Read Punu Dutalu 10 Bible Online

Dutalu 10 - Punu bible

Dutalu 10

¹Fumu amatsingula Moise rie:

²Vaga mimbanda mibeji milora jivema; gumivaga na lora jivema ajimabaku; mionyi miugusalilanga unengila dibuli vo ulonsa diweru diusogama nowenda o milaku misusu.

³Ava miotsu mibeji miusigulu dibuli diotsu diugukama ombu gagu va dikotulu diNdagu Yibenguna.

⁴Pa yika mumbanda umosi usigu baana babasefu na bivunda bibatosini biIsrael bogukama ombu gagu.

⁵Jogu abetsani o yiari ayi wisi epalili bosogama ava mumbanda usigulu nsiyitsi-jiulubusa jitega.

⁶Mbana batu abetsani o tandu bosogama ava mumbanda usigulu nsiyitsi-jiulubusa ajimubeji: mumbanda usigu nsiyitsi-jiulubusa temu tsiotsu atsi dukumuganga.

⁷Tumba ava guna nsala unengila yika unengila dibuli gusiga mumbanda na nsiyitsi-jiunengila, gugosiga nsiyitsijiulubusa.

⁸Baana bababaala baAaron, bavagulitsi bapagu bosiganga mimbanda. Uba mugaga umutubu ombu genu te no bategula benu.

⁹O bulongu buenu, ava duwendila o utoga divita na bavinitsi abodutoyisa, dusiga mimbanda nsiyitsi-jiulubusa na Fumu Nsambi eni omigulu na oduwaka kalala ombu bavinitsi benu.

¹⁰Mu bilumbu bienu binsangu na bibafeta na bibisusungi bienu dusiga mimbanda ava duvagulila pagu tsiunyensa na pagu tsienu tsikabusulu tsimaboti, nsiyitsi tsiuba nderi yirangumunu yienu ombu Nsambi. Menu la Fumu Nsambi enu.

¹¹Mu yilumbu yimagumabeji mu tsungi jimubeji jiyilima yimubeji, dimungi dimagusuga va julu Ndagu Yibenguna.

¹²BaIsrael bamasogama na bamagusuga o kumu jiSinai. Dimungi dimayesikama o kumu jiParan.

¹³Kabogu ajina jimaba temu ajitega aji baIsrael bamakumuyila va milaku nana Fumu amarumina Moise.

¹⁴Yilimbu yimilaku miJuda yimareyila ubegu na bagora bandi. Bagora baJuda bamarumungu na Nachon muana dibaala uAmminadab;

¹⁵bagora bayifumba yiIssakar bamarumungu na Netaneel muana dibaala uSouar;

¹⁶bagora bayifumba yiZabulon bamarumungu na Eliab muana dibaala uHelon.

¹⁷Ava bamapansila Ndagu Yibenguna baGuerchon na baMerari amayenajibeganga.

¹⁸Yilimbu yimilaku miRuben yimabegu na bagora bandi. Bagora baRuben bamarumungu na Elissour muana dibaala uChedeour;

¹⁹bagora bayifumba yiSimeon bamarumungu na Cheloumiel muana dibaala uSourichaddai;

²⁰bagora bayifumba yiGad bamarumungu na Eliassaf muana dibaala uDeouel.

²¹BaQuehat bamasogama na bamayenabeganga bisalulu biMbura Nsambi; basusu bamarangiga Ndagu Yibenguna ava bamabavivilanga.

²²Yilimbu yimilaku miEfraim yimabegu na bagora bandi. Bagora baEfraim bamarumungu na Elichama muana dibaala uAmmihoud;

²³bagora bayifumba yiManasse bamarumungu na Gamliel muana dibaala uPedassour;

²⁴bagora bayifumba yiBenjamin bamarumungu na Abidan muana dibaala uGuidoni.

²⁵Yilimbu yimilaku miDan yimabegu na bagora bandi; jogu bamabindiga va nsima bisi milaku miotsu. Bagora baDan bamarumungu na Ahiezer muana dibaala uAmmichaddai;

²⁶bagora bayifumba yiAsser bamarumungu na Paguiel muana dibaala uOkran;

²⁷bagora bayifumba yiNeftali bamarumungu na Ahira muana dibaala uEnan.

²⁸Anana baIsrael bamatandimina ava bamasoyimina na bagora bogu; na anana bamayenawendilanga.

²⁹Moise amatsingula Hobab muana dibaala uReouel, muisi Madian agumaba boji buandi rie: Jetu tuiwendi o mbura aji Fumu amatutsingula rie: Nyuduvega jionyi. Tʼwendi, tugabila maboti ama Fumu amavangana uvayila baIsrael.

³⁰Hobab amamugabusila rie: Ngowenda; nyirondi ugabuga o bulongu buami o ndagu taji ami.

³¹Moise amamulenda rie: Kokolu tsiagu guyatubusa; ndeju guijabi mbura atsi tutsanina o kumu, guba mulonsi etu unsila.

³²Pa guwenda netu tugabila maboti ama Fumu otubeganga.

³³BaIsrael bamarambuyila o mukongu uFumu na bamayenawendanga te na bilumbu birieru; yigara yipangini yiFumu yimawendanga va gusu ogu uyenabarombilanga mbura jiutsanina.

³⁴Va nyangu dimungi diFumu dimawendanga va julu ogu ava bamagusuyilanga va milaku.

³⁵Ava yigara yimasoyiminanga, Moise amasambililanga rie: Kokolu Fumu, relama! Pansa bavinitsi bagu! Rinisa jogu abeguvini!

³⁶Ava bamayisunsilanga amamuesambilanga rie: Kokolu Fumu, muetsana va gari batosini babatosini baIsrael.