Read Punu Osee 13 Bible Online

Osee 13 - Punu bible

Osee 13

¹Ava Efraim amavosila batu bamaregama. Amakakusu o Israel. Amakerombisa mbela uyenayitsa Baal, na amafu.

²Mbana batu bandi bemuevayingi masumu, besulumusi lora tsiogu tsivema uvaga bitumba na bamavaga bakosi na buketi buogu. Bevosi rie: Vengu tumuvagulila pagu! Befifi baana babangombi! Ka muna mbela ji!

³La dibandu bobila nderi dimungi dikedi nesi disala adiusiamuga namapapa, nderi bipuvi abivembulu na punga jiyisagulu nesi nsumbili ajipali va diluta.

⁴Menu nyivu Fumu Nsambi agu ubandila o bulongu buEgypte, ndeʼ gugejabi Nsambi jisusu yika menu na vagaa Mugobutsi ususu yika menu.

⁵Menu nyimaba mubungulitsi agu o kumu va mbura jidukanga.

⁶Mbana gumadila biguji biagu na gumagukuru. Gunogukuru, gumabasa na nsangu; la dibandu gumandibinina.

⁷Meʼ wami nyimaba nderi yimbungu va gari enu; nderi magena udulega muna nsila.

⁸Nyudutumuna nderi ursa agumapatulu baana bandi. Nyupansa kudu tsienu tsimurima. Nyuduvopula nderi yibusi yiyimbungu; bibulu bimusiru biudujanganga.

⁹Israel, nyina diambu nagu. Anyi oguwaka kalala?

¹⁰Kaga agu aka? Aguwaki kalala o misiengi miagu? Basefu bagu baka? Aba gumavosila rie: Peyi kaga na basefu.

¹¹Na kabu ami nyuguvega kaga, na fuiri ami nyugupatula kaga eni.

¹²Mbela tsiEfraim tsimatubulu, masumu mandi masakatsiemuga,

¹³misongu mijandi oyiburi miumugaanga; obura muana agugaa na diela aguibusi upala.

¹⁴Menu Fumu nyubagobula o mbura jiabafu, nyubawaka kalala o dufu. Aa dufu, bivunga biagu bika? Mbura jiabafu dubungu duagu duka? Ngotsimisa misu nobawaka kalala!

¹⁵Diuleba Efraim amaba na digumba dineni va gari baana bataji bandi, punga jiyiari ayi wisi epalili jiuruga; punga jiFumu jiugumba o kumu, jiukamusa bileka biandi nesi biduna biandi bimamba. Bomukinda bungunu buotsu bubima bidufunu duneni.