Read Punu Dutalu 23 Bible Online

Dutalu 23 - Punu bible

Dutalu 23

¹Balaam amaruma Balac rie: Tungili yisambuali yibinyensulu bipagu vava na nsolili yisambuali yibalumi babindombu.

²Balac amavaga adi Balaam amamuruma; Balac na Balaam bamavagula mulumi ngombi umosi na mulumi yindombu umosi va julu kadi yinyensulu yipagu.

³Balaam amaruma Balac rie: Ba va mugula pagu agu jiunyensa, menu nyuwenda guna, tanguji Fumu oruga uyibenguna nami mbana nyugutsingula adi jandi ondonsa. Amawenda va julu mukongu.

⁴Nsambi amayebenguna na Balaam agumamutsingula rie: Nyimarunga yisambuali yibinyensulu bipagu na nyimavagula mulumi ngombi umosi na mulumi yindombu umosi va julu kadi yinyensulu yipagu.

⁵Fumu amaruma Balaam rie: Gabuga ombu Balac, gukamutsingula mambu memama.

⁶Balaam amagabuga ombu Balac, amamurasuna va mugula pagu andi jiunyensa, jogu na basefu botsu baMoab.

⁷Balaam amavosa mambu maNsambi rie: Balac amandengila o Aram, Kaga ji Moab amansundusa o mukongu aguvu o yiari ayi wisi epalili. Ruga, ndoyili Jacob! Ruga, nyoyila baIsrael!

⁸Tsie nyuloyila agu Nsambi jaʼ beni asamaloga? Tsie nyuloyila agu Nsambi jaʼ beni agenyoyi?

⁹Nyibalabilili o julu tsimamanyi na nyibalabilili o julu tsimikongu; ava dilongu aditsani pinsa, ageketala na malongu masusu.

¹⁰Anyi orungula utala yinombu yiJacob? Anyi orungula utubula dutalu dubategula baIsrael? Nsingisi ufu mfuitsi ji-abasungama, disukusulu diami dibi dedi na dibaIsrael!

¹¹Balac amawivula Balaam rie: Yi gumapayila? Nyimagunengila uyindoyila bavinitsi bami na yika miula guibagabili!

¹²Balaam amawagula rie: Mbe nyiyapalisa ama Fumu eposisi na buranga?

¹³Balac amamutsingula rie: Tʼwendi o yiari yisusu agu gubalabila; gulaba yika yiari yimosi gugobalaba botsu. Gukabandoyila vana.

¹⁴Amamubega o nungi jiSofim o julu mukongu uPisga; amarunga yisambuali yibinyensulu bipagu na amavagula mulumi ngombi umosi na mulumi yindombu umosi va julu kadi yinyensulu yipagu.

¹⁵Balaam amaruma Balac rie: Ba va mugula pagu agu jiunyensa, nyuleyebenguna na Nsambi.

¹⁶Fumu amabengusana Balaam na amamuruma rie: Gabuga ombu Balac, gukamutsingula mambu mami.

¹⁷Balaam amagabuga ombu Balac, amamurasuna va mugula pagu andi jiunyensa, jogu na basefu baMoab. Balac amamuwivula rie: Diambu yi Fumu atsivosa?

¹⁸Balaam amavosa mambu maNsambi rie: Balac, relama nogulu! Muana dibaala uSippor lekuluati!

¹⁹Nsambi agaa mutu agurungula ufura, agaa muana mutu agurungula, ukalula diela. Adi amavosa agodivaga? Adi amatubula agodidugusu?

²⁰Gulu, nyimadila musuga ubagabila miula: Jandi amabagabila miula, ngogusula miula miandi.

²¹Fumu agelabi dibi na Jacob, agelabi nsimbulu o Israel, Fumu Nsambi andi aji nandi, jandi avu kaga andi na dibandu dinsangu andi.

²²Nsambi amabapalisa o Egypte, amabavega mangolu nderi mangolu mapasa.

²³Mavanda magorungula uvayila Jacob diambu, na uresa ugorungula uvayila Israel diambu, O gusu diuvosu mu diambu diJacob na diIsrael rie: Ka muna yisalu yi Nsambi amabasalila.

²⁴Laba batu bebaba bavu nderi yibusi yiyimbungu, nderi mulumi-yimbungu agugesilimi te na umamana uji yibulu, te na umamana unu malungu ma-abamanemusu.

²⁵Balac amaruma Balaam rie: Pa gugobaloga kabogu guyabagabila miula wandi.

²⁶Balaam amawivula Balac rie: Mbe nyisakagutsingula yiri nyuvaga motsu ama Fumu onsingula?

²⁷Balac amatsingula Balaam rie: Tʼwendi, nyugubega o mbura jisusu; tanguji vana mbura eni Nsambi odilaba diwelimina yiri gundoyila batu bebaba.

²⁸Balac amabega Balaam o julu mukongu uPeor o yiari yikumu.

²⁹Balaam amaruma Balac rie: Tungili yisambuali yibinyensulu bipagu na tombili yisambuali yibalumi babangombi na yisambuali yibalumi babindombu.

³⁰Balac amavaga adi Balaam amavosa na amavagula mulumi ngombi umosi na mulumi yindombu umosi va julu kadi yinyensulu yipagu.