Read Punu Dutalu 22 Bible Online

Dutalu 22 - Punu bible

Dutalu 22

¹BaIsrael bamawenda uyevaga milaku o kumu tsiMoab o disimu dimosi dimujamba uJourdain va nsungisini na Jericho.

²Balac muana dibaala uSippor amalaba motsu ama baIsrael bamavayila bisi Amor.

³Bisi Moab bamalaba goma jineni va gusu batu bapuela, bamagaangu na dukamba va gusu baIsrael.

⁴Bisi Moab bamatsingula bivunda biMadian rie: Yinombu yieyiyi yiubunga biotsu abivu netu munongu mosi nana bapasa bemanisili biriri bikumu. Balac muana dibaala uSippor amaba kaga jiMoab va temu eni.

⁵Kaga amatinda bilumbi, ombu Balaam muana dibaala uBeor o Petor o yiari yimujamba uEuphrate aguvu o bulongu buAmmava uyemunengila nomutsingula rie: Laba batu bamarambuyila o Egypte na bamabasa butamba buotsu, bevayi milaku va nsungisini nami.

⁶Kokolu tsiagu, ruga yindoyila batu bebaba mu mbari bavu na mangolu uviolila batu bami, tanguji adina diupega mangolu ubatoyisa nobabinga o bulongu. Nyijabi yiri agu guigabili miula avu na miula na agu guiloyi avu ulogu.

⁷Bivunda biMoab na bivunda biMadian bamawenda na bima uyevega ombu muresitsi. Bamatola ombu Balaam na bamamutsingula bulumbi buBalac.

⁸Balaam amabatsingula rie: Siliminanu vava, mugesa nyuduwagula nana Fumu onsingulila. Basefu baMoab bamatsana ombu Balaam.

⁹Nsambi amalabana na Balaam na amamuwivula rie: Batu abavu o ndagu agu banyi?

¹⁰Balaam amawagula Nsambi rie: Balac muana dibaala uSippor, aguvu kaga jiMoab amabasindiga uyinsingula rie:

¹¹Laba batu bamarambuyila o Egypte na bamabasa butamba buotsu, kokolu ruga yindoyila batu bebaba; tanguji adina diupega mangolu ubatoyisa nobabinga o bulongu.

¹²Nsambi amagandisa Balaam rie: Guyawenda nogu; guyaloga batu beni mu mbari nyimabagabila miula.

¹³Balaam amarambuga kedi na amatsingula basefu baBalac rie: Gabuganu o bulongu buenu mu mbari Fumu atsibusa yiri nyuwenda nenu.

¹⁴Basefu baMoab bamarelama na bamayenagabusila ombu Balac na bamamutsingula rie: Balaam atsibusa uruga netu.

¹⁵Balac amamuesindiga yinombu yineni yibasefu abamayitsu ne uviolila abatega.

¹⁶Jogu bamatola ombu Balaam na bamamutsingula rie: Balac muana dibaala uSippor jandi rie: Guyamuebusa uruga ombu gami;

¹⁷nyudugusu duyitsu duagu na nyuvaga diotsu adi gunsingula; kokolu tsiagu, ruga uyindoyila batu bebaba.

¹⁸Balaam amawagula bilumbi biBalac rie: Ne pa Balac opega ndagu andi jibasa de na lora jivema na lora, ngorungula uvaga ne diambu dimosi digeyi vo dineni adigaa diwelimina na durumu duFumu Nsambi ami.

¹⁹Ne nana, siliminanu vava mbana nyujaba adi Fumu omuensingula.

²⁰Ava mukolu Nsambi amalabana na Balaam na amamutsingula rie: Batu beni banomueruga uyigunengila, relama nowenda nogu tumba guyevaga yika adi nyugutsingula.

²¹Kedi jineni Balaam amarelama, amatunga buru yitsiga na amawenda na basefu baMoab.

²²Kabu Nsambi jimaranga mu mbari Balaam amawenda; yiansa yimarela o gusu umugubitsa. Balaam amaba va julu buru andi na basalitsi bandi babeji bamawenda nandi.

²³Buru jimalaba yiansa yiFumu ayimabaditeli va nsila na dijenga diandi va dikaka; buru jimasila nsila na jimapembuga o mugula. Balaam amadimba buru uweliga ujigabusa muna nsila.

²⁴Yiansa yiFumu yimaretsama va nsila jigeyi va gari nungi jimfuga jirayisan; yiari na yiari umaba bibaga.

²⁵Buru jimalaba yiansa yiFumu; jimayesingama va mugula yibaga na jimabatiga dikulu diBalaam na yibaga yieni. Balaam amamuejidimba.

²⁶Yiansa yiFumu yimavioga vala o gusu na yimayesikama va mbura ajisamaba na puasasa jiugongila o mabaala vo o magetu.

²⁷Buru jimamuelaba yiansa yiFumu na jimasilama. Balaam amanyoga tindi unyoga te na amadimba buru na nguangu.

²⁸Fumu amavosisa buru te na jimawivula Balaam rie: Diambu yi nsiguvaga adi guindimbili kumbu yirieru?

²⁹Balaam amawagula buru rie: Meʼ guidesi! Mbe nyina dijenga mbe nyimaguboka kala.

³⁰Buru amamuwagula rie: Ngaa buru aji guinangimingi temu tsiotsu? Na kala nyiguvayilingi nana? Balaam amawagula rie: Nesi.

³¹Vana vana Fumu amatiemusa Balaam, Balaam amalaba yiansa yiFumu ayimaba va nsila na dijenga va dikaka; amageluga na amagudama va tsi.

³²Yiansa yiFumu yimamuwivula rie: Dibandu yi gumadimbila buru agu kumbu yirieru? Laba nyimaruga uyigugubitsa mu mbari guivioyi mu nsila jidubungu.

³³Buru jimandaba na jimapembuga nsila kumbu yirieru; mbe jigaapembuga ava jimandabila mbe nyimaguboka kala na jionyi mbe jimayenawenda.

³⁴Balaam amatsingula yiansa yiFumu rie: Nyimavaga disumu, nyisamajaba yiri ndeju guvu muna nsila o gusu ami; pa digaa diwelimina ombu gagu nyugabuga.

³⁵Yiansa yiFumu yimatsingula Balaam rie: Wenda na babaala bebaba; tumba guvosulilanga yika mambu ama nyugutsingula. Balaam amawenda na basefu baBalac.

³⁶Balac amagulu yiri Balaam uruga eruyi; amawenda uyemubengusana te no musiengi uMoab aguvu bebeli na mujamba uAmon o mandilu mabulongu.

³⁷Balac amawivula Balaam rie: Nyisamasindiga batu ombu gagu uyegunengila? Dibandu yi gusamalewagula? Menu ngaa na musuga ugudumisa?

³⁸Balaam amatsingula Balac rie: Laba meʼ janduʼgu! Je nyina musuga uvosa diambu? Nyuvosa mambu ama Nsambi otuma.

³⁹Balaam amawenda na Balac na bamatola o Quiriat-Houssot.

⁴⁰Balac amavagulila pagu tsibangombi na bindombu na amatinda bisusu ombu Balaam na basefu abamaba nandi.

⁴¹Ava kedi Balac amabonga Balaam na amamumatisa o julu mukongu uBamot-Baal, aguna Balaam amalabila dikabu dimosi dibaIsrael.