Read Punu Dutalu 15 Bible Online

Dutalu 15 - Punu bible

Dutalu 15

¹Fumu amatsingula Moise rie:

²Tsingula baIsrael rie: Ava dutolila o bulongu abu nyiduveyi uyetsana,

³aguna duvagulila Fumu pagu ajiusielusunu na muji, nesi pagu jiunyensa nesi pagu jiudugusu pangini nesi pagu jitondini va mosi na pagu jibafeta benu; nesi bibulu bineni vo bigeyi bipagu ajiugulunu mbunga jiboti ombu Fumu,

⁴jandi aguvagulila Fumu pagu ojiwakisa va mosi na pagu jitsangu: yietsu yimosi yifufu mu yigumi, yiulambu na yietsu yimosi yimatsi mu bina,

⁵na gukavagula pagu jiunu jiyietsu yimosi mu bina yimalamu ava guvagulilanga yindombu yipagu jiunyensa.

⁶Ava guvagulila mulumi yindombu guguwakisa va mosi na bietsu bibeji mu yigumi bifufu atsimalambu na yietsu yimosi mu birieru yimatsi,

⁷na guvagula pagu jiunu jiyietsu yimosi mu birieru yimalamu ayiuba pagu ajiugulunu mbunga jiboti ombu Fumu.

⁸Pa guvagula mulumi ngombi nesi pagu jiunyensa nesi pagu jiudugusu pangini vo pagu tsikabusulu tsima boti ombu Fumu,

⁹guwakisa pagu va mosi na mulumi ngombi: bietsu birieru mu yigumi bifufu atsimalambu na ditingi diyietsu yimatsi,

¹⁰na guvagula pagu jiunu jiditingi diyietsu yimalamu: ajina jivu pagu ajiusielusunu na muji ajiugulunu mbunga jiboti ombu Fumu.

¹¹Anana diuvagulungu na kadi mulumi ngombi na kadi mulumi yindombu na kadi muana yindombu vo muana yinsabi.

¹²Duduka dutalu dubibulu abi duvagula, anana duvagulilanga pagu tsieni tsiotsu.

¹³BaIsrael botsu bovaganga mambu meni motsu ava bovagulila pagu ajiusielusunu na muji, ajiugulunu mbunga jiboti ombu Fumu.

¹⁴Benyi abotsana nenu mua temu vo abotsananga nenu bovagula pagu ajiusielusunu na muji ajiugulunu mbunga jiboti ombu Fumu, bojivagula munongu mosi nana jenu duivagulili.

¹⁵Kabogu maruma mobanganga nana mavu te na kula tsiotsu, ombu jenu baIsrael nesi ombu benyi. Menu Fumu ngevayi duviakusunu dubaIsrael na benyi.

¹⁶Voba migaga mimosi na maruma mamosi ombu genu nombu gogu.

¹⁷Fumu amatsingula Moise rie:

¹⁸Tsingula baIsrael rie: Ava dutolila o bulongu abu nyudukotisa,

¹⁹ava dujanganga mapa mabulongu bueni dukagusulila Fumu mamosi.

²⁰Ava duvayila mapa duwakisa pagu jidipa ditega adiusambulu nden pagu jitsangu tsiumanga, dudiwakisa pagu ajiuviunsa.

²¹Dukagusulilanga Fumu dipa ditega te na mutubu.

²²Pa jenu botsu dumatsimbu tsiri ujaba na dumasumuna maruma ama Fumu amavega Moise,

²³motsu ama Fumu amaduruma ama Moise amamuvosila ubanda na yilumbu ayi Fumu amamuveyila maruma te na mutubu,

²⁴pa mutu amasumuna tsiri ujaba na pa dibuli wandi digadijaba, dibuli diotsu diuvagula mulumi ngombi pagu jiunyensa ajiugulunu mbunga jiboti ombu Fumu na pagu va mosi na pagu jiunu nana maruma mamakunsulu va julu vana diuvagula mulumi yinsabi pagu jiutsindula dibumi.

²⁵Muvagulitsi upagu otsindulila dibuli diotsu dibaIsrael dibumi, mbana botsu bana botandu; bamasumuna tsiri ujaba na bamabega pagu ajiusielusunu na muji jiuyitsila Fumu na yibuilu yiutsindula dibumi va gusu Fumu mu diambii didisumu adi bamavaga tsiri ujaba.

²⁶Dibuli diotsu dibaIsrael diutandu na muenyi aguitsani nogu otandu wandi mu mbari batu botsu bamaba muna.

²⁷Pa mutu mosi buandi amasumuna tsiri ujaba ovagula yinsabi ayikavu yilima yimosi, pagu jiutsinduia dibumi.

²⁸Muvagulitsi upagu otsindula dibumi va gusu Fumu dimutu agumasumuna tsiri ujaba, dibumi diandi dinotsindulu, otandu.

²⁹Mugaga umosi uba na botsu abamavaga dibi tsiri ujaba; nesi muisi Israel nesi muenyi aguitsani nogu.

³⁰Tumba muisi Israel, nesi muenyi pa osumuna na kanda, elensi Fumu, jandi ogusulu va gari batu bandi.

³¹Amalensa mbembu Fumu na amasumuna diruma diandi: jandi guna ogusulu, owarila mukilu udibi diandi.

³²Ava baIsrael bamabila o kumu bamarasuna dibaala adimariabanga mikansu yilumbu yitsona.

³³Jogu abamamurasuna ava amariabilanga mikansu bamamubega ombu Moise na Aaron na dibuli diotsu.

³⁴Bamamukotisa o tsugu mu mbari adi mbe bamamuvayila mbe disakatubulu.

³⁵Fumu amatsingula Moise rie: Dibaala diedidi aboku; dibuli diotsu diumutindila mamanyi o tsomu dimbu.

³⁶Dibuli diotsu dimamugusula va milaku na dimamutindila mamanyi te na amafu, nana Fumu amarumina Moise.

³⁷Fumu amatsingula Moise rie:

³⁸Tsingula baIsrael bavayi matsatsa va mafubu mabikutu biogu notunga mukudu udumbulu muna matsatsa meni mamafubu mabikutu biogu, bodivaganga te na mutubu.

³⁹Ava dunamiyila matsatsa meni na ava dumagengililanga durangiminanga maruma motsu maFumu na dumadukanga, dugomueduka nsala tsienu tsimunongu na munongu atsiudurombisa uvaganga kulini.

⁴⁰Anana durangimininanga maruma mami na dumadukanga na duba aba Nsambi.

⁴¹Menu nyivu Fumu Nsambi enu agumadupalisa o Egypte uba Nsambi enu. Menu la Fumu Nsambi enu.