Read Punu Dutalu 34 Bible Online

Dutalu 34 - Punu bible

Dutalu 34

¹Fumu amatsingula Moise rie:

²Vega diruma diedidi ombu baIsrael rie: Ava dutolila o bulongu buCanaan, bulongu bueni buba disiala dienu, diwendi rie: bulongu buCanaan, mandilu mabulongu bueni amama:

³O yiari yitandu mobandila o kumu jiTsin o dilongu diEdom. Mandilu menu mayiari ayi wisi epalili mobandila o masuka matandu te no Mubu uKali;

⁴notsiengila te no tandu jiAkrabbim na movioyila va Tsin te no tandu o yiari yiCades-Bamea; na movioga te no Hassar-Addar na movioga te no yiari yiAsmon;

⁵ubandila va Asmon mogeluga te no mujamba ugeyi uEgypte na mopalila te no mubu.

⁶Mandilu menu o yiari ayi wisi ewendisini moba te no Mubu Uneni: amana moba mandilu menu o yiari ayi wisi ewendisini.

⁷Mandilu menu o yiari yibanda amama: Ubandila o Mubu Uneni dukavaga bilimba te no mukongu uHor;

⁸ubandila o mukongu uHor dukavaga bilimba o yiari yiLebo-Hamat te no Sedad;

⁹biuvioga te no Zifron, biuyepalila o Hasser-Enan: amana moba mandilu menu o yiari yibanda.

¹⁰Dukavega bilimba bimandilu menu mayiari ayi wisi epalili ubandila o Hasser-Enan te no Chefam;

¹¹mobandila o Chefam novindama te no Ribla o yiari ayi wisi epalili yiAin; movindama te no Yiliba yiotsu yiGenesareth o yiari ayi wisi epalili;

¹²momuevindama te no yiari yimujamba uJourdain na moyepalila o Mubu uKali. Anana buiongu buenu bubila na anana mandilu mabulongu mobila yiari na yiari.

¹³Moise amatsingula diruma dieni ombu baIsrael rie: Abuna la bulongu abu dugabana na mbanda, abu Fumu amaruma uvega ombu yifu yibifumba na yiasi yiyifumba.

¹⁴Yifumba yiRuben na yifumba yiGad bamabonga disiala diogu muna mandagu mabataji bogu; na yiasi yiyifumba yiManasse wandi yimabonga disiala diandi.

¹⁵Bifumba bieni bibeji na yiasi yiyifumba bamabonga disiala diogu o disimu dina diJourdain va nsungisini na Jericho o yiari ayi wisi epalili.

¹⁶Fumu amatsingula Moise rie:

¹⁷Miina mababaala abodugabila bulongu amama: Elazar, muvagulitsi upagu na Josue muana dibaala uNoun.

¹⁸Dukamuebonga muana kaga umosi ukadi yifumba, udugabila bulongu. Miina mababaala beni amama:

¹⁹mu yifumba yiJuda: Caleb muana dibaala uYefounne;

²⁰mu yifumba yiSimeon: Chemouel muana dibaala uAmmihoud;

²¹mu yifumba yiBenjamin: Elidad muana dibaala uKislon;

²²mu yifumba yiDan: Bouqui muana dibaala uYogli;

²³mu yifumba yiManasse: Hanniel muana dibaala uEfod;

²⁴mu yifumba yiEfraim: Quemouel muana dibaala uChiftan; baana bababaala baJoseph;

²⁵mu yifumba yiZabulon: Elissafan muana dibaala uParnak;

²⁶mu yifumba yiIssakar: Paltiel muana dibaala uAzan;

²⁷mu yifumba yiAsser: Ahihoud muana dibaala uChelomi;

²⁸mu yifumba yiNeftali: Pehahel muana dibaala uAmmihoud.

²⁹Abana aba Fumu amavega musuga ugabila baIsrael bulongu buCanaan.