Read Punu Dutalu 24 Bible Online

Dutalu 24 - Punu bible

Dutalu 24

¹Balaam amalaba yiri Fumu amalaba diwelimina ugabila baIsrael miula, asamavaga nana temu atsitega, diwendi rie: asamamuesalisa bingana tumba amagengila o yiari yikumu.

²Balaam anobuaga misu amalabilila baIsrael, abamavaga milaku, mukuta mukuta va mbura andi; mbana Yi-nyunyi yiNsambi amaruga ombu gandi.

³Balaam amavosa mambu maNsambi rie: Mambu maBalaam muana dibaala uPeor, Mambu madibaala adilabi vala,

⁴Mambu majandi oyigulu mambu maNsambi, majandi oyijabi duganu duNsambi Aguvu Uneni, majandi oyilabi yiriariamu yiMungo Mangolu Motsu, majandi oyidugimi na avu tendili.

⁵Jacob, mandagu magu mamatsanda mavu maboti. Israel, amana mavu yitsanunu yiagu!

⁶Melabini bekiri-bekiri o yiari yiyibususu, nana manungi va mugula umujamba, ne nana alowe atsi Fumu amavara ne nana musedera aguvu va mugula umujamba.

⁷Mamba mobasa milumbu mibaIsrael levi-levi. Bivaru biogu biutsatsu tindi utsatsu. Kaga ogu jiuviolila murumitsi aguinengulungu Agag Na bufumu buandi buba na tindi mangolu.

⁸Nsambi amamupalisa o Egypte na tindi mangolu amavu nderi mangolu mapasa, obunga malongu amerondi utoga nandi, oteba bivisi biogu na obanonga mbansa tsiandi.

⁹Esilimi na evumi nana bimbungu; anyi orungula umurambusa? Miula mibi na jandi agu gugabila miula, Muiogu ubi na jandi agu guloga!

¹⁰Mbana Balac amanyoyila Balaam tindi kabu te na amaduma tulu andi. Amatsingula Balaam rie: Nyimadunengila uyindoyila bavinitsi bami, tumba laba, kumbu yirieru miula guibagabili!

¹¹Gusuga, yenawenda o bulongu buagu! Nyimavosa yiri nyudugusu duyitsu duagu tumba Fumu amagugubitsa ududila.

¹²Balaam amawaka Balac rie: Je nyisamadivosa ava gumatindila bilumbi rie:

¹³Ne pa Balac opega ndagu andi jibasa na lora jivema na lora, ngorungula uvaga adi meʼ beni, nesi diboti nesi dibi adigesoyini na durumu duFumu; nyuvosulila yika ama Fumu ovosa?

¹⁴Namunyi guilabi yika uweʼ nyiwendi o bulongu buami. Ruga ngigutsingula adi baIsrael bovayila batu bagu o gusu.

¹⁵Balaam amavosa mambu maNsambi rie: Mambu maBalaam muana dibaala uPeor, mambu madibaala adilabi vala,

¹⁶Mambu majandi oyigulu mambu ma-Nsambi, majandi oyijabi duganu duNsambi Aguvu Uneni, majandi oyilabi yiriariamu yiMungo Mangolu Motsu, Majandi oyidugimi na avu tendili.

¹⁷Nyimulabingi tumba tsiri diweru diedidi, nyimulabilili. Mbuelili jipalili ombu Jacob, Nguangu jiIsrael jimaviunsu. Jiubunga Moab tindi ubunga, jiubunga baana baSeth botsu.

¹⁸Amakevaga fumu jiEdom, amakevaga fumu jiSeir abavu bavinitsi bandi. BaIsrael bolasa mangolu mogu.

¹⁹Jandi oyipalili ombu Jacob orumanga, obokisa nsialutsu tsimisiengi!

²⁰Balaam amalaba baAmalec. Amavosa mambu maNsambi rie: Amalec avu dilongu ditega va gari malongu, tumba yilumbu yimosi obungu.

²¹Balaam amalaba baQuenie. Amavosa mambu maNsambi rie: Yitsanunu yiagu yivu yiwara, diuva diagu divu va julu dimanyi.

²²Tumba baQuenie bobingu, bisi Assyrie bodubega baviga.

²³Balaam amavosa mambu maNsambi rie: Kayia! Anyi orungula uwarila ava Nsambi olasila mangolu mandi?

²⁴Tumba makumbi mamamba moruyila o Kittim, molasa bisi Assyrie yisonyi nesi baHebreu; Jaʼ wandi owakusu o dubungu.

²⁵Mbana Balaam amarelama amayenawenda o bulongu buandi. Balac wandi amayenagabuga o yiari yiandi.