Read Punu Osee 5 Bible Online

Osee 5 - Punu bible

Osee 5

¹Bavagulitsi bapagu guluanu diambu diedidi; Jenu barumitsi baIsrael banu limba! Jenu bisi ndagu kaga liganu matuji! Bunsonsi utabulu buidutabululu. Dumaba nderi murambu o Mispa nesi mbusa ajimabuagu o Tabor,

²nesi dubila o Chittim. Tumba menu Fumu nyudukilisa, jenu botsu.

³Nyijabi yifumba yiEfraim, Israel asakansuema. Ndeʼ Efraim gumavaga bumbembu na ndeʼ Israel gumakebivisa na nsoniru.

⁴Bifu biogu bigebasingisi ugabuga ombu Nsambi ogu. Nsala jibumbembu jivu nogu na bagejabi Fumu.

⁵Dunangu duIsrael duimusingisili bumbeji; Israel na Efraim boberuga mu mabi mogu; Juda wandi oberuga va mosi nogu.

⁶Bowenda na bindombu biogu na bangombi uyenaromba Fumu tumba bagomulaba; amagusuga va gari ogu.

⁷Barnaba mimbini miFumu ava bamaburila baana babutsuari. Muweli umosi uvu uwelimina ubasielasana na biogu biotsu.

⁸Siganu mumbanda o Guibea, siganu mumbanda o Ramal Gamuganu migamu o Beth-Aven! Aa Benjamin, bavinitsi bagu bavu o nsima agu.

⁹Yifumba yiEfraim yiubungu o kumu mu yilumbu yimukilu. Va gari bifumba biIsrael nyimajabisaadiulabana.

¹⁰Basefu baJuda bavu nderi abevinsi mandilu. Nyubalasa kabu ami ajiubasa nderi nyidu.

¹¹Efraim amalasu maguga na amakambusu na bunsonsi mu mbari amayenarombanga mambu makulini.

¹²La dibandu nyubila nderi tsiega ombu Efraim; nderi nyama jitupa ombu Juda.

¹³Efraim elabi dibi diandi, Juda elabi mapura mandi; Efraim amawenda o Assyrie na amavosa na kaga Jareb. Tumba kaga eni agorungula udubelusa nesi ubuga mapura menu.

¹⁴Menu Fumu, nyuba nderi yimbungu ombu Efraim, nderi muana yimbungu ombu Juda. Nyubavopula mbana nyuyenawenda, nyubabega na mutu agorungula ubapatula.

¹⁵Fumu evosi rie: Nyuyenawenda, nyumuegabuga va mbura ami mbana bosinga yiri bana mbela. Mbana botomba, ava bolabila munyongu boronda ugabuga ombu garni.