Read Punu Dutalu 14 Bible Online

Dutalu 14 - Punu bible

Dutalu 14

¹BaIsrael bamagamuga na bamalilanga mukolu uotsu.

²Botsu bamatatila Moise na Aaron na bamabawivula rie: Dibandu yi tusamafuila o Egypte? Dibandu yi tusamafuila o kumu?

³Dibandu yi Fumu etusindiyili o bulongu bueni abu tuyebokulu na majenga na bagatsi betu na baana betu boyebivusu? Digaa diwelimina yiri tugabuga o Egypte?

⁴Mbana bamatsingusana rie: Tusolianu yivunda yisusu na tugabuyianu o Egypte.

⁵Moise na Aaron bamakebuaga va gusu dibuli diotsu dibaIsrael abamaba bagukama.

⁶Va gari jogu abamayesieenga bulongu, Josue muana dibaala uNoun na Caleb muana dibaala uYefounne bamabasu na munyongu te na bamapasa biduaru biogu.

⁷Bamatsingula dibuli diotsu diIsrael rie: Bulongu abu tutsiyenatsiengilanga ava tutsiyenabutsiengilanga buvu tindi buboti.

⁸Pa Fumu elabi ubueji netu otubega o bulongu bueni na otuvega buonyi; bu vu bulongu abuvu na digumba dineni.

⁹Dimosi buandi duyaba mimbini na duyaduma bisi bulongu bueni, tsiri jogu abotulisila? Bansambi bogu bamabaliyila nsima tumba Fumu avu netu kabogu tuyabaduma.

¹⁰Tumba dibuli dimaronda ubatindila mamanyi. Vana vana bundumba buFumu bumabalulila o Ndagu Yibenguna.

¹¹Fumu amawivula Moise rie: Te na temu yi batu bebaba bondensanga? Te na temu yi bopayila yitu? Nyisamabalasanga bimaga bimangolu mami?

¹²Nyubanamusu yivunga yineni na nyubabinga tumba nyuguvaga tindi dilongu adiuba na mangolu uviolila baIsrael.

¹³Moise amatsingula Fumu rie: Bisi Egypte bodigulu. Tsia gumapalisa batu bebaba va gari ogu na mangolu magu maneni?

¹⁴Boditsingula bisi bulongu buebubu. Bamajabanga yiri ndeju Fumu guvu na batu bebaba; guikelasa, guiwendingi nyangu va gusu ogu mu dimungi na ava mukolu guvu mu dimungi dimuji.

¹⁵Pa gubokisa batu bebaba dibokila, bisi malongu abamagulu ama batu bamaguvosilanga bovosa rie:

¹⁶Fumu asamaba na mangolu mawelimina ubega batu bandi o bulongu abu amalevila pesi ubavega, la dibandu amababokisila o kumu.

¹⁷Kokolu tsiagu Fumu mangolu magu na buneni buagu bilabini nana gumavosila rie:

¹⁸Nyivu Fumu, ngaa na yifutsu na nyivu na maboti; nyitandi mabi na bumbini; tumba ngegengili abavu na mbela nden bana ndunga na nyikilisi baana mu diambu dimabi mabataji te na kula tsimurieru nesi tsimuina.

¹⁹Fumu, mu diambu diyingeba yiagu yineni, tanda batu bebaba mabi mogu nana gumalebatandila ubandila o Egypte te na gunu.

²⁰Fumu amavosa rie: Utanda nyibalandi nana gumakwivulila.

²¹Nana bundumba buami bumalabinina va butamba buotsu anana nyilevili pesi na diina diami rie:

²²Botsu abamalaba bundumba bueni na bimaga abi nyimavaga o Egypte nesi o kumu, jogu abamambanga yigumi yikumbu na abasamagululu diufi diami,

²³jogu botsu bana bagolaba bulongu abu nyimalevila pesi uvcga ombu bataji bogu, jogu botsu abamandesa bagobulaba.

²⁴Yika musalitsi ami Caleb amabanganga na ditasa dimunongu ususu na amadukanga mambu mami na murima umosi. Kabogu nyumutolisa o bulongu abu amalesieenga; buba bubategula bandi.

²⁵Bisi Amalec na bisi Canaan betsanini o yibususu kabogu mugesa dukageluga nowenda o kumu o yiari yiMubu uBenga.

²⁶Fumu amawivula Moise na Aaron rie:

²⁷Te na temu yi nyuwarila mitatu mibatu bebaba? Nyimagulu mitatu mibaIsrael.

²⁸Batsinguli rie: Fumu jandi rie: Nyilevi pesi na diina diami. Nyuduvayila dedi mosi nana dumaposila.

²⁹Mfumbi tsienu tsiuyenasialanga o kumu, jenu botsu adumasansumu, jogu abakavu na magumabeji mabilima ne uviolila na jogu abamatatilanga,

³⁰dugokota o bulongu abu nyimalevila pesi udutsanisa; yika Caleb muana dibaala uYefounne na Josue muana dibaala uNoun bokota.

³¹Baana benu aba dumavosila rie: Bobivusu, nyubakotisa guna; bolaba bulongu abu jenu dumalensa.

³²Bamfumbi benu boyenasialanga o kumu.

³³Baana benu bokelisanga migamba miogu o kumu te na magumana mabilima, bowarila mukilu ukanda tsienu te na bamfumbi benu botsu boyenasialanga o kumu.

³⁴Nana dumamanina magumana mabilumbu uyesieenga bulongu munongu mosi duwarila mukilu umabi menu te na magumana mabilima; kadi yilumbu, yilima yimosi; mbana dujaba adivu pa nyukegusula va gari enu.

³⁵Menu Fumu nyimavosa na nyilevi pesi rie: Nyukilisa dibuli diedidi mu diambu didibi diogu. Jogu abamambusa bosielusunu o kumu, avana bofuila.

³⁶Babaala aba Moise amasindiga uyesieenga bulongu ava jogu bamagabuyila bamarombisa dibuli diotsu umutatila ava bamavosila misamu mibulongu bueni;

³⁷babaala beni bamafu na yivunga va gusu Fumu mu mbari bamavosa misamu mibi mibulongu bueni.

³⁸Yika Josue na Caleb abasamafu va gari jogu abamawenda uyesieenga bulongu.

³⁹Moise amabega misamu mieni ombu baIsrael; botsu bamanyonga tindi unyonga.

⁴⁰La dibandu bamarelimina kedi jineni na bamamata o julu mukongu; bamavosa rie: Jetu tuʼ joʼ ba! Diuleba tumavaga masumu, umata tuimati o mbura aji Fumu amavangana netu.

⁴¹Moise amawivula rie: Dibandu yi duilensili diruma diFumu? Digobueji nana!

⁴²Duyawenda! Fumu agaa nenu. Duyarombisa bavinitsi benu uduboka.

⁴³Bisi Amalec na bisi Canaan bavu guna o gusu enu; duboku. Dumaliyila Fumu nsima kabogu Fumu agoba nenu.

⁴⁴Na kanda baIsrael bamamata o julu mukongu tumba yigara yipangini yimasiala o milaku na Moise.

⁴⁵Mbana bisi Amalec na bisi Canaan abamatsananga o julu mukongu bamavindama, bamabetsa baIsrael na bamababingisa te no Horma.