Read Punu Dutalu 16 Bible Online

Dutalu 16 - Punu bible

Dutalu 16

¹Core, muana dibaala ulssar muana dibaala uQuehat muana dibaala uLevi na Datan na Abiram baana bababaala baEliab na On muana dibaala uPelet, jogu botsu barieru bamaba baana bababaala baRuben abamavaga kimbu.

²Jogu bamatumuna Moise, diwendi rie: bamaba kama beji na magumaranu mababaala baIsrael abamaba bivunda bidibuli abamasolu o yibenguna yibivunda na bamaba na diduma.

³Bamagukama na bamatungila Moise na Aaron fundu mbana bamabatsingula rie: Vana dedi! Dibuli diotsu divu diNsambi! Fumu avu netu. Dibandu yi dukematisila nderi duvu ne uviolila dibuli diFumu?

⁴Moise anogulu dionyi amakebuaga va tsi.

⁵Amavosa na Core na bambatsi bandi botsu rie: Mugesa kedi Fumu ojabisa aguʼ andi, agumabiatsu ubambana nandi. Osingisa agu amasola ubambana nandi.

⁶Adi duvaga adidi: dukabonga bisunsulu bimuji na Core na batu bandi;

⁷mugesa dukabisunsa muji, dukabibuesa bima bimbunga jiboti va gusu Fumu. Tulaba agu Fumu osoia aguba uandi. Jenu bisi Levi, vana dedi!

⁸Moise amatsingula Core rie: Jenu bisi Levi, guluanu!

⁹Je digaa diwelimina yiri Nsambi Israel amadusola mu dibuli diIsrael udubambasana nandi yiri dusalanga yisalu yiNdagu Yibenguna na yiri dubanganga va gusu dibuli umusalila?

¹⁰Amadubambasana nandi, ndeʼ Core jenu na baana bataji bagu botsu; va julu vana jenu bisi Levi duirondi yisalu yibuvagulitsi bupagu.

¹¹Ndeʼ Core, jenu na bambatsi bagu duba mimbini miFumu? Dibandu yi dutatila Aaron?

¹²Moise amasindiga mutu uyenengila Datan na Abiram, baana bababaala baEliab. Tumba bamavosa rie: Tugowagula.

¹³Vana dedi, tsiri ndeju agumatupalisa o bulongu abuvu na digumba noyitubokisa o kumu? Te na vana gusakatoga uturuma?

¹⁴Tsia, gusamatubega o bulongu abuvu na digumba dineni, gusamatuvega manungi nesi mamfuga? Guitasi utsimisa batu bebaba misu? Tugowagula!

¹⁵Moise amanyoga tindi kabu na amatsingula Fumu rie: Guyakipa pagu tsiogu. Ngaasinga nesi buru ogu mosi na ngaavayila ne mutu ogu umosi dibi.

¹⁶Moise amatsingula Core rie: Jenu na bambatsi bagu botsu dukavioga mugesa va gusu Fumu, jenu nogu na Aaron.

¹⁷Bonganu mutu mutu yisunsulu yiandi yimuji ombu Fumu: voba kama beji na magumaranu mabisunsulu bimuji; jenu na Aaron wandi, mutu mutu obonga yisunsulu yiandi yimuji.

¹⁸Mutu mutu amabonga yisunsulu yiandi yimuji, amapodula muji muna na amapodula bima bimbunga jiboti na amarelama va dikotulu diNdagu Yibenguna va mosi na Moise na Aaron.

¹⁹Core amagukiga abamaba na kueru na Moise na Aaron va dikotulu diNdagu Yibenguna. Bundumba buFumu bumalabana na dibuli diotsu.

²⁰Fumu amatsingula Moise na Aaron rie:

²¹Kakananu na batu bebana, nyusundila ubasielasana.

²²Moise na Aaron bamagudama va tsi na bamavosa rie: Aa, Nsambi! Aa Nsambi jibatu botsu! Mutu mosi buandi amavaga masumu, mu dionyi dunyoyila batu botsu?

²³Fumu amatsingula Moiserie:

²⁴Tsingula dibuli rie: Kakananu vala na mbura tsiotsu tsiCore na tsiDatan na tsiAbiram.

²⁵Moise amarelama na amawenda ombu Datan na Abiram; bivunda biIsrael bamamuduka wandi.

²⁶Amatsingula dibuli rie: Kakananu na mandagu mamatsanda mababaala bebaba babi na duyabemba ne yima yiogu yimosi yiri dugobungana va mosi nogu ava bofuila mu diambu dimasumu mogu.

²⁷Bamakakana vala na mbura tsiotsu tsiCore na tsiDatan na tsiAbiram. Datan na Abiram bamapala na bamasikama va gusu kana tsimandagu mogu mamatsanda, jogu na bagatsi bogu na baana bogu bababaala na bategula bogu.

²⁸Moise amavosa rie: Adidi diudujabisa yiri Fumu amansindiga uyivaga mambu meni motsu na dujaba yiri ngevayi ne dimosi dimeʼ beni.

²⁹Pa batu beni bofu nana batu botsu befuilingi; nesi dutangi nesi duyidungu, kabogu Fumu asamansindiga.

³⁰Tumba pa Fumu ovaga yimaga, pa butamba budibuga na bubamina na biogu biotsu na bokota mbisu o mbura jiabafu adina diudujabisa yiri bamalensa Fumu.

³¹Yika Moise emani uvosa mambu meni motsu oa butamba bumadibuga va makulu maDatan na maAbiram.

³²Butamba bumadibuga na bumabamina jogu na mikuta miogu dedi mosi na Core na biogu biotsu.

³³Batu bamaminu mbisu o mbura jiabafu va mosi na biogu biotsu, butamba bumamuesobana, bamatsiemuga va gari dibuli dibaIsrael.

³⁴BaIsrael botsu abamaba bebeli nogu bamarina ava bamagululu migamu miogu; bamavosanga rie: Turinianu yiri butamba bugotumina!

³⁵Muji umapalila ombu Fumu na umasielasana kama beji na magumaranu mababaala abamavagulanga bima bimbunga jiboti.