Read Punu Daniel 9 Bible Online

Daniel 9 - Punu bible

Daniel 9

¹Mu yilima yitega yiDarius muana dibaala uXerxes agumaba mu yitumba yibaMede, jandi agumaba kaga jibufumu bubisi Babylone,

²mu yilima yitega yidurumu duandi menu Daniel nyimalaba mu mabuku yiri Jerusalem usiala mududu te na magumidusambuali mabilima abi Fumu amatsingula Jeremie mubiyitsi.

³Nyimageluga ombu Fumu Nsambi usambila nesi ulembiyila na nyimabusa uji na nyimaduara siela nesi ugolana dibufu.

⁴Nyimasambila Fumu Nsambi ami na nyimamutubulila rie: Aa Fumu Nsambi, Nsambi Aguvu Uneni na Aguvu na diduma, ndeʼ aguikelisi pangini agu na aguilasi yingeba ombu abegurondi na abekelisi maruma magu,

⁵jetu tumavaga masumu, tumavaga mabi, tumaba batu babi na tumaba mimbini, tumaliyila maruma magu na migaga miagu nsima.

⁶Tusamagululu basalitsi bagu babiyitsi abamavosa mu diina diagu ombu bakaga betu na bivunda bietu na bataji betu na bisi bulongu buotsu.

⁷Ndeʼ Fumu gugaanansimbulu! Mbe ka jetu tugaa na disusu yika ukesunsa; jetu babaala baJuda na bisi Jerusalem na baIsrael botsu na jogu abavu bebeli na abavu vala o malongu ama gumababingila mu diambu dimabi ama bamakerombisila mbela va gusu agu.

⁸Aa Fumu, tuilabingi yisonyi jetu na bakaganabasefu betu na bataji betu mu mbari tumavaga masumu va gusu agu.

⁹Tumba ndeʼ Fumu Nsambi etu guvu na yingeba na guitutandi diuleba tumaba mimbini va gusu agu.

¹⁰Tusamagulu diufi diagu ndeʼ aguvu Fumu Nsambi etu ava gumaturumina udedila migaga ami gumatuvega na babiyitsi.

¹¹BaIsrael botsu bamasumuna migaga na bamaguliyila nsima yiri bagogulu malongi magu. Mu diambu didilensa dietu milogu amimasonugu mu migaga miMoise, musalitsi uNsambi mimatudugunu.

¹²Tumadugusu mambu ama gumatuvosila, jetu na basefu betu abamaturumanga, gumatulasa maguga maneni, vasakalabana maguga mamunongu eni amamalabana o Jerusalem va butamba buotsu.

¹³Nana monyi mamasonugulu mu migaga miMoise, tumalaba maguga meni motsu; ne nana tusamasambila Fumu Nsambi etu na tusamabusa mabi metu va julu vana tusamakipa ngensa agu.

¹⁴La dibandu ndeʼ Fumu gumawarisila maguga. Aa Fumu Nsambi etu, guvu usungama mu mambu motsu ama gumavaga tumba jetu tusamagululu diufi diagu.

¹⁵Aa Fumu Nsambi etu, ndeʼ gumapalisa batu bagu o Egypte na mangolu magu; ndeʼ gumakevega diduma adivu te na namunyi, jetu tumavaga masumu na tuna mbela.

¹⁶Fumu, na yingeba yiagu yineni, kokolu tsiagu, kabu agu na fuiri agu biyamuebemba musiengi uJerusalem nesi mukongu agu uyingitsi. Mu diambu dimasumu metu na dimabi mabataji betu, Jerusalem na batu bagu belabingi yisonyi va gusu batu abetutsiengili.

¹⁷Aa Fumu Nsambi etu, tsie gulu dusambu na ndembu tsiami na mu diambu didurondu duagu gengila Mbura agu jiNsambi ajimasialu mududu na mamunga.

¹⁸Nsambi ami, liga matuji nokulu! Gengila nolaba bivongu bietu, gengila musiengi agu diina diagu diyitsulungu! Tsiri mu diambu didusungugu duetu tuigulembiyili yika mu diambu diyingeba yiagu yineiu.

¹⁹Aa Fumu, leguluati! Fumu tutandi! Fumu ba limba! Mu diambu didurondu duagu, Nsambi ami sala, guyamuetsikadana; gukawamusa musiengi egugu na batu bagu abetsanimuna.

²⁰Uvosa mbe nyikivosa, nyimatubula masumu mami ava nyimasambilila, nyimatubula nesi ama batu bami baIsrael na nyimalembiyila Fumu Nsambi mu diambu dimukongu uyingitsi uNsambi ami.

²¹Usanrtrila mbe nyikisambila ava yiansa Gabriel ayi nyimaielaba mu yniariamu yimasundila ulabana va diweiu dipagu jitsisiga.

²²Amandonsa na amamoga nami. Amansingula rie: Daniel, nyimaruga ugulonsa tindi dujabu.

²³Ava gutsibandila usambila Fumu atsivosa diambu na nyimaruga ugutsingula dionyi; mu mbari ndeʼ guvu aguandi udurondu. Ba limba ugulu mambu notsiyisa yiriariamu!

²⁴Mu diambu dibatu bagu na dimusiengi uNsambi, magumidusambuali matsona mamatabulu, batsona beni banosuka bumbini busuka wandi; masumu motsindulu na mabi moliomusu; dusungugu dumutubu dulabana; yiriariamu na mbigulu biudugusu na Ndagu Nsambi jiumueliomusu nana na kala.

²⁵Kabogu dijabi na ditsiyisi! Ubandila ava diambu dimavosulu yiri Jerusalem umuerungululu te na durugu du Yibiatsi, diwendi rie: Mulonsi nsila voba yisambuali yitsona. Mbana mu magumasiamunu na tsona beji musiengi na bivaga biumuerungulu tumba temu tsieni tsiuba tsiranga.

²⁶Magumasiamunu na tsona beji tsinovioga Yibiatsi oboku na agoba na yivinga. Mbana sefu oruga na dibadi diandi, boyipansa musiengi na Mbura Nsambi. Disukusulu diandi diulabana, Nsambi omulasa kabu andi tumba te na temu eni voba mavita na mbungu nana bimatabululu kala.

²⁷Ovaganga pangini jiwara na batu bamosi mu tsona ajiusita mu yibuku yitsona eni osukisa pagu jikedi na jitsisiga; mubungitsi ovaga mambu amavu tindi nsoruru te na dubungu na motsu amamatabulu momuvikana.