, olunga mu bisalu biandi, obunga bango mangolu na batu abaNsambi.

²⁵Mu diambu dimalengu mandi na didiela diandi uyenasoganga, obokisa babaala bapuela abamaletasa yiri bavu sui. Otoga na Kaga jibakaga; tumba osundila ubetsu tsiri na mutu.

²⁶Adina divu divindugulu diyiriariamu yibatsisiga na bakedi; ayimavosu yivu yingensa tumba ndeʼ guyayivosa; yionyi yilasi ayiuba o gusu.

²⁷Menu Daniel nyimaba timbila bilumbu bipuela na nyimabelanga; mbana nyimaretsama na nyimasingana na bisalu bikaga. Nyimakambulu na yiriariamu yieni mu mbari nyisamayitsiyisa.