Read Punu Dutalu 31 Bible Online

Dutalu 31 - Punu bible

Dutalu 31

²Gausila bisi Madian pila jibaIsrael, ne gukafu.

³Kabogu Moise amatsingula batu rie: Veganu babaala bitogulu bidivita; bayetoyisa bisi Madian ubagabusila pila jiFumu.

⁴Kadi yifumba mu bifumba biotsu biIsrael basindiyi tosini babaala.

⁵Kabogu basoli babaala mu bifumba biotsu biIsrael, tosini babaala mu kadi yifumba, dutalu duotsu: yigumi na tosini beji tsibagora aboyetoga divita.

⁶Moise amabasindiga o utoga va mosi na Pinhas muana dibaala uElazar, muvagulitsi upagu agumayenabeganga bisalulu biyingitsi na agumasiganga mimbanda na nsiyitsi-jiulubusa.

⁷Bamatoga na bisi Madian nana Fumu amarumina Moise na jogu bamaboka babaala botsu.

⁸Va julu vana bamaboka bakaga baranu baMadian: Evi na Requem na Sour na Hour na Reba va mosi na Balaam muana dibaala uBeor.

⁹BaIsrael bamakotisa bagetu botsu baMadian na baana bogu o buviga; bamakinda biruitsi biogu na migamba miogu miotsu na busina buogu buotsu.

¹⁰Bamanyensa misiengi miotsu na milaku miogu.

¹¹Bamayenawenda na biotsu abi bamakinda, bimunongu na munongu ne batu ne bibulu,

¹²bamabega baviga na biotsu bimunongu na munongu abi bamakinda ombu Moise na Elazar muvagulitsi upagu nombu dibuli diIsrael abamavaga milaku o kumu tsiMoab bebeli na mujamba uJourdain va nsungisini na Jericho.

¹³Moise na Elazar, muvagulitsi upagu na baana babakaga botsu badibuli bamayebabengusana o tsomu dimbu.

¹⁴Moise amanyoyila bivunda bibagora na bibatosini na bibakama abamaruyila o utoga.

¹⁵Amabawivula rie: Dibandu yi dugabokila bagetu botsu?

¹⁶Bagetu beni abamagulu malongi maBalaam abamarombisa baIsrael ubiva va gusu Fumu mu diambu diPeor; la dibandu yivunga yimalabana ombu dibuli diFumu.

¹⁷Namunyi bokanu baana botsu bababaala na bokanu bagetu botsu abamafubana yitsiga na babaala.

¹⁸Tumba duyaboka baana babagetu abasakafubana yitsiga na babaala.

¹⁹Dukavaga milaku o tsomu dimbu te na yisambuali yibilumbu; jenu botsu adumaboka batu na jenu botsu adumabemba bamfumbi; dukeliomisa mu yilumbu ayimurieru na ayimusambuali, jenu na baviga benu.

²⁰Duliomisa na biduaru biotsu wandi na bima biotsu bimikata na bisalulu biotsu bimionyi miyinsabi na bisalulu biotsu bimiri.

²¹Elazar, muvagulitsi upagu amatsingula bagora abamawenda o divita rie: Guluanu mugaga agu Fumu amavega Moise.

²²Lora na lora jivema na kunga na budilu na biumba bimunongu na munongu

²³na yisalulu yiotsu ayiurungula ukotusu o muji dukotisa biotsu o muji ubiliomisa. Tumba biotsu abigorungula ukotusu o muji biuputugu mu mamba maduliomusu.

²⁴Yilumbu ayimusambuali dukasusa na biduaru bienu mbana duba balioma; mbana durungula ugabuga o milaku.

²⁵Fumu amaruma Moise rie:

²⁶Jenu na Elazar, muvagulitsi upagu na bivunda bimikuta midibuli vaganu dutalu duabimakindu; nesi batu nesi bibulu.

