Read Punu Amos 7 Bible Online

Amos 7 - Punu bible

Amos 7

¹Fumu Nsambi amatindila yiriariamu yieyiyi. Laba amagukiga makokoku ava biotsu bikaga bimatabulu na bivaru biotsu bimamuebanda ubendila.

²Ava makokoku mamajanganga bisinga biotsu nyimavosa rie: Kabogu Fumu ndeʼ guvu Fumu, kokolu tsiagu batandi! Je borungula uwarila? Bamadeda tindi udeda!

³Fumu amagabusa murima nsima. Amavosa rie: Adina digomuelabana.

⁴Fumu Nsambi amatindila yiriariamu yieyiyi. Amatubula mikilu umuji; muji umasielasana mbengi ajineni nesi bulongu buIsrael.

⁵Mbana nyimavosa rie: Fumu ndeʼ aguvu Fumu, kokolu tsiagu tsie dundi! Je borungula uwarila? Bamadeda tindi udeda?

⁶Fumu amagabusa murima nsima. Amavosa rie: Adina wandi digomuelabana.

⁷Fumu amatindila yiriariamu yieyiyi. Fumu jaʼ beni amaba va julu yibaga na amaba na mukudu uwetsiyila va dikaka.

⁸Amakwivula rie: Amos yi guilabi? Nyimawagula rie: Mukudu uwetsiyila. Mbana Fumu amansingula rie: Nyusalisa mukudu uwetsiga batu bami, ngomuebawarila na mabi mogu.

⁹Mbura tsidiiyitsu tsiIsrael tsiupansu; mbura tsiNsambi tsibaIsrael tsiubungu mbana nyutoga na bategula baJeroboam.

¹⁰Mbana Amassia muvagulitsi upagu uBethel amaruma mutu utsingula Jeroboam kaga jiIsrael rie: Amos fundu egutungili, jogu na baIsrael; bulongu bugorungula uwarila mambu mandi.

¹¹Guluanu adi Amos amavosa rie: Jeroboam oboku na baIsrael bobegu bakoli vala na bulongu buogu.

¹²Amassia amatsingula Amos rie: Mungo biriariamu, gabuga o bulongu buJuda, yejanganga biguji biagu nobiganga guna.

¹³Tumba guyamuebuesa ubiga vava o Bethel mu mbari jivu mbura nsambi jikaga ajivu o tsi durumu duandi.

¹⁴Amos amawaka Amassia rie: Ngaa mubiyitsi nesi muana mubiyitsi tumba nyivu mubungulitsi ubindombu na nyibali mifiga.

¹⁵Fumu amambongila ava nyimakelisila mugamba na amaruma rie: Wenda uyebiyila batu bami baIsrael.

¹⁶Tsie gulu mambu maFumu ndeʼ Amassia aguivosi rie: Guyabiyila baIsrael nesi bategula balsaac.

¹⁷Fumu evosi rie: Mugatsi agu oyenavaganga bumbembu o musiengi na baana bagu bababaala na babagetu boboku; nungi agu jiugabu na yietsu. Ndeʼ gufuila o bulongu bugana na baIsrael bobegu bakoli vala na bulongu buagu.