Read Punu Dutalu 27 Bible Online

Dutalu 27 - Punu bible

Dutalu 27

¹Baana babagetu baSelofad muana dibaala uHefer muana dibaala uGalaad muana dibaala uMakir muana dibaala uManasse na mikuta miManasse muana dibaala uJoseph; miina mabaana beni babagetu amama: Mala na Noa na Hogla na Milka na Tirsa.

²Bamabambana na bamakelasa ombu Moise na va gusu Elazar, muvagulitsi upagu na va gusu baana babakaga na dibuli diotsu va dikotulu diNdagu Yibenguna. Bamavosa rie:

³Taji etu amafuila o kumu, asamaba va gari dibuli adimabusa Fumu, diwendi rie: dibuli diCore, tumba amafuila mu diambu didibi dijaʼ beni na asamabura baana bababaala.

⁴Divu diwelimina yiri diina ditaji etu diugusulu va gari batu bandi mu mbari asamabura baana bababaala? Tuveyi dikabu dietu nana gumaveyila baana bataji bababaala bataji etu.

⁵Moise amabega diambu dieni ombu Fumu.

⁶Fumu amatsingula Moise rie:

⁷Baana babagetu baSelofad bana ndunga. Gukabavega dikabu diogu didisiala dedi mosi na dibaana bataji bababaala bataji ogu; gukabasingisa udila disiala ditaji ogu.

⁸Gukatsingula baIsrael rie: Ava dibaala ofuila tsiri ubura muana dibaala, dukasingisa muana andi umugetu udila disiala diandi.

⁹Pa agaa na muana umugetu, dukavega disiala diandi ombu baana bataji bandi bababaala.

¹⁰Pa agaa na baana bataji bababaala, dukavega disiala diandi ombu bataji bandi.

¹¹Pa taji andi agaa na baana bataji bababaala, dukavega disiala diandi ombu tindi yiburu yiandi yidibaala yimukuta andi, jandi agudidila. Aguna uba mugaga ubaIsrael na musuga ogu nana Fumu amarumina Moise.

¹²Fumu amaruma Moise rie: Mata o julu mukongu uAbarim na labilila bulongu abu nyiveyi baIsrael.

¹³Gubulabilila; tumba ndeʼ wagu gufu munongu mosi nana muana taji agu Aaron amafuila;

¹⁴mu mbari dusamadedila durumu duami o kumu jiTsin ava dibuli dimatsundila mamba na dusamalasa buNsambi buami va misu mogu. Amavosa diambu adimalabana o Cades o kumu jiTsin, diwendi rie: mamba maMeriba, divindugulu rie: utsunda.

¹⁵Moise amatsingula Fumu rie:

¹⁶Fumu Nsambi ndeʼ agumavega bisundu biotsu monyu, sola dibaala va gari dibuli.

¹⁷Dibaala adiupalanga nokotanga va gusu ogu na diubapalisanga nobakotisanga yiri dibuli diFumu digoba nana bindombu abigaa na mubungulitsi.

¹⁸Fumu amaruma Moiserie: BongaJosue muana dibaala uNoun, dibaala adivu na Yinyunyi yiNsambi; gukamusakiga dikaka.

¹⁹Gukamubega va gusu Elazar muvagulitsi upagu na va gusu dibuli diotsu; gukatabula rie: Agugu la yivinga yiami.

²⁰Gukamugabila mangolu magu yiri dibuli diotsu diIsrael diumudedila.

²¹Okelasa ombu Elazar, muvagulitsi upagu agumuwivulila Urim va gusu Fumu; Josue na dibuli diIsrael bopalanga na musuga uElazar na musuga andi bokotanga wandi.

²²Kabogu Moise amavaga adi Fumu amamuruma. Amabonga Josue na amamuviosa va gusu Elazar, muvagulitsi upagu na va gusu dibuli diotsu.

²³Mbana amamusakiga miogu miandi na amamuvaga yivinga yiandi nana Fumu amamurumina.