²⁷Ndeʼ Moise gabila biotsu abimakindu ombu bagora abamawenda o utoga divita nombu batu abamasiala yika usiala.

²⁸Mu dikabu dibagora abamawenda o utoga divita gukagusulila Fumu dikabu, yimosi mu kama yiranu: nesi tsibatu nesi tsibangombi nesi tsibaburu nesi tsibindombu nesi tsibinsabi.

²⁹Gukagusula dikabu dibagora adivu diFumu nodivega ombu Elazar, muvagulitsi upagu.

³⁰Mu dikabu dibaIsrael abamasiala yika usiala gukagusula yimosi mu magumaranu: nesi mabatu nesi mabangombi nesi mababuru nesi babindombu nesi mabinsabi nesi mabibulu biotsu; gukavega dikabu dieni ombu bisi Levi abekelisi Ndagu Yibenguna.

³¹Moise na Elazar, muvagulitsi upagu bamavaga adi Fumu amaruma Moise.

³²Abimasialulu mu abimakindu na bagora bimaba kama yisiamunu na magumidusambuali na tosini yiranu tsibindombu na binsabi;

³³magumidusambuali na tosini beji tsibangombi;

³⁴magumasiamunu na tosini mosi tsibaburu;

³⁵magumarieru na tosini beji tsibatsiemi.

³⁶Dikabu dibagora dimaba: kama yirieru na magumarieru na yisambuali yitosini na kama yiranu tsibindombu na binsabi;

³⁷kabogu kama yisiamunu na magumidusambuali bimaba biFumu;

³⁸magumarieru na tosini yisiamunu tsibangombi, kabogu magumidusambuali na beji bamaba baFumu;

³⁹magumarieru matosini na kama yiranu tsibaburu, kabogu magumasiamunu na buru mosi bamaba baFumu;

⁴⁰yigumi na tosini yisiamunu tsibatu, kabogu magumarieru na babeji bamaba baFumu.

⁴¹Moise amawakisa Elazar, muvagulitsi upagu dikabu adimagusululu Fumu nana Fumu amarumina.

⁴²Dikabu adi abamasiala yika usiala bamadila adi Moise amagusulila bagora,

⁴³dimaba: kama yirieru na magumarieru na yisambuali yitosini na kama yiranu tsibindombu na binsabi,

⁴⁴magumarieru na tosini yisiamunu tsibangombi,

⁴⁵magumarieru matosini na kama yiranu tsibaburu,

⁴⁶yigumi na tosini yisiamunu tsibatu.

⁴⁷Mu dikabu dieni dibatu abamasiala yika usiala Moise amabongila dikabu diyimosi mu magumaranu nesi batu nesi bibulu; amadivega ombu bisi Levi, abamakelisa Ndagu Yibenguna nana Fumu amarumina.

⁴⁸Bivunda bibagora na bibatosini na bibakama bamarasuna Moise,

⁴⁹bamamutsingula rie: Basalitsi bagu bamavaga dutalu dubagora ababetsi o tsi durumu duetu na jetu botsu tuvu tudugu.

⁵⁰La dibandu tuibeyili pagu ombu Fumu, mutu mutu bima bilora abi tumadila: nesi bapanga nesi milunga nesi mioru nesi bipunga nesi misanga yiri gutsindula batu betu dibumi va gusu Fumu.

⁵¹Moise na Elazar, muvagulitsi upagu bamabonga bima bieni biotsu bilora.

⁵²Lora tsiotsu atsi bivunda bibagora na bibatosini na bibakama bamavagulila Fumu pagu jiusambula: utsira ujionyi umaba kama na magumidusambuali makilu.

⁵³Bagora bamakelisa mutu mutu biandi abi amakinda.

⁵⁴Moise na Elazar muvagulitsi upagu bamabonga lora tsibivunda bibagora na bibatosini na bibakama na bamatsibega o Ndagu Yibenguna nana yirangumunu yibaIsrael va gusu Fumu.