Read Punu Osee 7 Bible Online

Osee 7 - Punu bible

Osee 7

¹Fumu evosi rie: Av a nyimarondila ubelusa Israel mabi maEfraim na mbivulu tsiSamarie bimamuelabana; bamafuranga. Badayitsi bamakota o ndagu na yinombu yibakinditsi yimabasa va gusu kana.

²Bagetasi yiri nyirangimini mbivulu tsiogu; bifu biogu bibi bibatsiengili, nyibilabi biotsu.

³Belasi kaga ubueji na mbivulu tsiogu, belasi basefu ubueji na mfurulu tsiogu.

⁴Botsu bimbembu bavu, bebagunu nderi furu aji mulambitsi mapa amayirasana temu mosi ava amadimbila dituka.

⁵Va feta tsibakaga bogu basefu benuangingi malamu, malamu mebatsotsi uvosa mapopopu.

⁶Mirima miogu mivu nderi furu. Mivu nsumbumbu na nsala udugusu fundu; mukolu uotsu nderi jimatsima; tumba kedi misundili upalisa milutsu.

⁷Jogu botsu bavu nderi furu ajivu tindi muji, besielisini bansonsi bogu. Bebokisi bakaga bogu botsu, ne umosi va gari ogu agendengili umuwamusa.

⁸Efraim amabivusu na batu. Efraim avu nderi dipa digeyi adimagoku yiari yimosi.

⁹Benyi bamamana mangolu mandi, agedijabi! Diuleba amanuna, agedijabi!

¹⁰Dunangu duIsrael duimusingisili bumbeji, agegabuyi ombu Fumu Nsambi andi, diuleba elabi motsu mana agemurombi.

¹¹Efraim avu nderi yifufu yidibembi adivu na buduka, erombi duwamusu duEgypte na ewendi ombu bisi Assyrie.

¹²Pa owenda nyumurambila yigudiga yiami, nyumuwakusulu nderi batsoli; nyumukilisa dedi mosi nana bemuvosili mbivulu.

¹³Ka muna maguga ma olaba mu mbari etini! Nyimaronda umugobula tumba eposili mambu mamfurulu.

¹⁴Agaa asigama ava endengili umuwamusa; elabi munyongu va tangi na ekenemisa na ditasa udila digumba nesi udila malamu mapuela. Ka muna bumbini bu buvu nandi!

¹⁵Nyimamulonsa na nyimamuwarisa ne nana etasilingi yika matasa makulini.

¹⁶Agegabuyi ombu Nsambi Aguvu Uneni; avu nderi pita ajigaana munengi. Basefu bandi boboku o divita mu diambu didikasi diogu. Adina diumurombisa uba kwaku o bulongu buEgypte.