Read Punu Dutalu 25 Bible Online

Dutalu 25 - Punu bible

Dutalu 25

¹BaIsrael bamavaga milaku o Chittim na bamabanda uvaga buvuyisa na banumba baMoab.

²Bagetu beni bamanengila batu uyevagulila bansambi bogu pagu; batu bamaji biguji bibansambi bangana na bamagudama va gusu bansambi beni.

³BaIsrael bamakevega o muyitsa uBaal-Peor, Fumu amanyoyila baIsrael tindi kabu.

⁴Fumu amaruma Moise rie: Bengusana bivunda biotsu bibatu na gukasuekiga bango mbela va gusu Fumu va nsungisini na wisi yiri Fumu agomuenyoyila baIsrael kabu andi jineni.

⁵Moise amaruma bansonsi baIsrael rie: Mutu mutu aboki batu bandi abamakevega o muyitsa uBaal-Peor.

⁶Va temu eni dibaala dimosi diIsrael amaruga na mugetu umuisi Madian va misu maMoise na va misu madibuli diotsu diIsrael ava bamalililanga va dikotulu diNdagu Yibenguna.

⁷Mu dionyi Pinhas muana dibaala uElazar muana dibaala uAaron, muvagulitsi upagu amaretsama va gari dibuli na amabonga dikongu.

⁸Amaduka muisi Israel o gari ndagu andi, amamunonga mu moji na mugetu wandi; amatoba jogu botsu babeji. Mbana yivunga ayimaba ombu baIsrael yimavioga.

⁹Vamaba magumabeji na tosini jina abamafu mu yivunga yieni.

¹⁰Fumu amatsingula Moise rie:

¹¹Pinhas muana dibaala uElazar muana dibaala uAaron, muvagulitsi upagu amavotsa kabu ami aji nyimanyoyila baIsrael, mu mbari amabasa de na yiusila yiami kabogu diuleba nyimanyoga nyisamasielasana baIsrael.

¹²La dibandu guvosila rie: Nyimavangana pangini jiduvotsu nandi.

¹³Nyimavangana yiri jandi na bategula bandi boba bavagulitsi bapagu mutubu mu mbari na yiusila yiNsambi andi amatsindulila baIsrael dibumi.

¹⁴Dibaala diIsrael adimaboku na mugetu muisi Madian amaba yivunda yimukuta uSimeon, diina diandi Zimri muana dibaala uSalou.

¹⁵Mugetu muisi Madian agumaboku diina diandi Kozbi muana mugetu uSour agumaba yivunda yimukuta uMadian.

¹⁶Fumu amatsingula Moise rie:

¹⁷Lasanu bisi Madian maguga na babokianu;

¹⁸bamakelasa bavinitsi ava bamadudunsila na mela mogu mu diambu diPeor nesi mu diambu diKozbi agumaba muana mugetu uyivunda yiMadian, yibusi yiogu amaboku yilumbu yiyivunga ayimalabana mu diambu diPeor.